ത്രിവേണി

കർണാടക-ഒരു കൂർഗ് യാത്ര

2010-10-02T08:34:00.000+05:30

സഞ്ചാര കാഴ്ചകള്‍ എന്ന എന്റെ ബ്ലോഗില്‍ മടികെരിയിലെ ചില ചിത്രങ്ങള്‍ പോസ്റ്റ്‌ ചെയ്തിരുന്നു.അതില്‍ വിവരണം തീരെ കുറഞ്ഞു പോയി എന്ന് പലരും അഭിപ്രായപെടുകയുണ്ടായി. കൂര്‍ഗ് യാത്രകള്‍ പലരും ഇതിനു മുന്‍പ് മനോഹരമായി എഴുതിയിട്ടുള്ളത് കൊണ്ട് ഞാന്‍ ഒന്ന് മടിച്ചു.മാത്രവുമല്ല എന്റെ താമസം മടികേരിയില്‍ നിന്നും 35 കിലോമീടറോളം അകലെ കക്കബെ എന്ന ഗ്രാമത്തിലായിരുന്നു താനും.പിന്നീട് ആലോചിച്ചപ്പോള്‍ അതൊന്നു എഴുതിക്കളയാം എന്ന് തീരുമാനിച്ചു.കൂട്ടത്തില്‍ കുറച്ചു മടിക്കേരി കാഴ്ചകളും.
ഈ മഴകാലം തുടങ്ങുന്നതിന് തൊട്ടു മുന്‍പുള്ള സമയത്താണ് കൂര്‍ഗ് സന്ദര്‍ശിക്കുവാനുള്ള ക്ഷണം എനിക്ക് ലഭിക്കുന്നത്.വളരെ അടുത്ത ഒരു സ്നേഹിതന് അവിടെ എസ്റ്റേറ്റ്‌ ഉണ്ട്.അവിടെ പോകാം എന്ന് പലപ്രാവശ്യം പദ്ധതിയിട്ടെങ്കിലും,ഓരോരോ കാരണത്താല്‍ അത് നീണ്ടു പോയി.ഇത്തവണ ഒരു സിവില്‍ വ്യവഹാരത്തിനായി അടിയന്തരമായി അവിടെ പോകാന്‍ ചങ്ങാതി തീരുമാനിച്ചപ്പോള്‍ ഞാനും കൂടെ ചേര്‍ന്നു.അല്ലെങ്കിലും എന്നെ സംബന്ധിചിടത്തോളം എല്ലാ യാത്രകളും ആകസ്മികമായി മാത്രമേ തരപ്പെടാറുള്ളൂ,മുന്‍‌കൂര്‍ പദ്ധതികളെല്ലാം പൊളിയാറാണു പതിവ്.
ദൂരെ യാത്രയായതിനാല്‍ വെളുപ്പാന്‍ കാലത്ത് തന്നെ പുറപ്പെട്ടു.ഏഴു മണിയായപ്പോഴേക്കും കോഴിക്കോട് കടന്നു കിട്ടി.

മഴ നനഞ്ഞ കോഴിക്കോടന്‍പ്രഭാതം
മഴ നനഞ്ഞ കോഴിക്കോടന്‍ പ്രഭാതം,തിരക്കില്ലാത്ത റോഡുകള്‍,ചെറിയൊരു ചായകുടിക്ക് ശേഷം
വൈത്തിരി റോഡ്‌ പിടിച്ച് വീണ്ടും യാത്ര.

ചുരത്തില്‍ കയറുമ്പോള്‍ ആകാശം ഇരുണ്ട് മൂടി നില്‍ക്കുന്നു..എന്നാല്‍ പെട്ടെന്ന് മാനം തെളിഞ്ഞു.ഒരു മയക്കത്തിന് ശേഷം ഉണരുമ്പോള്‍ മാനന്തവാടി ആയിരിക്കുന്നു.എനിക്ക് ഇടവും പ്രിയപ്പെട്ട വയനാടന്‍ പട്ടണങ്ങളില്‍ ഒന്നാണ് മാനന്തവാടി.സുഖകരമായ കാലാവസ്ഥക്ക് പുറമേ നല്ല നിലവാരമുള്ള ഹോട്ടലുകളും ഇവിടെ ഉണ്ട്.ജൈന ക്ഷേത്രങ്ങളും ഒക്കെയായി ടൂറിസ്ടുകളും ധാരാളമായി വന്നുകൊണ്ടിരിക്കുന്നു.പക്ഷെ സമയക്കുറവു മൂലം മനസ്സില്ലാമനസ്സോടെ മാനന്തവാടിയോടു വിട പറഞ്ഞു.
കാട്ടിക്കുളം കഴിഞ്ഞു തെറ്റ് റോഡ്‌ എന്ന സ്ഥലമായി.ഇവിടെ നിന്നുമാണ് തിരുനെല്ലി ക്ഷേത്രത്തിലേക്കുള്ള പാത തിരിയുന്നത്.

തെറ്റ് റോഡ്‌
ഈ ജങ്ങ് ഷനിലാണ് കുട്ടേട്ടന്റെ ചെറിയ ടീ സ്റ്റാൾ .ഈ ചായക്കടയിലെ ഉണ്ണിയപ്പം വളരെ പ്രസിദ്ധമാണല്ലോ?ഇതിനെക്കുറിച്ചു ഞാന്‍ നേരത്തെ ഒരു പോസ്റ്റ്‌ ഇട്ടിട്ടുണ്ടായിരുന്നു ,ദാഇവിടെ.പരിചയം പുതുക്കി,ചായയും,ഉണ്ണിയപ്പവും കഴിച്ച് യാത്ര തുടര്‍ന്നു.

ഇരു വശവും നല്ല കാടാണ്,പച്ച പുതച്ചു വരുന്നതേയുള്ളൂ.ആനകളെ കാണാനാവുമെന്ന പ്രതീക്ഷയില്‍ കണ്ണ് ചിമ്മാതെ നോക്കിയിരുന്നെങ്കിലും ഒരെണ്ണത്തെപ്പോലും കാണുവാന്‍ സാധിച്ചില്ല,
തോല്‍പ്പെട്ടി,കുട്ട വഴിയാണ് സഞ്ചാരം.തോല്‍പ്പെട്ടിയിലോക്കെ വന്‍കിട റിസോര്‍ട്ടുകള്‍ വന്നിരിക്കുന്നു. വനാതിർത്തിയോട് ചേർന്നാണു ഏറെയും. അതിലൊക്കെ നിറയെ ആളുകളും വാഹനങ്ങളും.

തോല്‍പ്പെട്ടിറിസോര്‍ട്ടു ‍.
നമ്മുടെ ഒരു മുന്‍ എംപിയുടെ എസ്റ്റേറ്റ്‌ റോഡരികില്‍ നിന്നും കാണാം.കുട്ടയാണ് കേരള അതിര്‍ത്തി.കര്‍ണാടക സംസ്ഥാനം ഇവിടം മുതല്‍ തുടങ്ങുകയായി.റോഡുകളുടെ അവസ്ഥ പരമ ശോചനീയമാണ്,കുഴികള്‍ മാത്രം.ടാര്‍ എന്നാ വസ്തു കാണുവാന്‍ തന്നെ പ്രയാസം.ഇതിലും എത്രയോ ഭേദം ഞങ്ങള്‍ ഇപ്പോള്‍ സഞ്ചരിച്ച കേരള റോഡുകള്‍.കുഴികളിലൂടെ ചാടി ചാടി കാര്‍ മെല്ലെ മെല്ലെ നീങ്ങിക്കൊണ്ടിരുന്നു.പല അവസരങ്ങളിലും പുറത്തിറങ്ങി നടക്കുകയാണ് ഭേദം എന്ന് തോന്നി.പക്ഷെ എതിരെ ഒരു വാഹനം വന്നാല്‍ റോഡില്‍ ഉയരുന്ന പൊടി കണ്ടപ്പോള്‍ ആ ശ്രമം ഉപേക്ഷിച്ചു.പക്ഷെ ചുറ്റും നിറഞ്ഞു നില്ക്കുന്ന പ്രകൃതിയുടെ മനോഹാരിത ആ കുറവുകളെല്ലാം നികത്തും.

റോഡിനിരുവശവും പൂത്തു നില്‍ക്കുന്ന കാപ്പിത്തോട്ടങ്ങള്‍.അതിനുള്ളിൽ വളർന്നു നില്ക്കുന്ന ഈട്ടി അടക്കമുള്ള വൻവൃക്ഷങ്ങള്‍.

പൂത്തുലഞ്ഞുനില്ക്കുന്നകാപ്പിത്തോട്ടങ്ങൾ
ഒരു നാല് കിലോമീറര്‍ കഴിഞ്ഞപ്പോള്‍ തരക്കേടില്ലാത്ത റോഡായി.നെല്‍പ്പാടങ്ങള്‍ രണ്ടു വശത്തും കാണാം,അത് കഴിഞ്ഞാലുടനെ വീണ്ടും ചെറിയ കുന്നുകളില്‍ കാപ്പിത്തോട്ടം.

വില്ലീസ് ജീപിലെ സഞ്ജാരം
കൂര്‍ഗ് ഭാഗങ്ങളിലെവിടെയും ഈ ഒരു സവിശേഷതയാണ് എനിക്ക് കാണുവാന്‍ കഴിഞ്ഞത്.റോഡ്‌ നന്നായാതോടെ കാര്‍ നല്ല വേഗതയിലായിക്കഴിഞ്ഞു.ഗോനിക്കൊപ്പാല്‍ എന്ന ചെറു പട്ടണം പിന്നിട്ടു വീണ്ടും മുന്നോട്ടു. ഉച്ച ഭക്ഷണം വീരാജ് പെട്ടില്‍ നിന്നും വാങ്ങിത്തരാമെന്നാണ് സുഹൃത്തിന്റെ വാഗ്ദാനം.മട്ടന്‍ ബിരിയാണിക്ക് പേരുകേട്ട പട്ടണമാണത്രേ ഇത്. കാര്‍ വീരാജ്‌ പെട്ട് പട്ടണത്തിലെത്തി.

വീരാജ്പെട്ട് പട്ടണം
ചെറുതെങ്കിലും തിരക്കുള്ള ഒരു പട്ടണമാണ് ഇത്.സ്പൈസസ് കടകളാണെങ്ങും. പ്രത്യേക രീതിയില്‍ സാരിയുടുത്ത കുടകന്‍ സ്ത്രീകളെയും,ജെന്റില്‍മാന്‍ ഡ്രസ്സ്‌ ധരിച്ച പുരുഷന്മാരെയും ഇവിടെ കാണാം.കൌബോയ്‌ തൊപ്പിയും ധരിച്ചു,പഴയ ക്ലാസിക് വിലീസ് പെട്രോള്‍ ജീപ്പുകളില്‍ ചുറ്റിയടിക്കുന്ന പ്രൌഡഗംഭീരരായ കുടകന്മാരെയും കാണാം.
മിക്കവാറും ആളുകള്‍ക്ക് മലയാളം അറിയാം.ചെറുതെങ്കിലും നല്ല ഒരു റെസ്റ്റാറന്റിൽ നിന്നും മട്ടന്‍ ബിരിയാണി തന്നെ വാങ്ങിത്തന്നു സുഹൃത്ത് വാക്കുപാലിച്ചു.നല്ല സൂപ്പര്‍ ബിരിയാണി!!
വീരാജ്‌ പെട്ടില്‍ നിന്നും കുറെദൂരം ഇനിയും സഞ്ചരിക്കേണ്ടതുണ്ട്. മടിക്കേരി റൂട്ടില്‍ നിന്നും തിരിഞ്ഞു, കക്കബെ എന്ന സ്ഥലത്താണ് സുഹൃത്തിന്റെ എസ്റ്റേറ്റ്‌.അവിടെക്കുള്ള യാത്രകളില്‍ വീരജ്പെട്ടില്‍ നിന്നുമാണ് അവര്‍ ഭക്ഷണപാനീയങ്ങള്‍ എല്ലാം സംഭരിക്കുന്നത്.ഇപ്രാവശ്യവും പതിവ് തെറ്റിക്കാതെ നല്ല മീനും,ചിക്കനും,കുറച്ചു പഴങ്ങളും മറ്റും വാങ്ങി കാറിലാക്കി. എസ്റ്റേറ്റിലെ കുക്ക് മലയാളി ആണു,കുടകൻ വിഭവങ്ങളൊരുക്കന്നതിൽ നിപുണനും!!

വീണ്ടും കാപ്പിതോട്ടങ്ങള്‍ തന്നെ കാഴ്ച. റോഡ്‌ വീതി തീരെ കുറവാണ്,എതിരെ ഒരു വാഹനം വന്നാല്‍ നമ്മുടെ വണ്ടി ടാറില്‍ നിന്നിറക്കാതെ രക്ഷയില്ല. ഇടയ്ക്കിടെ ചെറിയ ചെറിയ ചില ഗ്രാമങ്ങള്‍ പിന്നിടുന്നുണ്ട്.ഒരു മരതണലില്‍ അല്പനേരത്തെ വിശ്രമത്തിന് ശേഷം യാത്ര തുടര്‍ന്നു.മനോഹരമായ ഭൂപ്രകൃതിയാണ്,ഇവിടെയൊക്കെ. നെല്‍വയലുകള്‍ക്ക് അതിരിടുന്ന ചെറുകുന്നുകള്‍,അതിനിടയിലെ വീടുകള്‍, ഇഞ്ചി കൃഷിക്കായി ഒരുക്കിയിരിക്കുന്ന പറമ്പുകള്‍ അങ്ങിനെ അങ്ങിനെ പോകുന്നു കാഴ്ചകള്‍.വഴിയിലെങ്ങും ഹോം സ്റ്റേ ബോര്‍ഡുകള്‍ കാണാം,ടൂറിസം അഭിവൃദ്ധി പ്രാപിക്കുന്നതിനെ ലക്ഷണങ്ങള്‍.പക്ഷെ കിലോമീറ്ററുകള്‍ അകലെ മടികെരിയിലെതാണെന്നു മാത്രം.ബോര്‍ഡുകള്‍ കാണുമ്പോള്‍,നമ്മള്‍ മടിക്കേരി ആകാറായി എന്ന് തെറ്റിധരിക്കുകയും ചെയ്യും.

കക്കബെ ഗ്രാമദ്രുശ്യങ്ങൾ
കുറച്ചു കഴിഞ്ഞപ്പോള്‍ കക്കബെ എന്ന ഗ്രാമമെത്തി.ഒരു ചായക്കടയും,ഒന്ന് രണ്ടു പലചരക്ക് കടകളുമുള്ള ഗ്രാമം.ഒരു പലചരക്ക് കട മലയാളി ആയ പൌലോസിന്റേതാണ്.കോതമംഗലത്ത് നിന്നും കുടിയേറി,കന്നടക്കാരിയെ കല്യാണവും കഴിച്ചു,സുഖമായി ജീവിക്കുന്നു.ആള്‍ക്ക് മുന്‍പ് വന്യമ്രുഗങ്ങളുടെ മാംസകച്ചവടം ഉണ്ടായിരുന്നുവത്രേ. രണ്ടു മൂന്നു കേസില്‍ പെട്ടപ്പോള്‍ നിർത്തിയതാണെന്ന് സുഹൃത്ത് പറഞ്ഞു.

മെയിന്‍ റോഡില്‍ നിന്നും ഒരു ചെറിയ ഇടറോഡിലേക്ക്‌ കാര്‍ തിരിഞ്ഞു.ഈ വഴിയിലൂടെ വേണം എസ്റ്റേറ്റ്‌ റോഡിലെത്താന്‍.ഒരു വലിയ മലയുടെ അടിവാരത്താണ് എസ്റ്റേറ്റ്‌.

എസ്റ്റേറ്റ് റോഡ്
ഗെയിറ്റ് മുതല്‍ പിന്നെ ഫോര്‍ വീല്‍ ജീപ്പ് മാത്രമേ പോകുകയുള്ളൂ.ജീപുമായി സൂപര്‍വൈസര്‍ ഷാജി കാത്തു നില്‍പ്പുണ്ട്.നെടുംകണ്ടം കാരനാണ് ഷാജി. 5 വര്‍ഷമായി ഇവിടെയായിട്ടു.ഏലം കൃഷിയില്‍ വിദഗ്ധനാണ് ഇദ്ദേഹം. കാര്‍ അടിവാരത്തുള്ള വീട്ടിലിട്ടു,സാധനങ്ങള്‍ എല്ലാം ജീപ്പിലെടുത്തു വച്ച്,തോട്ടത്തിലേക്ക് യാത്രയായി.ഒരു കിലോമീടറോളം യാത്രയുണ്ട്,എസ്റ്റേറ്റ്‌ ബംഗ്ലാവിലേക്ക്.(ബംഗ്ലാവെന്നു കേട്ട് തെറ്റിധ്ധരിക്കരുതെ,)എല്ലാവിധ സൌകര്യങ്ങളുമുള്ള ,3 കിടപ്പ് മുറികളും,അടുക്കളയും,വരാന്തയും,ഔട്ട്‌ഹൌസുമുടങ്ങുന്ന, പഴയ , നല്ല ഒരു വീട്.
നല്ല കുത്തനെയുള്ള കയറ്റങ്ങളും,ഇറക്കങ്ങളും.ഇടയ്ക്കിടെ,വഴി മുറിച്ചൊഴുകുന്ന കാട്ടരുവികള്‍. കാപ്പി ചെടികള്‍ക്കിടയിലൂടെ, റോളർ-കോസ്റ്റ് റൈഡ് പോലെ ജീപ്പ് യാത്ര. , ബംഗ്ലാവ് ലക് ഷ്യമാക്കി,ജീപ്പ് നീങ്ങിക്കൊണ്ടിരുന്നു.

(ഒരു പോസ്റ്റ് കൂടി ഇട്ടാൽ ഈ യാത്ര തീർന്നേക്കും? )

തമിഴ്നാട്-തേനി ജില്ലയിലെ തീര്‍ത്ഥതൊട്ടി തിരുകോവില്‍

2010-08-15T14:15:00.003+05:30

തമിഴ് നാട്ടിലെ ഹരിതാഭമായ ജില്ലകളിലൊന്നാണു തേനി.ഏതാനും വര്‍ഷങ്ങള്‍ക്ക് മുന്‍പ് വരെ മധുര ജില്ലയുടെ ഭാഗമായിരുന്നു,തേനി പ്രദേശങ്ങള്‍.

കുമളി-തേനി റോഡ്
കഴിഞ്ഞ ദിവസം തേനിയിലേക്ക് ഒരാവശ്യത്തിനായി പോകേണ്ടി വന്നു.കുമളിയില്‍ നിന്നും ആണു യാത്ര തുടങ്ങിയത്.വാഹനത്തില്‍ കയറിയ ഉടനെ ചെറുമഴയും തുടങ്ങി.

തമിഴ്നാട്ടിലൂടെ ചെറുമഴയത്തുള്ള യാത്രകള്‍ രസകരമാണു.പൊടിശല്യമില്ലാതെ,പുതുമണ്ണിന്റെ ഹൃദ്യമായ ഗന്ധം അനുഭവിച്ച് കൊണ്ടുള്ള യാത്ര.
കുമളിയില്‍നിന്നും ലോവര്‍ ക്യാമ്പ് വരെ ഇറക്കമാണു,പിന്നീടങ്ങോട് നിരപ്പായ റോഡുകളും. ചിന്നമണ്ണൂര്‍ ഭാഗങ്ങളില്‍,മുന്തിരിതോട്ടങ്ങളുടെ നടുവിലൂടെയാണു യാത്ര.

     ചിന്നമണ്ണൂരിലെ മുന്തിരിത്തോട്ടങ്ങള്‍

തമിഴന്റെ അദ്ധ്വാനത്താല്‍ മുല്ലപ്പെരിയാറിന്റെ സമൃദ്ധിയില്‍ നല്ല വിളവ് തരുന്ന ഈ മുന്തിരിതോട്ടങ്ങളുടെ ഉടമസ്ഥരിലേറെയും മലയാളികളാണെന്നുള്ളതാണു വസ്തുത.ഇവിടത്തെ വില്പന കേന്ദ്രങ്ങളില്‍ ഫാംഫ്രെഷ് മുന്തിരി വില്‍ക്കുന്നുണ്ടെങ്കിലും വിലയില്‍ കാര്യമായ കുറവൊന്നുമില്ല.പിന്നെ ഒരു ആശ്വാസത്തിനും,കൌതുകത്തിനും കുറച്ച് വാങ്ങാമെന്ന് മാത്രം.മുന്തിരി തൈകളും ഇവിടെ ലഭ്യമാണു.

റോഡിനിരുവശവും നെല്‍പ്പാടങ്ങളാണു, നോക്കെത്താദൂരത്തോളം അവ പരന്നു കിടക്കുന്നു.തേനിയില്‍ നിന്നും മൂന്നാറിനു പോകുന്ന റോഡ് ,കൊച്ചി-മധുര എന്‍ എച്ച് 49 നാഷണല്‍ ഹൈവേയുടെ ഭാഗമാണു.
തേനി-ബോഡി റോഡരികിലുള്ള ഒരു പ്രസിദ്ധ ക്ഷേത്രമാണു തീര്‍ത്ഥതൊട്ടി തിരുകോവില്‍.

തീര്‍ത്ഥതൊട്ടി തിരുകോവില്‍

പാണ്ഡ്യരാജാക്കന്മാരുടെ കാലത്ത് നിര്‍മ്മിക്കപ്പെട്ടതെന്ന് കരുതുന്ന ഈ ക്ഷേത്രത്തോട് ചേര്‍ന്നുള്ള കുളത്തില്‍ വന്നു ചേരുന്ന ഒരു ഉറവയില്‍ നിന്നും 24 മണിക്കൂര്‍ നേരവും ജലം നിര്‍ഗമിച്ച് കൊണ്ടിരിക്കുന്നു.

വറ്റാത്ത നീരുറവ
എല്ലാ കാലാവസ്ഥയിലും ഒരേ അളവില്‍ ജലപ്രവാഹമുള്ള ഈ ഉറവയുടെ ഉത്ഭവം അജ്ഞാതമാണു.അത്ഭുതസിദ്ധികളുണ്ടെന്ന് വിശ്വസിക്കപ്പെടുന്ന ഈ ജലപ്രവാഹത്തിലെ കുളി ആഗ്രഹസഫലീകരണത്തിനു ഉത്തമമെന്ന് കരുതപ്പെടുന്നു.
മൂന്നാര്‍ റോഡിലുള്ള ഒരു ചെറുപട്ടണമാണു ബോഡി എന്നറിയപ്പെടുന്ന ബോഡിനായ്ക്കന്നൂര്‍.മലനിരകള്‍ അതിരിടുന്ന ഇവിടെ നിന്നും ഹെയര്‍പിന്‍ വളവുകള്‍ നിറഞ്ഞ ചുരം തുടങ്ങുന്നു.

ബോഡിമെട്ട് റോഡ് ദൂരെ അവ്യക്തമായി കാണാം

തേനിയില്‍ നിന്നും 15കിമി ദൂരത്തായാണു ബോഡി സ്ഥിതി ചെയ്യുന്നത്.ഇവിടെ നിന്നും 29 കിമി അകലെയാണു കേരള-തമിഴ്നാട് അതിര്‍ത്തിയിലുള്ള ബോഡിമെട്ട്.സദാ സമയവും ശക്തമായ കാറ്റ് വീശുന്ന,അസഹ്യമായ തണുപ്പ് അനുഭവപ്പെടുന്ന, ഈ പ്രദേശത്ത് സര്‍ക്കാര്‍ ചെക്ക് പോസ്റ്റുകളും തോട്ടം തൊഴിലാളി ലയങ്ങളും മാത്രമാണുള്ളത്.45കിമി അകലെയാണു മൂന്നാര്‍.ഏലതോട്ടങ്ങളുടെ നടുവിലൂടെയുള്ള ഈ യാത്ര വളരെ ഹൃദ്യമാണെങ്കിലും രാത്രി യാത്ര,പ്രത്യേകിച്ചും മഴക്കാലത്ത് ,ആശാസ്യമല്ല.ചുരത്തില്‍ ഉണ്ടാകാറുള്ള മലയിടിച്ചിലും, ആനയുള്‍പ്പെടെയുള്ള വന്യമൃഗങ്ങളുടെ രാത്രിയിലുള്ള സാന്നിദ്ധ്യവും ഇതിനു കാരണമാകുന്നു.

പെട്രോണാസ് ഇരട്ട ഗോപുരങ്ങള്‍

2010-07-16T09:30:00.000+05:30

ലോകത്തിലെ ഏറ്റവും ഉയരമുള്ള ഇരട്ടഗോപുരങ്ങളാണു മലേഷ്യയുടെ തലസ്ഥാനമായ കുലാലമ്പൂരില്‍ സ്ഥിതിചെയ്യുന്ന പെട്രോണാസ് ടവേര്‍സ്.1998ഇല്‍ നിര്‍മ്മാണം പൂര്‍ത്തിയായ ഈ ആകാശഗോപുരത്തിനു, 451 മീറ്ററാണു ഉയരം.കോണ്‍ക്രീറ്റ്,സ്റ്റീല്‍,ഗ്ലാസ് എന്നിവ മാത്രമുപയോഗിച്ചാണു ഇതിന്റെ നിര്‍മ്മിതി.

   പെട്രോണാസ് ടവര്‍-ഒരു വിദൂര ദൃശ്യം

  കഴിഞ്ഞ തവണ ഇവിടെ വന്നപ്പോള്‍ നാല്പത്തിഒന്നാം നിലയിലുള്ള സ്കൈ ബ്രിഡ്ജില്‍ കയറാന്‍ പരിപാടി ഇട്ടെങ്കിലും റ്റിക്കറ്റ് ലഭിക്കാത്തതിനാല്‍ സംഗതി നടന്നില്ല.വിഖ്യാതനായ അര്‍ജന്റീനന്‍ ആര്‍ക്കിടെക്ക്റ്റ് സീസര്‍പെല്ലി രൂപകല്പന ചെയ്ത ഈ അത്ഭുത നിര്‍മ്മിതി കാണുവാനായി ഇപ്രാവശ്യം എങ്ങനെയെങ്കിലും കയറിപ്പറ്റണം എന്നുറപ്പിച്ചു. പ്രവേശനം സൌജന്യമാണെങ്കിലും, ഒരു ദിവസം 1700 റ്റിക്കറ്റ് മാത്രമേ ഇഷ്യൂ ചെയ്യുകയുള്ളൂവത്രെ, രാവിലെ 5.30 മണിക്കു വന്ന് കുത്തിപ്പിടിച്ച് ക്യൂ നിന്നെങ്കില്‍ മാത്രമെ ലഭിക്കാന്‍ സാധ്യതയുള്ളൂ,അതും ഭാഗ്യമുണ്ടെങ്കില്‍ മാത്രം.

രാത്രിയിലെ കാഴ്ച

ആകാശപാലം

കെ എല്‍ സി സി മോള്‍

മലയാളിയുടെ വക്രബുദ്ധി വര്‍ക്ക് ഔട്ട് ചെയ്ത്,ഏജന്റിനെ ചാക്കിട്ട് റ്റിക്കറ്റ് സംഘടിപ്പിച്ചു.10 റിങ്ഗിറ്റ് കൊടുത്താല്‍ ടിക്കറ്റ് തനിയേ വരും. 11 മണിക്കാണു സമയം കിട്ടിയത്.പത്ത് മണിയായപ്പോള്‍ അവിടെ എത്തി,11മണി വരെ താഴെ നിലകളിലുള്ള സൂര്യ കെ എല്‍ സി സി മോളില്‍ കറങ്ങി നടന്നു.മിക്കാവാറും കടകള്‍ എല്ലാം ഹൈ-എന്‍ഡ് ബ്രാന്‍ഡ് ഷോപ്പുകള്‍ ,പുറമെ നിന്ന് കാണുവാന്‍ അതിമനോഹരം.പക്ഷെ ദുബായ് മോളുകളുടെ അത്ര വലിപ്പമൊന്നുമില്ല.അവിടെയും ഇന്ത്യന്‍ സാന്നിധ്യം കാണാം.

സന്ദര്‍ശകര്‍ക്കു 41ആം നിലവരെ പോകുവാനെ അനുവാദമുള്ളൂ.അവിടെയാണു സ്കൈ ബ്രിഡ്ജ്

ലിഫ്റ്റിലേക്കുള്ള പ്രവേശന കവാടം
11 മണിക്ക് തന്നെ ഗേറ്റില്‍ എത്തിയപ്പോള്‍ അവിടെ സാമാന്യം നല്ല ക്യൂ ആയിക്കഴിഞ്ഞു.കുറച്ച് പേരെ വീതമാണു കയറ്റി വിടുന്നത്.അകത്ത് കയറിയപ്പോള്‍ ആദ്യം ടവറിന്റെ നിര്‍മ്മാണം പ്രതിപാദിക്കുന്ന ഒരു ടെലി ഫിലിം കാണിക്കുന്നതിനായി നമ്മളെ അതിനകത്തുള്ള ചെറിയ തീയേറ്ററില്‍ കൊണ്ടുപോയിരുത്തി.പ്രദര്‍ശനത്തിനു ശേഷം ശേഷം വീണ്ടു ക്യൂ.അടിമുടി സുരക്ഷാ പരിശോധന.ക്യാമറ ഒഴികെയുള്ള സകല സാമഗ്രികളും നിരോധിച്ചിരിക്കുകയാണു.20 പേരെ വീതം ഹൈസ്പീഡ് ലിഫ്റ്റില്‍ കയറ്റി വിടുന്നു.ഞങ്ങളുടെ ബാഗുകളെല്ലാം ലോക്കറില്‍ ഏല്‍പ്പിച്ച് ലിഫ്റ്റില്‍ കയറി,ദാ പറഞ്ഞ മാത്രക്കുള്ളില്‍ 41ആം നില എത്തിക്കഴിഞ്ഞു.

ആകാശപാലം

പാലത്തില്‍നിന്നുമുള്ള കാഴ്ചകള്‍

നീണ്ട ഇടനാഴിയില്‍ കാഴ്ചക്കാരുടെ തിരക്ക്.വിദേശികളടക്കമുള്ളവര്‍ ഫോട്ടോക്ക് വേണ്ടി തിരക്ക് കൂട്ടുന്നു.ഇവിടെ നിന്നുമുള്ള പുറലോകകാഴ്ചകള്‍ വിസ്മയാവഹമാണു.ഒരു പതിനഞ്ചു മിനിട്ട് അവിടെ ചിലവഴിക്കാം.മലയാളി സന്ദര്‍ശകര്‍ ധാരാളമായി എത്തുന്നുണ്ട്.കുറച്ച് ചിത്രങ്ങളൊക്കെ എടുത്ത് ഞങ്ങളും താഴെയെത്തി.

ഈ അവസരത്തില്‍ മലേഷ്യയിലെ റോഡുകളുടെ നിലവാരത്തെക്കുറിച്ച് പരാമര്‍ശിക്കാതെ വയ്യ എന്നു തോന്നുന്നു.കേരളത്തിന്റെ അതേ കാലാവസ്ഥയും,മഴയും ആണു ഇവിടെയെങ്കിലും, റോഡുകള്‍ ഉന്നതനിലവാരത്തില്‍നിര്‍മ്മിക്കപ്പെട്ടവയാണു.

മലേഷ്യന്‍ റോഡുകള്‍

ടോള്‍ പ്ലാസ
കണ്ണേത്താദൂരത്തോളം നീണ്ട് കിടക്കുന്ന,80-100 മീറ്റര്‍ വീതിയുള്ള റോഡുകള്‍.ഇടക്കിടെ ടോള്‍ബൂത്തുകള്‍.കേരളത്തില്‍ റോഡ്നിര്‍മ്മാണത്തിനു സാങ്കേതികസഹായവുമായി എത്തിയ മലേഷ്യന്‍ കമ്പനിക്കുണ്ടായ അനുഭവം ഞാന്‍ ആലോചിച്ച് പോയി.

ഒരു വെയിറ്റിങ് ഷെഡ്

ഇടുക്കി ജില്ല-കീഴാന്തൂര്‍ ഗ്രാമക്കാഴ്ചകള്‍

2010-06-11T21:59:00.000+05:30

കീഴാന്തൂര്‍ ലക്ഷ്യമാക്കിയായിരുന്നു ഇത്തവണത്തെ യാത്ര. ഇടുക്കി ജില്ലയില്‍ ,മൂന്നാറില്‍ നിന്നും 44 കിമി അകലെയാണ് മറയൂര്‍ എന്ന ചെറുപട്ടണം.മറയൂരും,സമീപ പ്രദേശമായ കാന്തല്ലൂരും ടൂറിസം ഭൂപടത്തില്‍ വളരെ മുന്‍പ് തന്നെ ഇടം നേടിയി രുന്നുവെങ്കിലും, മറയൂരില്‍ നിന്നും 12 കിമി അകലെ, കാന്തല്ലൂര്‍ പോകുന്ന വഴിയില്‍ സ്ഥിതി ചെയ്യുന്ന കീഴാന്തൂര്‍ എന്ന ചെറു ഗ്രാമം അത്ര കണ്ടു ശ്രദ്ധിക്കപ്പെട്ടിട്ടില്ല.സമുദ്ര നിരപ്പില്‍ നിന്നും ഏകദേശം 3500 അടി ഉയരത്തില്‍ സ്ഥിതി ചെയ്യുന്ന ശാന്ത സുന്ദരമായ ഒരു ഭൂ പ്രദേശമാണ് കീഴാന്തൂര്‍.നാലുവശവും മലനിരകളാല്‍ ചുറ്റപ്പെട്ട ഒരിടം.

കീഴാന്തൂര്‍ കാഴ്ചകള്‍

മൂന്നാറില്‍ നിന്നും ഏകദേശം ഒന്നര മണിക്കൂര്‍ യാത്ര ചെയ്‌താല്‍ കീഴാന്തൂരെത്താം. മൂന്നാറില്‍ നിന്നും ഞങ്ങള്‍ പുറപ്പെട്ടത് രാവിലെ ഒന്‍പതു മണിയോടെയായിരുന്നു.ഈ റോഡില്‍, മൂന്നാര്‍ ഡീവൈഎസ്‌പി ഓഫീസ് കഴിഞ്ഞാല്‍ പിന്നെ പ്രകൃതി സുന്ദരമായ പ്രദേശങ്ങളാണ്.ചെറിയ ആര്‍ച് പാലം കടന്നാല്‍ വലതു വശത്ത് പെരിയവരൈ ടീ ഫാക്ടറി .ഫ്രഷ്‌ ടീയുടെ നല്ല മണം.സഹയാത്രികന് ആ മണം അടിച്ചപ്പോഴേ ശര്‍ദ്ദി ക്കാനുള്ള ഒരു "ഇത്".എഞ്ചിനീയറിംഗ് കോളേജ് അധ്യാപകനായ അദ്ദേഹം,ഒരു(ഗ്ലാസ്) റഷ്യന്‍ ഓറഞ്ച് എടുത്തങ്ങു മണപ്പിച്ചു.ശുഭം എന്നൊരു കമന്റും പാസ്സാക്കി,ഉന്മേഷഭ രിതനായി.ആള്‍ മൂഡിലായിക്കഴിഞ്ഞു.(വടി വെട്ടിയിട്ടെ ഉള്ളൂ,അടി തുടങ്ങിയിട്ടില്ല എന്ന് പുള്ളിക്കാരന് അറിയില്ലല്ലോ,നമുക്കല്ലേ അറിയൂ.കാരണം, മൂന്നാര്‍-മറയൂര്‍ റോഡിലൂടെ പോയാല്‍ ഏതു ശര്‍ദ്ദിക്കാത്തവനും ശര്‍ദ്ദിക്കും.പൊടുന്നനെയുള്ള ചെറിയ ചെറിയ വളവുകളും,കാലാവസ്ഥ വ്യതിയാനവും ആണ് ഇതിനു ഹേതു.അധ്യാപകന്റെ കന്നി മറയൂര്‍ യാത്രയുമാണ്!)രാജമലക്കു തിരിയുന്ന ജന്ഗ്ഷനും പിന്നിട്ട വാഹനം, മുന്നോട്ട് കുതിക്കാന്‍ കഴിയാതെ ബ്ലോക്കില്‍ കുരുങ്ങിക്കഴിഞ്ഞു.ഈയിടെയായി ഇവിടെ ഇത് പതിവാണ്,യാതൊരു നിയന്ത്രണവുമില്ലാതെ റോഡിനിരുവശവും പാര്‍ക്ക് ചെയ്യുന്ന വാഹനങ്ങള്‍.ചിലപ്പോള്‍ മണിക്കൂറുകളോളം കിടക്കേണ്ടി വരും.അതുകഴിഞ്ഞപ്പോഴേക്കും,കന്നിമല എസ്റ്റേറ്റ്‌ ആയി.ഇനി കുറയേറെ ദൂരം കയറ്റം മാത്രം.നയമക്കാട് എന്ന ചെറു ടാറ്റാ ഗ്രാമത്തിലൂടെ കാര്‍ വളഞ്ഞു,പുളഞ്ഞു കയറുന്നു.

നയമക്കാട്

നയമക്കാട് ടോപ്‌.

ആനമുടി

നയമക്കാട് ടോപ്‌, ഈ റോഡിലെ ഏറ്റവും ഉയര്‍ന്ന പ്രദേശമാണ്,6000 അടി ഉയരം.നല്ല കാറ്റും ,ചുളു ചുളെ കുത്തുന്ന തണുപ്പും. മൂന്നാര്‍ ടൌണ്‍ 5000 അടി ഉയരത്തില്‍ ആണല്ലോ. ഇതിനു താഴെയുള്ള s ആകൃതിയിലുള്ള വളവു കുപ്രസിദ്ധമാണ്. എന്തിനെന്നോ?രാത്രി മിക്കവാറും ഇവിടെ ഒരു ഒറ്റയാന്‍ ഉണ്ടാവും.കനത്ത മൂടല്‍ മഞ്ഞും.വളരെ സൂക്ഷിച്ചു വേണം രാത്രി ഇത് വഴി വരാന്‍. !! രണ്ടു മൂന്നു തവണ ഞാന്‍ ഇവന്റെ മുന്നില്‍ പെട്ട് പോയിട്ടുണ്ട്.അപ്പോഴൊക്കെ ഒരുവിധം രക്ഷപെട്ടു തടി തപ്പി. ഇനി ഏതാണ്ട് മറയൂര്‍ വരെ ഇറക്കമാണ്.തലയാര്‍ എത്തുമ്പോഴേക്കും സഹയാത്രികന്‍ പണി തുടങ്ങി.(അഥവാ പണി കിട്ടി!)രാവിലത്തെ അപ്പം- മുട്ട,റഷ്യന്‍ ഓറഞ്ച് വെള്ളം ഇവയെല്ലാം പച്ചപ്പുല്ലില്‍ സ്ഥാനം പിടിച്ചു കഴിഞ്ഞു.അവശനായി ആള്‍ ഉറക്കവും പിടിച്ചു.തലയാര്‍,ചട്ട മൂന്നാര്‍ ചെക്ക്പോസ്റ്റ് ഇവ പിന്നിട്ടു കാര്‍ മറയൂരിന്റെ പ്രവേശന കവാടമായ പള്ളനാട് എത്തി.റോഡിന്‍റെ ഇരു വശത്തും കൂറ്റന്‍ ഈട്ടി മരങ്ങള്‍.ചന്ദന മരങ്ങളും ഇവിടം മുതല്‍ കണ്ടു തുടങ്ങുന്നു.പണ്ടൊക്കെ ഈ വഴി വരുമ്പോള്‍ ചന്ദനമരത്തിന്റെ വേര് ചുരണ്ടി മണക്കുന്നതു പതിവായിരുന്നു.(ഇപ്പോള്‍ മണക്കാന്‍ പോയാല്‍ വിവരമറിയും!!).ചന്ദനം മണത്തിട്ടോ ,അതോ ചന്ദനക്കാറ്റേറ്റിട്ടോ അതല്ല മറയൂര്‍ ചന്ദനയുടെ(!!) സാമീപ്യം മനസ്സിലാക്കിയിട്ടോ എന്തോ നമ്മുടെ അധ്യാപക സുഹൃത്ത്‌ ഉഷാറിലായി.മറയൂര്‍ ടൌ ണിനു മുന്‍പുള്ള കാട്ടില്‍ കാട്ടുപോത്തുകള്‍ കൂട്ടമായി മേയുന്നു.ഇതിനോട് ചേര്‍ന്നു മനുഷ്യ വാസമുള്ള നിരവധി വീടുകള്‍ ഉണ്ട് എന്നതാണു രസകരം. കമ്പിവേലിക്കുള്ളില്‍ മാനുകളെയും കാണാം.

മറയൂര്‍ ഇപ്പോള്‍ സാമാന്യം ഭേദപ്പെട്ട ടൌണ്‍ ആയി മാറിയിട്ടുണ്ട്.നല്ല ഭക്ഷണം ലഭിക്കുന്ന ഹോട്ടലുകളും ഇവിടെ ഉണ്ട്.നല്ല നാടന്‍ പഴങ്ങള്‍ ലഭിക്കുന്ന ചെറു കടകള്‍ നിരവധിയുണ്ട്.നാട്ടില്‍ അധികമില്ലാത്ത, നല്ല മധുരമുള്ള നാടന്‍ പാഷന്‍ ഫ്രൂട്ട് 2 കിലോ വാങ്ങി.വിഖ്യാതമായ മറയൂര്‍ ശര്‍ക്കര ഇവിടെ സുലഭമായി ലഭിക്കും.ശര്‍ക്കരയും,കുറച്ച് സ്നാക്ക്സും വാങ്ങി തിരികെ വാഹനത്തില്‍ കയറി.
മറയൂര്‍- ഉഡുമല്‍ പെട്ട് റോഡില്‍, ചന്ദന ഹോട്ടല്‍ കഴിഞ്ഞ്, ജംഗ്ഷനില്‍ നിന്നും വലത്തോട്ടു തിരിഞ്ഞാല്‍ കാന്തല്ലൂര്‍ റോഡായി.നിരപ്പായ റോഡിനിരുവശവും വിശാലമായ കരിമ്പിന്‍ പാടങ്ങളാണ്.ഒരു നല്ല ഇറക്കം പിന്നിട്ട് ,ചെറിയൊരു പുഴയും കടന്നാല്‍ കോവില്‍ക്കടവ് എന്ന തീരെ ചെറിയ പട്ടണ(?)മായി.കാന്തല്ലൂര്‍ മലനിരകളില്‍ ഉല്പാദിക്കപ്പെടുന്ന പുല്‍തൈലത്തിന്റെ ഒരു പ്രധാന വിപണന കേന്ദ്രമാണിവിടം.പരിചയമുള്ള കടയില്‍ നിന്നും അല്പം പുല്‍ തൈലം സംഘടിപ്പിച്ചു,സുഹൃത്തിനു കൊടുത്തു.അദ്ദേഹം പുല്‍ തൈലം മണത്തും, അതോടൊപ്പം റഷ്യന്‍ ഓറഞ്ച് വെള്ളം അകത്തേക്ക് തട്ടിയും,പാഷന്‍ ഫ്രൂട്ട് അപ്പാടെ കഴിച്ചും ഉന്മേഷം വീണ്ടെടുത്തു. കോവില്‍ക്കടവ് പിന്നിട്ടാല്‍ വലിയ കയറ്റം തുടങ്ങുകയായി.ഹെയര്‍ പിന്‍ വളവുകള്‍ താണ്ടി ചന്ദന മരങ്ങളുടേയും, കരിമ്പിന്‍ പാടങ്ങളുടെയും, നടുവിലൂടെയുള്ള യാത്ര അതീവ ഹൃദ്യമാണ്.മറയൂര്‍ പ്രദേശങ്ങളില്‍ ഉത്പാദിക്കപ്പെടുന്ന ശര്‍ക്കര ഉയര്‍ന്ന ഗുണ നിലവാരമുള്ളതാണല്ലോ.

ശര്‍ക്കര നിര്‍മ്മാണത്തിനുള്ള ചൂള
റോഡിന്‍റെ ഒരു വശം വലിയ പാറക്കെട്ടാണ് .മുന്തിയ ഇനം ഗ്രാനൈറ്റ് ആണ് ഇവയെന്ന് ഇവിടെ നടത്തിയ പഠനങ്ങളില്‍ തെളിഞ്ഞിട്ടുണ്ട്.ഇടക്കിടെ പ്രത്യക്ഷമാകുന്ന നെല്‍വയലുകളും,അതിനു അരികു പറ്റി, ഇട തൂര്‍ന്നു നില്‍ക്കുന്ന യൂക്കാലി മരങ്ങളും.

ദൂരെ അതിരിടുന്ന പശ്ചിമഘട്ട മലനിരകള്‍

അടുത്തയിടെ ഇറങ്ങിയ മിക്കവാറും സത്യന്‍ അന്തിക്കാട്‌ ചിത്രങ്ങളില്‍ കീഴാന്തൂരിന്റെ പ്രകൃതി ഭംഗി ചിത്രീകരിക്കപ്പെട്ടിട്ടുണ്ട്.ഭ്രമരവും ഇവിടെ ചിത്രീകരിക്കപ്പെട്ടതാണ്. കീഴാന്തൂര്‍ വില്ലേജ് ഓഫീസും ഒട്ടനവധി ചിത്രങ്ങളില്‍ പ്രത്യക്ഷപ്പെട്ടിട്ടുണ്ട്.

വില്ലേജ് ഓഫീസ്

കൃഷിയിടങ്ങള്‍
തികച്ചും പ്രകൃതി രമണീയമായ ഒരു ചെരുകുന്നിന്‍ മുകളില്‍ ആണ് ഈ കെട്ടിടം സ്ഥിതി ചെയ്യുന്നത്. വിശാലമായ നിരപ്പില്‍,ഏകാന്തമായി നിലകൊള്ളുന്ന ഈ കെട്ടിടത്തിനു നാല് വശവും താഴ്ന്ന സമനിലങ്ങളും,അതിനു അതിരിടുന്ന മലനിരകളും.

വളരെ അദ്ധ്വാന ശീലരായ ഒരു ജനവിഭാഗമാണ് ,തമിള്‍ ഭൂരിപക്ഷ മേഖലയായ ഇവിടെ ജീവിക്കുന്നത്.കാരറ്റ്,കാബേജ്,വെളുത്തുള്ളി,ബീന്‍സ് എന്നിവയാണ് മുഖ്യമായും കൃഷി ചെയ്യുന്നത്.

കൃഷിയിടങ്ങള്‍

മുന്തിരി

പീച്ചസ് പഴം

ട്രീ റ്റൊമാറ്റോ

വില്ലേജ് ഓഫീസിനു മുന്‍വശം റോഡരുകില്‍,ഒരു വീടിനു മുന്‍പില്‍ അപ്പിള്‍ മരമുണ്ട്.ഇപ്പോള്‍ സീസണ്‍ അല്ലാത്തതിനാല്‍ അതില്‍ കായ്‌ ഇല്ല.അപ്പിള്‍  മരം കണ്ടപ്പോള്‍ സുഹൃത്തിനു അത്ഭുതം.ആപ്പിള്‍ മരം തന്നെയാണോ ഇതെന്നൊരു സംശയവും. ( ഓ:ടോ: തിരികെ വരുന്ന വഴി മൂന്നാര്‍ ടൌണില്‍ നിന്നും ആപ്പിളിന്റെ 3 പായ്ക്കറ്റ് തൈ വാങ്ങി,സ്വന്തം വീടുപറമ്പില്‍ നട്ടു,2 ആഴ്ചക്കുള്ളില്‍ ഉണങ്ങിപ്പോയപ്പോഴേ അദ്ദേഹത്തിന് സമാധാനമായുള്ളൂ. )
മിക്കവാറും എല്ലാവിധ പഴവര്‍ഗങ്ങളും നന്നായി  ഉണ്ടാകുന്ന ഒരു ഭൂ വിഭാഗമാണ്‌ കീഴാന്തൂര്‍ പ്രദേശം.ആപ്പിള്‍,പ്ലംസ്,പീച്ച്ചസ് എന്നിവ ഇവിടെ സമൃദ്ധമായി ഉണ്ടാകുന്നു. പരിചയക്കാരനായ പഴനിസ്വാമിയുടെ വീട്ടില്‍ നിന്നും കുറച്ചു പീച്ചസ് പഴങ്ങളും,മാതള നാരങ്ങയും,ട്രീ ടോമാടോയുമൊക്കെ സംഘടിപ്പിച്ചു ,കാറിനകത്താക്കി.അതിനു വില വാങ്ങാന്‍ കൂട്ടാക്കിയില്ല എന്ന് മാത്രമല്ല ,അന്നവിടെ തങ്ങിയിട്ടു പോകാം എന്ന പ്രലോഭനകരമായ നിര്‍ദ്ദേശവും പഴനി സ്വാമി മുന്നോട്ടു വച്ചു.സമയക്കുറവുമൂലം ആ ക്ഷണം സ്വീകരിക്കാന്‍ കഴിയാതെ തിരികെ യാത്രയായി.കീഴാന്തൂരിന്റെ ഏറ്റവും ആകര്‍ഷകഘടകമായ  സുഖശീതളമായ കാലാവസ്ഥ ആസ്വദിച്ചു,ഒരു ദിവസം കഴിയാനുള്ള അവസരം നഷ്ടമായ വിഷമത്തില്‍ , ഇളംതണുപ്പിലൂടെ, ഞങ്ങള്‍ മലയിറങ്ങി.

ലങ്കാവിയിലൂടെ ഒരു യാത്ര

2010-05-09T23:02:00.001+05:30

                                                              ഭാഗം 2

                                                   (ഒന്നാം ഭാഗം ഇവിടെ)

പിറ്റേന്ന് അതിരാവില സൂര്യോദയം കാണുന്നതിനായി,തയ്യാറായി.(ബാല്‍ക്കണിയിലേക്ക് ഇറങ്ങി നിന്നതാണീ തയ്യാറെ ടുപ്പെന്നുദ്ദേശിച്ചത്).സൂര്യന്‍ പതുക്കെ ഉദിച്ച് വരുന്നത് മനോഹരമായ ഒരു കാഴ്ച തന്നെ.

സൂര്യോദയം

പ്രഭാത ഭക്ഷണം കഴിയുമ്പോഴേക്കും അഹമദ് വാഹനവുമായെത്തി.അദ്ദേഹം രാവിലെ തന്നെ ധൃതിയിലാണു.കാണേണ്ട കാഴ്ചകള്‍ അനവധിയുണ്ടെന്നും,സമയം വളരെ പരിമിതമാണെന്നും ആള്‍ സൂചിപ്പിച്ചു. ആദ്യം,ലങ്കാവി അണ്ടര്‍ വാട്ടര്‍ വേള്‍ഡിലേക്കാണു പോയത്.വിവിധ മത്സ്യങ്ങളെയും,മറ്റ് സമുദ്ര ജീവികളേയും ഇവിടെ പരിപാലിച്ച് പോരുന്നു.ശുദ്ധജല മത്സ്യങ്ങളാണു ആദ്യം.ഇപ്പോള്‍,നമ്മുടെ നട്ടില്‍ ഭാഗ്യസൂചകമായി കണക്കാക്കാപ്പെടുന്ന അരോനാ എന്ന മത്സ്യം,ഇവിടെ ധാരാളം ഉണ്ട്.ജെല്ലി ഫിഷ്,സീ ഹോഴ്സ് പെന്‍ഗ്വിനുകള്‍അങ്ങനെ,അങ്ങനെ നിരവധി ഇനങ്ങള്‍.നല്ല ഒരു സൂവനീര്‍ ഷോപ്പും ഇവിടെ ഉണ്ട്.ഒരു വശം ഡ്യൂട്ടി ഫ്രീ ഷോപ്പും.

അണ്ടര്‍ വാട്ടര്‍ വേള്‍ഡ്

അവിടത്തെ കാഴ്ചകള്‍ക്കു ശേഷം,ഓറിയന്റല്‍ വില്ലേജ് കാണുവാന്‍ പുറപ്പെട്ടു.ചെറിയ മുക്കുവ ഗ്രാമങ്ങളിലൂടെയാണു റോഡ് കടന്നു പോകുന്നത്.നിരനിരയായിട്ടിരിക്കുന്ന ഫിഷിങ്ങ് ബോട്ടുകള്‍.കുറച്ച് കഴിഞപ്പോള്‍ യാത്ര മലമ്പ്രദേശത്തു കൂടിയായി.ഇരുവശത്തും നമ്മുടെ നേര്യമംഗലം പ്രദേശത്തെ അനുസ്മരിപ്പിക്കുന്ന മലനിരകള്‍.സമാന ഭൂപ്രകൃതിയും.അന്തരീക്ഷ താപനില മാത്രം കൂടുതലാണു.ജനുവരി അവസാനം,ഏകദേശം 38 ഡിഗ്രീ സെന്റിഗ്രേഡ്.
ലങ്കാവിയിലെ തനത് ഗ്രാമീണകാഴ്ചകള്‍ കാണാനാകും എന്ന പ്രതീക്ഷയിലാണു ഓറിയന്റല്‍ വില്ലേജിലെത്തിയത്.

യുനെസ്കൊ ലങ്കാവിയെ ജിയൊ പാര്‍ക്കായി പ്രഖ്യാപിച്ചിരിക്കുകയാണു.മറൈന്‍ ജിയോ പാര്‍ക്കിന്റെ സ്റ്റാളിനകത്ത് 55 കോടിയും 100 കോടിയും വര്‍ഷങ്ങള്‍ പഴക്കം തിട്ടപ്പെടുത്തിയിട്ടുള്ള സാന്‍ഡ് സ്റ്റോണുകള്‍ കാണാനാകും. ,സൂവനീര്‍ ഷോപ്പുകള്‍ ആണു അവിടെ പ്രധാനമായും ഉണ്ടായിരുന്നത്.ഭക്ഷണശാലകളും,യഥേഷ്ഠം ഉണ്ട്.ഒരു ചെറിയ തടാകത്തിനു കുറുകെ വലിച്ച് കെട്ടിയിരിക്കുന്ന തൂക്ക് പാലം കടന്നു വേണം,അവിടെ എത്തിച്ചേരുവാന്‍.

ഓറിയന്റല്‍ വില്ലേജ്

ലങ്കാവിയിലെ പ്രധാന ആകര്‍ഷണമായ കേബിള്‍കാറില്‍,ഗനംഗ് മാറ്റ്സിന്‍സാന്‍ പര്‍വ്വതത്തിലേക്കുള്ള യാത്ര, ഇവിടെ നിന്നുമാണു തുടങ്ങുന്നത്.ഏകദേശം 2275 അടി ഉയരത്തിലേക്കാണു കേബിള്‍കാര്‍ സഞ്ചാരികളെ എത്തിക്കുന്നത്.താഴേക്കു വരുന്ന കാര്‍,നമ്മള്‍ കയറേണ്ട സ്റ്റേഷനില്‍ പൂര്‍ണ്ണമായും നിര്‍ത്താത്തതിനാല്‍,പതുക്കെ ചലിച്ചുകൊണ്ടിരിക്കുന്ന കാറിലേക്കു വേണം കയറുവാന്‍.

കേബിള്‍കാര്‍ സ്റ്റേഷന്‍

ഉരുക്ക് വടങ്ങളില്‍ തൂക്കിയിട്ടിരിക്കുന്ന ചെറുകാറിലെ സവാരി ,ആദ്യം അല്പം ഭീതി ഉളവാക്കും.പക്ഷെ,ഇരുവശങ്ങളിലേയും,വര്‍ണ്ണനാതീതമായ കാഴ്ചകള്‍ കണ്ടു തുടങ്ങുമ്പോള്‍ ഭയമെല്ലാം പമ്പ കടക്കും.താഴെ, മനോഹരമായ ആന്‍ഡമാന്‍ കടലും,കുതിച്ചു പായുന്ന സ്പീഡ് ബോട്ടുകളുമെല്ലാം,ചിതറി കിടക്കുന്ന ദ്വീപസമൂഹങ്ങളും എല്ലാം കാണാം.

ഈ മലനിരകളുടെ മുകളിലാണു,രണ്ട് പര്‍വ്വതാഗ്രങ്ങളെ തമ്മില്‍ ബന്ധിപ്പിക്കുന്ന ആകാശ പാലം.400 അടി നീളത്തില്‍,മഴവില്ലിന്റെ ആകൃതിയിലുള്ള ഈ പാലം ഒരു എഞ്ജിനീയറിംഗ് വിസ്മയമാണു.തൊട്ടു താഴെയുള്ള വലിയ‍പാറയില്‍ കുത്തി നിര്‍ത്തിയിരിക്കുന്ന ഒരു ഉരുക്കു തൂണില്‍(വെര്‍ടിക്കല്‍ കാന്റിലിവര്‍) ഘടിപ്പിച്ചിരിക്കുന്ന 10 കേബിളുകളില്‍ തൂക്കിയിട്ടിരിക്കുകയാണീ ആകാശവിസ്മയം.

ആറടിവീതിയുള്ളഈപാലത്തിലൂടെ,2275അടിഉയരത്തില് ‍ഇരുവശത്തുമുള്ളകാഴ്ചകള്‍ ആസ്വദിച്ചുള്ള സഞ്ചാരം തികച്ചും അവിസ്മരണീയമായ ഒരു അനുഭവമാണു.സുരക്ഷക്കായി,വശങ്ങളില്‍ കൈവരികളുണ്ടെങ്കിലും,ചെറിയ ചാഞ്ചാട്ടം നമ്മളില്‍ തെല്ല് ഭീതിയുണര്‍ത്തും.എറ്റവും മുകളില്‍ ഭക്ഷണശാലയുമുണ്ട്.ഞങ്ങള്‍ എത്തിച്ചേര്‍ന്ന സമയത്ത് തമിഴ് നാട്ടുകാരായ ഒട്ടനവധി സഞ്ചാരികളെ കാണുവാന്‍ സാധിച്ചു.
തിരികെ ബേയ്സ് സ്റ്റേഷനിലെത്തി,യാത്ര തുടങ്ങി.റ്റാന്‍ ജങ് റൊ എന്ന ബീച്ചിനോടു ചേര്‍ന്നുള്ള

ചെറിയമലയറെസ്റ്റാറണ്ടില്‍നിന്നും,തനതു മലയശൈലിയിലുള്ള ഭക്ഷണത്തിനുശേഷം,
കണ്ടല്‍കാടുകള്‍ കാണുന്നതിനായി ബോട്ടില്‍ പുറപ്പെട്ടു.നന്നായി സംരക്ഷിച്ചിരിക്കുന്ന ഈ കാടുകള്‍,ലങ്കാവിയെ സുനാമിയില്‍ രക്ഷിച്ചു എന്നു വിശ്വസിക്കപ്പെടുന്നു.ഇതിനോടനുബന്ധിച്ചു ഈഗിള്‍ഫീദിങ് എന്ന ഒരു പരിപാടിയുമുണ്ട്.വെള്ളത്തില്‍ എറിയപ്പെടുന്ന ഇറച്ചികഷണങ്ങള്‍ കാട്ടില്‍ നിന്നും പറന്നെത്തൂന്ന കഴുകന്മാര്‍ കൊത്തിയെടുക്കുന്ന കാഴ്ച ആണു ഇത്.
(മാന്‍ ഗ്രോവ്/കണ്ടല്‍ കാടുകളെക്കുറിച്ചുള്ള കൂടുതല്‍ വിവരണത്തിനും,ചിത്രങ്ങള്‍ക്കും ...ദാ ഇവിടെ)
ഇതിനകത്ത് ഒരു ഫിഷ് ഫാം ഉണ്ട്.സ്റ്റിങ് റേ(തിരണ്ടി) തുടങ്ങി അനേകം മത്സ്യങ്ങളെ അടുത്ത് കാണുവാനും,തീറ്റ നല്‍കുവാനുമുള്ള സൌകര്യം ഇവിടെ ഉണ്ട്.തിരികെയെത്തി യാത്ര തുടര്‍ന്നു.ലങ്കാവിയിലെ പ്രധാന പട്ടണമായ കുവ ആണു അടുത്ത ലക് ഷ്യം.പോകുന്ന വഴിയിലെല്ലാം നല്ല തേക്കിന്‍ തോട്ടങ്ങള്‍ കാണാം.അതിടൊപ്പം മലയ ഗ്രാമങ്ങളും പള്ളികളും,അമ്പലങ്ങളും എല്ലാം ഉണ്ട്.ചെറിയ ഭക്ഷണ ശാലകള്‍എല്ലായിടത്തും ഉണ്ട്.
കുവയിലെ പ്രധാന ആകര്‍ഷണം 12ഏക്കര്‍ വിസ്തൃതിയില്‍ വ്യാപിച്ചു കിടക്കുന്ന ഈഗിള്‍ സ്ക്വയര്‍ ആണ്.൪൦ അടി ഉയരമുള്ള ഒരു കഴുകന്‍റെ പ്രതിമ ഇവിടെ സ്ഥാപിചിരിക്കുന്നു.

കടല്‍ മാര്‍ഗ്ഗം ലങ്ഗ്കാവിയിലേക്ക് വരുന്നവരുടെ എന്‍ട്രി പോയന്‍റ് ആണ് ഇവിടം.അതിനായുള്ള ജെട്ടി പോയന്‍റ് ഇവിടെ നിന്നാല്‍ കാണാനാവും.അതിനോട് കൂടി,ഡ്യൂട്ടി ഫ്രീ മോളും ,സൂവനീര്‍ ഷോപ്പും എല്ലാം ഉണ്ട്.ഏറ്റവുമധികം സഞ്ചാരികളെ കാണുവാന്‍ സാധിക്കുന്ന ഒരു പ്രദേശം കൂടിയാണിവിടം.സഞ്ചാരികളെല്ലാം ഫോട്ടോ സെഷനു വേണ്ടി തിരക്ക് കൂട്ടുന്നു.
സായാന്ഹമായിരിക്കുന്നു.ഇനി ബീച്ചില്‍ ഒരു കുളി ആണ് അജണ്ടയിലുള്ളത്.

അതിനായി ഹോട്ടലിനു സമീപത്തുള്ള ബീച്ചിലെത്തി.പകല്‍ മുഴുവന്‍ അലഞ്ഞതിന്റെ ക്ഷീണം നല്ല ഒരു കുളിയില്‍ അലിഞ്ഞു പോയി.ശാന്തമായ തിരകളുള്ള,ആഴമില്ലാത്ത കടലിലെ കുളി വളരെ സുരക്ഷിതവുമാണ്.സമയം രാത്രി എട്ടു മണി ആയപ്പോള്‍ മാത്രമാണ് മെല്ലെ ഇരുട്ട് പരക്കുവാന്‍ തുടങ്ങുന്നത്.

ബീച്ചിനു തൊട്ടടുത്തുള്ള മലയന്‍ റെസ്റ്റാറന്റില്‍ നിന്നും നല്ല ഒരു ഭകഷണം കഴിഞ്ഞു,അത്യാവശ്യ ഷോപ്പിങ്ങിനായി എല്ലാവരും പുറപ്പെട്ടു.നാളെ രാവിലെ ലന്ങ്കാവിയോട് വിട പറയണം.തിരികെ ഹോട്ടലില്‍ എത്തിചേര്‍ന്നപ്പോള്‍ സമയം വളരെ വൈകിയിരുന്നു.

ഇടുക്കി ജില്ല-അണക്കര & ചെല്ലാര്‍കോവില്‍

2010-04-16T19:36:00.000+05:30

വീണ്ടും ഇടുക്കിയുടെ കാഴ്ചകളിലേക്ക്. യാത്ര,അത് എത്ര തവണ ആയാലും ശരി, നമ്മള്‍ക്ക് പുതുമകള്‍ മാത്രം സമ്മാനിക്കുന്ന ഒരു ഭൂ വിഭാഗമാണ്‌ ഇടുക്കി .പുറം ലോകം ഇനിയും അറിയാത്ത ,കാഴ്ചകളുടെ ഒരു നിധി തന്നെ ഇവിടെ ഒളിഞ്ഞിരിപ്പുണ്ട്.അത്തരം ചില കാഴ്ചകളിലേക്ക്.

അണക്കര ടൌണ്‍

കുമളി-മൂന്നാര്‍ സ്റ്റേറ്റ് ഹൈവേ 19 ല്‍, കുമളിയില്‍ നിന്നും 12 കിമി ദൂരെയായി,സ്ഥിതി ചെയ്യുന്ന ഒരു ചെറു പട്ടണമാണ് അണക്കര.അവിടെ നിന്നും 4 കിമി കിഴക്കുള്ള ചെല്ലാര്‍ കോവില്‍ എന്ന ചെറു ഗ്രാമത്തിലെക്കായിരുന്നു ഇത്തവണത്തെ യാത്ര.കുമളിയില്‍ നിന്നും നല്ല റോഡ്‌ ആയതു കൊണ്ട് 20 മിനിറ്റ് കൊണ്ട് അണക്കരയിലും,അടുത്ത 10 മിനിറ്റില്‍ ചെല്ലാര്‍ കോവിലിലുമെത്താനായി.UNDP പദ്ധതി പ്രകാരമുള്ള, സ്പൈസ് ടൂറിസ്റ്റ് സര്‍ക്യൂടുസ്റ്റേഷന്‍ആയി മാറിയ ഈ ഗ്രാമം അന്താരാഷ്‌ട്ര ടൂറിസം ഭൂപടത്തില്‍സ്ഥാനംപിടിച്ചു കഴിഞ്ഞു.ഏലവുംകുരുമുളകും സമൃദ്ധമായി വിളയുന്ന,മലയോരകര്‍ഷകരുടെ,ഈഗ്രാമംഇനിമുതല്‍ടൂറിസ്റ്റുകള്‍ക്കുംസ്വന്തം.

കുമളി-മൂന്നാര്‍ റോഡ്

ചെല്ലാര്‍ കോവില്‍ വാച്ച് ടവര്‍

ഇളം തണുപ്പുള്ള കാലാവസ്ഥയിലാണ്,ചെല്ലാര്‍കോവിലില്‍ ഞാന്‍ എത്തുന്നത്.നല്ല സുഖപ്രദമായ,.മലിനീകരണം തൊട്ടു തീണ്ടാത്ത അന്തരീക്ഷം.ഏലം മണക്കുന്ന വഴികളിലൂടെയുള്ള,എന്റെ യാത്ര ഏറെ ഹൃദ്യമായിരുന്നു.വനം വകുപ്പിന്റെ ഒരു വാച് ടവറും,ലഘു ഭക്ഷണ ശാലയും ഇവിടെ സ്ഥിതി ചെയ്യുന്നു.ഒരു ചായയും കഴിച്ചു,ഞാന്‍ മെല്ലെ വാച് ടവറിലേക്ക് കയറി. ചെല്ലാര്‍ കോവില്‍ വ്യൂ പോയന്റില്‍ നിന്നും, കിഴക്കന്‍ താഴ്വരയിലെ തമിഴ്നാടിന്റെ സമതലങ്ങളിലെക്കുള്ള കാഴ്ച,അവാച്യമായ അനുഭൂതി പകരുന്ന ഒന്നാണ്. ഇവിടെ നിന്നാല്‍ കമ്പവും,തേനിയും,ഗൂടല്ലൂരുമെല്ലാം വ്യക്തമായി കാണാം.മുല്ലപ്പെരിയാറില്‍ നിന്നും വെള്ളം കൊണ്ടുപോകുന്ന പെന്‍ സ്ടോക്ക് പൈപ്പുകളും,കനാലും,സംഗീത സംവിധായകന്‍ ഇളയ രാജയുടെ ബംഗ്ലാവുമെല്ലാം ഈ ഉയരത്തില്‍നിന്നുള്ള കാഴ്ചകളാണ്. മഴക്കാലത്ത്,വന്യമായി പതിക്കുന്ന
പാണ്ടിക്കുഴി വെള്ള ചാട്ടം വറ്റി വരണ്ടിരിക്കുന്നു. അങ്ങകലെ മംഗളാദേവി മലയിലെ ടവറും കാണാം. ഞാന്‍ എത്തിയ സമയം,താഴ്വരയില്‍ മൂടല്‍ മഞ്ഞു പരന്നിരുന്നത്‌ കൊണ്ട്,കാഴ്ചകള്‍ അത്ര വ്യക്തമായിരുന്നില്ല.

ചെല്ലാര്‍ കോവില്‍ റോഡ്

തമിഴ്നാട് സമതലങ്ങള്‍

.സഞ്ചാരികള്‍ക്ക് താമസത്തിനായി നല്ല രീതിയില്‍ പ്രവര്‍ത്തിക്കുന്ന നിരവധി ഹോം സ്റ്റേ കള്‍ ഈ പ്രദേശത്ത് ലഭ്യമാണ്.അണക്കരയില്‍,വിമാനത്താവളം പ്രഖ്യാപിച്ചിരിക്കുന്ന പശ്ചാത്തലത്തില്‍,നിരവധി പുതിയഹോട്ടലുകളും,നിര്‍മ്മാണമാരംഭിച്ചിട്ടുണ്ട്.ഇടുക്കി ജില്ലയുടെയും,തമിഴ്നാടിന്റെ തെക്ക് കിഴക്കന്‍ പ്രദേശങ്ങളുടെയും, സമഗ്ര ടൂറിസം വികസനത്തിനുതകുന്ന വിമാനത്താവളം സമീപ ഭാവിയില്‍ തന്നെ യാഥാര്‍ത്ഥ്യമാകുമെന്നു പ്രതീക്ഷിക്കപ്പെടുന്നു.പ്രശസ്തമായ മോണ്ട് ഫോര്‍ട്ട്‌ സ്കൂളും ഇവിടെ പ്രവര്‍ത്തിക്കുന്നു.

മോണ്ട് ഫോര്‍ട്ട് സ്കൂള്‍,അണക്കര

നിര്‍ദ്ദിഷ്ട വിമാനത്താവള സൈറ്റ്

അണക്കരക്ക് സമീപത്തായി,മൂന്നാര്‍ റോഡില്‍ തന്നെയുള്ള മറ്റൊരു ചെറു പട്ടണമായ പുറ്റടിയിലെക്കാണു പിന്നീട് ഞാന്‍ എത്തിയത്.ഇവിടെ സ്പൈസസ് ബോര്‍ഡിന്‍റെ കാര്‍ഡമം കോമ്പ്ലെക്സ് ദ്രുതഗതിയില്‍ നിര്‍മ്മാണം പൂര്‍ത്തിയായി വരുന്നു.

കാര്‍ഡമം കോമ്പ്ലെക്സ്

സുഗന്ധ വിളകളുടെ സംസ്കരണവും,ദീര്‍ഘകാല സംരക്ഷണവും എല്ലാം ഇനി ഇവിടെ സാധ്യമാകും.ഈ പ്രദേശത്തിന്റെ കുതിച്ചു ചാട്ടത്തിനു ,കാര്‍ഡമം കോമ്പ്ലെക്സ് കാരണമാകുന്നു.അവിടെയെല്ലാം ഒരു ഓട്ട പ്രദിക്ഷണം നടത്തി,ഞാന്‍ മടക്ക യാത്രക്കൊരുങ്ങി.തിരികെ വണ്ടന്മേട്‌,പുളിയന്മല,ഇടുക്കി,തൊടുപുഴ വഴിയാണ് മടക്കം.വഴി നീളെ,തഴച്ചു വളര്‍ന്നു നില്‍ക്കുന്ന ഏലത്തോട്ടങ്ങള്‍. കാഴ്ചകള്‍ തേടിയെത്തുന്ന നിരവധി വിദേശ സഞ്ചാരികളും,അവരെ തോട്ടം കാണിക്കുവാന്‍ കൊണ്ട് പോകുന്ന കര്‍ഷകരും.

ഏലതോട്ടങ്ങളും,വിദേശ സഞ്ചാരികളും

ഏലച്ചെടിയും,കായ്കളും

ഫാം ടൂറിസം ,ഇടുക്കിയില്‍ പ്രചാരം നേടി വരികയാണ്.ഏലത്തിനു ഉയര്‍ന്ന വില ലഭിക്കുന്നത് മൂലം കര്‍ഷകരും സന്തോഷത്തിലാണ്.അവരുമായി ആ സന്തോഷം പങ്കു വെച്ച് ഞാന്‍ മടങ്ങി.
വാല്‍ക്കഷണം:ഈ സ്റ്റേറ്റ് ഹൈവെയില്‍ മരണം പതിയിരിക്കുന്ന കെണികളും.ഒരു അപായ സൂചനാ ബോര്‍ഡ്‌ പോലുമില്ലാതെ,നടു റോഡില്‍,നല്ല ഇറക്കത്തില്‍, കോണ്ക്രീറ്റ് പാരപ്പറ്റുകള്‍ ഉയര്‍ന്നു നില്‍ക്കുന്നു!!

നടുറോഡിലെ മരണക്കെണി

ഇരുചക്ര വാഹനക്കാര്‍ ജാഗ്രതൈ.അധികൃതര്‍ ഇതൊന്നു നീക്കം ചെയ്തിരുന്നെങ്കില്‍!

ലങ്കാവിയിലൂടെ ഒരു യാത്ര

2010-04-11T11:07:00.001+05:30

ഭാഗം 1
മലേഷ്യയുടെ ഭാഗമായ ലങ്കാവി ദ്വീപുകളിലേക്കുള്ള സഞ്ചാരത്തിന് പദ്ധതി നേരത്തെ തന്നെ തയ്യാറാക്കിയിരുന്നെങ്കിലും,അടുത്തയിടെ മാത്രമാണു അങ്ങോടുള്ള യാത്ര തരപ്പെട്ടത്.
കുലാലംപൂരില്‍ നിന്നും ഏകദേശം ഒരു മണിക്കൂര്‍ നേരത്തെ വിമാന യാത്രക്ക് ശേഷമാണ് ,ഞാനടങ്ങിയ സുഹൃദ്സംഘം ലങ്കാവിയിലെത്തിയതു.ചിലവു കുറഞ്ഞ വിമാന കമ്പനിയായ എയര്‍ ഏഷ്യയിലായിരുന്നു, യാത്ര.ലങ്കാവി എത്താറാകുമ്പോഴേക്കും,താഴെ ഹരിതഭംഗിയാര്‍ന്ന മലനിരകളും,അതിനോട് ചേര്‍ന്നു കിടക്കുന്ന മനോഹരമായ ബീച്ചുകളും കണ്ടു തുടങ്ങി.കടലിനു നടുവിലൂടെയുള്ള നീളമേറിയ ഒരു പാലവും വിമാനത്തില്‍ നിന്നു കാണാം.

ലങ്കാവി വിമാനത്താവളം

ഒരു ചെറിയ, അന്താരാഷ്ട്ര വിമാനത്താവളമാണു, ലങ്കാവി.ഉച്ചക്കു,1.30 മണിയോടെയാണ് ഞങ്ങള്‍ ഇവിടെ എത്തിച്ചേര്‍ന്നതു.വിമാനത്താവളത്തില്‍ കാര്യമായ നിയന്ത്രണങ്ങള്‍ ഒന്നുമില്ല.ടാര്‍ മാര്‍ക്കില്‍‍ നിന്നു ഫോട്ടോ എടുക്കുക വരെയാകാം.മനോഹരമായ പ്രകൃതിയുടെ പശ്ചാത്തലം കൂടിയായപ്പോള്‍, ഫോട്ടോഗ്രാഫി മത്സരം തന്നെ അവിടെ അരങ്ങേറി.

ലങ്കാവി വിമാനത്താവളം

വിശാലമായ അറൈവല്‍ ഹോളില്‍ , ടൂര്‍ ഓപറേറ്റര്‍മാരുടെ പരസ്യങ്ങള്‍ കാണാം.ചെറിയ ഗ്രൂപ്പുകള്‍ക്കെല്ലാം സൌകര്യം റെന്റ് എ കാറുകള്‍ ആണു.അതിന്റെ ദിവസവാടകഎഴുതിയ ബോര്‍ഡുകളും ഉണ്ട്.അകത്തു നിരനിരയായി,സൂവനീര്‍ ഷോപ്പുകള്‍.എല്ലാ സാധനങ്ങള്‍ക്കും പൊള്ളുന്ന വിലയാണെന്നു മാത്രം.വലിയ തിരക്കൊന്നുമില്ലാത്തതിനാല്‍ ബാഗ്ഗേജുകളൊക്കെ വേഗം ലഭിച്ചു.വന്നിറങ്ങിയവരില്‍,യൂറോപ്യന്‍ സഞ്ചാരികള്‍ ആണു ഏറെയും.

വിമാനത്താവളം അറൈവല്‍ ഹോള്‍

ലങ്കാവി ഭൂപടം

വിമാനത്താവളത്തിലെ കാഴ്ചകള്‍

ലങ്കാവിയിലെ ടൂര്‍ കോര്‍ഡിനേറ്റര്‍ അഹമ്മെദ് ഞങ്ങളേയും പ്രതീക്ഷിച്ചു നില്‍ക്കുന്നു.

അള്‍‍ജീരിയക്കാരനായ ഗൈഡ് അഹമ്മെദിന്റെ കൂടെ പുറത്തിറങ്ങി.അള്‍ജീരിയയിലെ ആഭ്യന്തര പ്രശ്നങ്ങളെക്കുറിച്ചു ചോദിച്ചപ്പോള്‍ അയാള്‍ക്കു അത്‍ഭുതം!കേരളീയരുടെ രാഷ്ട്രീയ പ്രബുദ്ധതയെക്കുറിച്ച് ,ഹര്‍ത്താല്‍ -ബന്ദ് വികസന സംസ്കാരത്തെക്കുറിച്ച് പാവം അഹമ്മെദിനെന്തറിയാം!വിവാദങ്ങളുടെ സൃഷ്ട്ടാക്കള്‍ ആയ രാഷ്ട്രീയ-ചാനല്‍ കൂട്ടുകെട്ടിനെക്കുറിച്ചെന്തറിയാം?

നല്ല വൃത്തിയും,വെടിപ്പുമുള്ള റോഡുകള്‍.പോകുന്ന വഴിയിലെല്ലാം,കേരളീയ കാഴ്ചകള്‍ തന്നെ.തെങ്ങും,കശുമാവും,നെല്‍ വയലും,നമ്മുടെ നാട്ടിലെ വട്ട എന്ന പാഴ് മരവുമെല്ലാം എവിടെയും കാണാം.തേക്കും നന്നായി വളര്‍ന്നു നില്‍ക്കുന്നു.

ചെറിയ ഗ്രാമങ്ങളിലൂടെയാണു റോഡുകള്‍ പോകുന്നതു.കടലോര മുക്കുവ ഗ്രാമങ്ങളാണധികവും.മരം കൊണ്ട് നിര്‍മ്മിച്ചിട്ടുള്ള വീടുകളുടെ മുറ്റത്തു മാവും,തെങ്ങുമെല്ലാം വളര്‍ന്നു നില്‍ക്കുന്നത് കാണാം.ലങ്കാവിയിലെ ജനസംഖ്യയില്‍ കൂടുതലും,മലയാക്കാരും,ചൈനാക്കാരുമാണു.വളരെ സൌഹാര്‍‍ദ്ദപൂര്‍വ്വം പെരുമാറുന്ന ഒരു ജനവിഭാഗമാണു ഇവിടെയുള്ളത്.ചോറും,മത്സ്യവും എല്ലാമാണു ഇവരുടെ മുഖ്യ ഭക്ഷണം.പൊതു മേഖലയില്‍,ട്രാന്‍‍സ്പോര്‍ട്ട് സിസ്റ്റം വളരെക്കുറവാണെന്നാണു എനിക്ക് മനസ്സിലാക്കാന്‍ സാധിച്ചത്.ടാക്സികളെയും,ബൈക്കുകളെയുമാണു സാധാരണക്കാര്‍ കൂടുതലായും ആശ്രയിക്കുന്നത്.

ലങ്കാവി വഴിയോര കാഴ്ചകള്‍

‍

കൌതുകകരമായ മറ്റൊരു കാര്യം പൊകുന്ന വഴി നിറയെ റിസോര്‍ട്ടുകള്‍ ആണെന്നുള്ളതാണു.വീടുകളേക്കാള്‍ കൂടുതല്‍ റിസോര്‍ട്ടുകളാണിവിടെ എന്നു തോന്നുന്നു.എന്നാല്‍ ഹൈ റൈസ് ബില്‍ഡിംഗുകള്‍ വളരെ കുറവാണു.ഒറ്റ നിലയില്‍, മനോഹരമായി പണിത് ,കടലിനോടു ചേര്‍ന്നുകിടക്കുന്നവയാണധികവും.ഏതു ബഡ് ജറ്റിനുമിണങ്ങുന്ന,അനവധി റിസോര്‍ട്ടുകള്‍ ലങ്കാവിയിലുണ്ട്.

മറ്റേതൊരു നാടിനേയുമ്പോലെ,ലങ്കാവിയുടെ ചരിത്രവും,ഐതിഹ്യങ്ങളുമായി കെട്ട്പിണഞ്ഞ് കിടക്കുന്നു.ഇവിടെ വന്നിറങ്ങുന്ന ഏതൊരു സഞ്ചാരിയും ആദ്യം കേള്‍ക്കുന്നത്,മസൂരി എന്നൊരു വനിതയുടെ കഥയാണു.എ ഡി 1819ഇല്‍ ജീവിച്ചിരുന്ന ഒരു വീട്ടമ്മയായ മസൂരി എന്ന നിരപരാധിയായ സ്ത്രീയെ,അവിഹിത ബന്ധം ആരോപിചു വധിച്ചുവെന്നും,അതിനെ തുടര്‍ന്നു അടുത്ത ഏഴു തലമുറയ്ക്കു, ലങ്കാവിയില്‍ ,ശാന്തിയും സമാധാനവും ശ്രേയസ്സും ഉണ്ടാകില്ല എന്ന് അവര്‍ ശപിച്ചു എന്നും ആണു ഐതിഹ്യം.വാസ്തവം എന്തായാലും ഇരുപതാം നൂറ്റാണ്ടിനു ശേഷമാണു ഇവിടെ ശാന്തിയും,സമാധാനവും കൈവന്നതെന്നു നാട്ടുകാര്‍ പറയുന്നു.

ലങ്കാവി റിസോര്‍ട്ടുകള്‍

പന്റൈ സെനാങ് ടൌണ്‍ കഴിഞ്ഞുള്ള അവാന ഹോട്ടലിലാണു ഞങ്ങളുടെ താമസം അറേഞ്ജ് ചെയ്തിട്ടുള്ളത്.ഒരു മല കയറി ഇറങ്ങിയപ്പോഴേക്കും ഹോട്ടലെത്തി.വിശപ്പ് ക്രമാതീതമായതിനാല്‍ ,എല്ലാവരുടേയും ഭാവം ക്ഷീണത്തില്‍ നിന്നും ക്രോധത്തിലേക്ക് മാറിക്കഴിഞ്ഞു.എന്നാല്‍ വിശാലമായ ഹോട്ടലും ,പരിസരവും,പിന്‍ വശത്തുള്ള മനോഹരമായ കടലും മലയും എല്ലാം കണ്ടപ്പോള്‍ എല്ലാവരും ഉന്മേഷഭരിതരായി.സ്വാദിഷ്ട്ട മലേഷ്യന്‍ ഭക്ഷണമായ ഒരു നാസി ലെമാകും (തേങ്ങാപ്പാല്‍ചോറും,ചെറിയ മത്സ്യവും,കൊഞ്ചും ചേര്‍ന്നുള്ള ഒരു ആഹാരം),അതിന്റെ കൂടെ വാന്‍-ടാന്‍ സൂപ്പും ആയപ്പോള്‍, സംഘം വീണ്ടും ലൈവ് ആയി.

ലങ്കാവി അവാന ഹോട്ടല്‍

ഭക്ഷണ ശേഷം,ക്രൂയിസ് ബോട്ടില്‍ കടല്‍ സവാരിക്കിറങ്ങി.തിരകള്‍ വളരെ കുറവായ,ശാന്തമായ ഉള്‍ക്കടലാണിവിടെ.കാറ്റും കൊണ്ടുള്ള യാത്ര വളരെ ആസ്വാദകരം തന്നെ.

ഹോട്ടലിന്റെ ബോട്ടിംഗ് യാര്‍ഡ്

ഹോട്ടലിന്റെ പിന്‍പുറ കാഴ്ചകള്‍

പിങ്ക് ഡോള്‍ഫിനുകളെ കാണാനാകും എന്നു ബോട്ടുകാര്‍ പറഞ്ഞെങ്കിലും,ഞങ്ങളുടെ ഭാഗ്യ ദോഷം കൊണ്ടോ എന്തോ, ഒന്നിനേയും കാണുവാന്‍ സാധിച്ചില്ല.തിരികെ ഹോട്ടലിലെത്തി,ടൌണിലേക്കു വീണ്ടും പുറപ്പെട്ടു.നിര നിരയായി കടകള്‍ റോഡിനിരുവശത്തും.കുലാലമ്പൂരിനെ അപേക്ഷിച്ച് നല്ല വിലക്കുറവാണിവിടെ.കടകളിലെല്ലാം നല്ല തിരക്കുണ്ട്.പാശ്ചാത്യ രാജ്യങ്ങളില്‍ നിന്നുമുള്ള സന്ദര്‍ശകര്‍ കടകളില്‍ നിന്നും കൈ നിറയെ സാധനങ്ങള്‍ വാങ്ങിക്കൂട്ടുന്നു.

ലങ്കാവി ഡ്യൂട്ടി ഫ്രീ ഷോപ്

കൂടാതെ, വളരെ കുറഞ്ഞ വിലയില്‍ ചോക്കളേറ്റുകളും,സ്കോച്ച് വിസ്കിയും മറ്റും ലഭിക്കുന്ന ഡ്യൂട്ടി ഫ്രീ ഷോപ്പും ഇവിടെയുണ്ട്.ലോകത്തിലെ മുന്തിയ ബ്രാന്റുകളുടെ ചോക്കളേറ്റുകളും,മദ്യക്കുപ്പികളും എല്ലാം ഭംഗിയായി നിരത്തി വച്ചിരിക്കുന്നു.അതോടൊപ്പം,ഫോട്ടോഗ്രാഫി നിരോധിച്ചു കൊണ്ടുള്ള ബോര്‍ഡുകളും ഭംഗിയായി പ്രദര്‍ശിപ്പിച്ചിരിക്കുന്നു. ആ വിലക്കുറവു,കുട്ടികളും,മുതിര്‍ന്നവരുമെല്ലാം മുതലെടുത്തു എന്നു പ്രത്യേകം പറയേണ്ടതില്ലല്ലോ.ഇതിനോടു ചേര്‍ന്നാണു ലങ്കാവി അണ്ടര്‍വാട്ടര്‍ വേള്‍ഡ്.ഇതു, നാളെ സന്ദര്‍ശിക്കാനാണു പദ്ധതി.പിന്നീട് രാത്രികാല മാര്‍ക്കറ്റായ തെമോയോങ് പസര്‍ മാലം കാണുവാനായി പുറപ്പെട്ടു.ഉപ്പു തൊട്ടു കര്‍പ്പൂരം വരെ വില്‍ക്കുന്ന ഇവിടെ,വസ്ത്രങ്ങള്‍,വിലകുറഞ്ഞ ഇലക്ട്രോണിക്സ് സാമഗ്രികള്‍,ഭകഷണസാധനങ്ങള്‍,പഴങ്ങള്‍ തുടങ്ങിയവ വിലപേശി വാങ്ങാം.കൂടുതലും സ്വദേശികളായ മലയാക്കാരെയാണു എനിക്കവിടെ കാണാന്‍ കഴിഞ്ഞതു. ചെറിയ ഷോപ്പിങ്ങിനു ശേഷം,റ്റാജ് എന്ന ഇന്ത്യന്‍ ഹോട്ടലില്‍ നിന്നും നല്ലൊരു അത്താഴവും അകത്താക്കിയപ്പോഴേക്കും സമയം പാതിരാവായി. ഹോട്ടലില്‍ മടങ്ങിയെത്തി.
അടുത്ത ദിവസം രാവിലെ മുതല്‍ തന്നെ തിരക്കു പിടിച്ച പരിപാടികള്‍ ആണു ആസൂത്രണം ചെയ്തിരിക്കുന്നതു.അണ്ടര്‍ വാട്ടര്‍ വേള്‍ഡ്,ഓറിയന്റല്‍ വില്ലേജ്,കേബിള്‍ കാര്‍ യാത്ര,മാന്‍ ഗ്രോവ് ഫോറസ്റ്റ് .....ഇവയെല്ലാം ലിസ്റ്റിലുണ്ട്.ക്യാമറ ബാറ്ററി, ചാര്‍ജ് ചെയ്യാനിട്ട്, ഈ ദിവസത്തെ കാഴ്ചകളുടെ ചെറുകുറിപ്പുകളിലൂടെ ഞാന്‍ കണ്ണോടിച്ചു.

തുടരും

ശ്രീലങ്ക-കൊളൊംബൊ-ഭാഗം 2

2010-03-14T14:34:00.004+05:30

           ഒരു ശ്രീലങ്കന്‍ യാത്ര 2 ഭാഗങ്ങളായി പോസ്റ്റ് ചെയ്യാമെന്ന്             കരുതുന്നു

                                               (ഒന്നാം ഭാഗം ഇവിടെ)

                                                     ഭാഗം -2

പിറ്റേന്ന്,അതി രാവിലെ പ്രഭാത സവാരിക്കായി ബീച്ചിലെക്കിറങ്ങി.ബീച്ച് നിറയെ രാവിലെയുള്ള നടത്തക്കാരാണു.നല്ല ഒരു നടപ്പാത ബീച്ചിലുടനീളമുണ്ട്‌.അങ്ങ് ദൂരെ , ഗലദാരി ഹോട്ടല്‍ വരെ അതു നീണ്ടു കിടക്കുന്നു.കടലിലേക്ക്‌ തള്ളി നില്‍ക്കുന്ന ഒരു കടല്‍പ്പാലം,ഇവിടത്തെ ഒരു പ്രധാന ആകര്‍ഷണമാണ്.അതില്‍, ആളുകള്‍ ,യോഗയും വ്യായാമവും,മറ്റു കസര്‍ത്തുകളും നടത്തുന്നു .പൊതുവെ,ഞാന്‍ കണ്ട ശ്രീലങ്കക്കാരെല്ലാം വളരെ സൌഹാര്‍ദ്ദപരമായാണു പെരുമാറിയതു.വളരെ ഉത്സാഹ ഭരിതരായ യുവതലമുറെയെയാണ് എനിക്കെങ്ങും കാണാന്‍ കഴിഞ്ഞത്.

ഗോള്‍ ഫേയ്സ് ഗ്രീന്‍ ബീച്ച്

കടല്‍പ്പാലം

ഇന്ത്യാക്കാരോട് ഒരു പ്രത്യേക സ്നേഹം കലര്‍ന്ന സമീപനം ഉള്ളതായാണു എനിക്കു അനുഭവപ്പെട്ടത്.ദേശീയതക്കു വളരെ പ്രാധാന്യം കൊടുക്കുന്നവരാണവര്‍ എന്നു ബീച്ചില്‍ വച്ചു ഞാന്‍ പരിചയപ്പെട്ട മുഹമ്മദ് എന്ന മധ്യവയസ്കന്‍ പറയുകയുണ്ടായി.തങ്ങളുടെ പാരമ്പര്യത്തില്‍ ഓരോ സിംഹളനും അഭിമാനം കൊള്ളുന്നു.ഇതൊക്കെയാണെങ്കിലും,ഒരു അദൃശ്യ ഭീതി,കൊളൊംബൊ നഗരത്തെയാകെ ചൂഴ്ന്നു നില്‍ക്കുന്നതായി എനിക്കു അനുഭവപ്പെട്ടു എന്നു പറഞ്ഞാല്‍ അത് അസത്യമാവില്ല!

പ്രഭാത ഭക്ഷണത്തിന് ശേഷം വീണ്ടും നഗരത്തിലെക്കിറങ്ങി.നുവാന്‍, വാഹനവുമായി കാത്തു നില്‍ക്കുകയാണ്. നേരെ, BMICH (ബന്ധരനയാകെ ഇന്റര്‍നാഷണല്‍ കോണ്‍ഫറന്‍സ് ഹാള്‍ ) സ്ഥിതി ചെയ്യുന്ന,37 ഏക്കര്‍ വരുന്ന, വിശാലമായ സ്ഥലത്തേക്കാണ്‌ പോയത്.1971 ഇല്‍ നിര്‍മ്മാണം പൂര്‍ത്തിയായ ഈ ഹാള്‍ നഗരത്തിലെ പ്രധാന ആകര്‍ഷണങ്ങളിലൊന്നാണ്.ശ്രീ ലങ്കയോദുള്ള ആദരസൂചകമായി, ചൈന ഗവണ്മെന്റ് നിര്‍മ്മിച്ചു നല്‍കിയതാണീ മന്ദിരം.പല ഇന്റര്‍ നാഷനല്‍ ട്രേഡ് ഷോകളും ഇവിടെ അരങ്ങേറുന്നു.

BMICH

തുടര്‍ന്നു ടൌണ്‍‍ഹാള്‍ സന്ദര്‍ശിച്ചു.1927 ഇല്‍ നിര്‍മ്മിച്ച ഈ കെട്ടിടം വാഷിങ്ങ്ടണിലെ ക്യാപ്പിറ്റോള്‍ മന്ദിരത്തെ അനുസ്മരിപ്പിക്കുന്നതാണ്

അതിനു ശേഷം പഴയ പാര്‍ലമെന്റ് മന്ദിരം കാണാന്‍ പോയി.ഇവിടെയും,ഫോട്ടോഗ്രാഫി നിരോധിച്ചിരിക്കുന്നു.മുന്‍വശത്ത് കൂടി കുറച്ചു ദൂരം നടന്നു.കാറിനകത്തിരുന്നു,ഒന്ന് രണ്ടു ചിത്രങ്ങളെടുത്തു.

പഴയ പാര്‍ലമെന്റ് മന്ദിരം

പഴയ പാര്‍ലമെന്റ് മന്ദിരം -പിന്നില്‍ ഗലദാരി,ഹില്‍ടണ്‍ ഹോട്ടലുകള്‍

‍അതിനു സമീപത്താണ്,ഹില്‍ട്ടന്‍,ഗലദാരി തുടങ്ങിയ ഹോട്ടലുകള്‍ .തുടര്‍ന്ന് കുറച്ചകലെയുള്ള പുതിയ പാര്‍ലമെന്റ് മന്ദിരം കാണുന്നതിനായി യാത്രയായി.കര്‍‍ശനമായ സുരക്ഷാ സംവിധാനങ്ങളാണു അതിന്റെ പരിസരത്തെല്ലാം.ഒരു തടാകത്തിനു നടുവിലായാണു ഈ മന്ദിരം സ്ഥിതി ചെയ്യുന്നത്.
.

പുതിയ പാര്‍ലമെന്റ്

അതിന്റെ ഒരു വശത്തായിട്ടുള്ള മൈതാനത്ത് കുട്ടികള്‍ പല സംഘങ്ങളായി ക്രിക്കറ്റ് കളിക്കുന്നു.

മറ്റ് അന്താരാഷ്ട്ര നഗരങ്ങളുടെ മാത്രുകയില്‍ , കൊളൊംബൊ നഗരം ചുറ്റിക്കാണിക്കുന്ന,, ഹോപ് ഓണ്‍-ഹോപ് ഓഫ് ബസ്സുകള്‍,ഇപ്പോള്‍ ഇവിടെയും സര്‍വീസ്സുകള്‍ നടത്തുന്നുണ്ട്.30 യു എസ് ഡോളറിനു ടിക്കറ്റ് എടുത്താല്‍ ,നഗരം ചുറ്റിക്കാണാം.പ്രമുഖ ഹോട്ടലുകളുടെ സമീപത്തെല്ലാം ,ഈ ബസ്സുകളുടെ പിക്ക് അപ്-ഡ്രോപ് പോയന്റുകളുണ്ട്.
അപ്പോഴേക്കും ഉച്ച ഭക്ഷണത്തിനുള്ള സമയമായി..ശ്രീലങ്കക്കാരുടെ ഭക്ഷണം,എകദേശം കേരളീയ ഭക്ഷണത്തിനു സമാനമാണു.ചോറും,മീന്‍ വിഭവങ്ങളും ആണു പ്രധാന ആഹാരം. crescat boulevard എന്നമനോഹരമായ മാളിലെക്കാണു ,നുവാന്‍ ഞങ്ങളെ കൊണ്ടുപോയത്.അതിനുള്ളിലെ
ഫുഡ്‌കോര്‍ട്ടില്‍ ‍തായ്ലാന്‍ഡ്‌,ജപ്പാന്‍,ഇന്ത്യ,ശ്രീലങ്ക,മലേഷ്യ തുടങ്ങി വിവിധ രാജ്യങ്ങളിലെ ഭക്ഷണം ലഭ്യമാണ്.മോശമല്ലാത്ത വിലനിലവാരവും.വിദേശ മദ്യമടക്കമുള്ള സാധനങ്ങള്‍ ലഭിക്കുന്ന,വലിയൊരു
സൂപ്പര്‍ മാര്‍ക്കറ്റും,ഇതിനോടനുബന്ധിച്ചുണ്ട്.

crescat boulevard

വിലവിവര പട്ടിക

ഇത്രയും എഴുതിയപ്പോഴാണ്,ശ്രീലങ്കയിലെ വില നിലവാരത്തെ കുറിച്ച് എഴുതണമെന്നു തോന്നിയത്.ഇന്ത്യന്‍ രൂപയ്ക്കു കൂടുതല്‍ കണ്‍വേര്‍ഷന്‍ റേറ്റ് ലഭിക്കുന്ന,അപൂര്‍വ്വംചിലരാജ്യങ്ങളിലൊന്നാണ്ശ്രീലങ്ക.1 ഇന്ത്യന്‍രൂപ =2 .40ശ്രീലങ്കന്‍രൂപ.
എങ്കിലും,കേരളത്തിലെയും,ഇവിടത്തേയും സാധനങ്ങളുടെ വിലകള്‍ തമ്മില്‍ അജഗജാന്തരമുണ്ട്.പൊള്ളുന്ന വില എന്ന് പറയുന്നത് ഇവിടെയാണ്‌. ഒരു പൂവന്‍ പഴത്തിന്റെ വില 20 ലങ്കന്‍ രൂപ.അതായത്,ഇന്ത്യന്‍ രൂപ 8.33 മാത്രം! നമ്മള്‍ 100 അമേരിക്കന്‍ ഡോളര്‍ മാറിയാല്‍ കൈ നിറയേ കാശായി.11500 ശ്രീലങ്കന്‍ രൂപ!!പക്ഷെ കീശ കാലിയാകാന്‍ നിമിഷ നേരം മതി.ഇതൊക്കെയാണെങ്കിലും ഡീസല്‍ വില ഇവിടെ കുറവാണു.

ഇതിനിടയില്‍,ലങ്കയിലെ ഡീസലിന്റെ വില ഒന്നു കാണൂ.!!ഇന്ത്യന്‍ രൂപ 30.41

ഭക്ഷണ ശേഷം വീണ്ടും കാഴ്ച്ചകളിലെക്കിറങ്ങി.കൊളൊംബൊയുടെ സാമ്പത്തിക തലസ്ഥാനം എന്ന് വിശേഷിക്കപ്പെടുന്ന,ഫോര്‍ട്ട്‌ ജില്ലയിലൂടെയാണ് ഇപ്പോള്‍ സഞ്ചാരം.കൊളോണിയല്‍ ശൈലിയിലുള്ള കെട്ടിടങ്ങള്‍ ഇവിടെ ധാരാളമായുണ്ട്.മള്‍ട്ടി നാഷണല്‍ ബാങ്കുകളെല്ലാം,ഇവിടെ പ്രവര്‍ത്തിക്കുന്നു.ഒന്ന് രണ്ടു ചിത്രങ്ങള്‍ എടുത്തപ്പോഴേക്കും,നുവാന്റെ വക താക്കീത്,വീണ്ടും. പിന്നീട് പേട്ട വഴിയായി സഞ്ചാരം.നമ്മുടെ നാട്ടിലെത് പോലുള്ള ബസ്‌ സ്റ്റാന്റും,നിര നിരയായിട്ടിരിക്കുന്ന കൈ വണ്ടികളും പിന്നിട്ടു,വാഹനം തിരക്കേറിയ വ്യാപാര കേന്ദ്രത്തിലൂടെ മുന്നോട്ടു നീങ്ങി.ശരിയായ ഒരു തമിഴ് സംസ്കാരം എവിടെയും കാണാം.പരിചയപ്പെട്ട തമിഴ് വംശജര്‍ക്കെല്ലാം,ഇന്ത്യയോട് ഒരു പ്രത്യേക സ്നേഹം കലര്‍ന്ന വികാരമാണു.ഒരു ചെറിയ റ്റീ സ്റ്റാള്‍ ഉടമ,ദുരൈ,എനിക്കു തമിഴ് അറിയാം എന്ന ഒറ്റക്കാരണത്താല്‍, എന്നോട് ചായയുടെ വില വാങ്ങാന്‍ കൂട്ടാക്കാതെ ,സ്നേഹപൂര്‍വ്വം യാത്രയാക്കി.
കേരളത്തിന്റെ സമാനമാകാലാവസ്ഥയുംഭൂപ്രക്രുതിയുമാണു,ശ്രീലങ്കയിലുമുള്ളത്.
നെഗംബോ,ഗോള്‍ തുടങ്ങിയ മനോഹരങ്ങളായ ബീച്ചുകള്‍,കൊളൊംബോയുടെ
സമീപത്തായിട്ടുണ്ടെങ്കിലും സമയക്കുറവു മൂലം ആ സന്ദര്‍ശനവും,മൂന്നാറിനു സമാനകാലാവസ്ഥയുള്ള,തേയിലത്തോട്ടങ്ങളുടെ നാടായ കാന്‍‍ഡി യാത്രയും
പിന്നീട് ഒരവസരത്തിലാകാമെന്ന് തീരുമാനിച്ചു.

കൊളോണിയല്‍ കെട്ടിടങ്ങള്‍

കൊളൊംബൊ പേട്ട തെരുവ്

independence square

പിറ്റേന്ന്,വെളുപ്പിന് മടങ്ങേണ്ടാതാണ്.അതിനാല്‍,ധൃതി പിടിച്ച്‌, independence സ്ക്വയര്‍ ,സന്ദര്‍ശിച്ച ശേഷം ചെറിയ ഒരു ഷോപ്പിങ്ങിന്റെ തിരക്കിലേക്കൂളിയിട്ടു.
തിരികെ ബീച്ചിലെത്തി.ബീച്ചിലെങ്ങും നല്ല തിരക്ക്.തിങ്ങി നിറഞ്ഞ ആളുകള്‍ക്കിടയിലൂടെ,ചെറുകച്ചവടക്കാര്‍ .താല്‍ക്കാലിക ഭക്ഷണശാലകളില്‍,കച്ചവടം പൊടിപൊടിക്കുന്നു.വറുത്തതും,പൊരിച്ചതുമായ കടല്‍ വിഭവങ്ങള്‍ ആണു പ്രധാന ആകര്‍ഷണം.പ്രായഭെദമെന്യെ എല്ലാവരും ബീച്ചിലുണ്ട്.

ബീച്ചിലെ രാത്രി ഭക്ഷണശാലകള്‍

രാത്രിയില്‍ ഒരു നഗരപ്രദിക്ഷണം നടത്തി,ഭക്ഷണവും കഴിഞ്ഞു വാഹനത്തില്‍ കയറുമ്പോള്‍ സമയം രാത്രി 11 .30 .ഹോട്ടലില്‍ തിരികെയെത്തി,നല്ല ഒരു കുളിയും കഴിഞ്ഞു ,വെളുപ്പിന് 3 മണിക്ക് പറഞ്ഞുറപ്പിച്ചിട്ടുള്ള വെയ്ക് അപ് കോളിനായി ഞാന്‍ കാതോര്‍ത്ത് കിടന്നു.

ഒന്നാം ഭാഗം ഇവിടെ

ശ്രീലങ്ക-കൊളൊംബോ-ഭാഗം 1

2010-03-01T08:27:00.007+05:30

                        ഒരു ശ്രീലങ്കന്‍ യാത്ര- 2 ഭാഗങ്ങളായി പോസ്റ്റ് ചെയ്യാമെന്ന് കരുതുന്നു
                                                                ഭാഗം -1

ശ്രീലങ്കന്‍ എയര്‍വെയ്സ് കഴിഞ്ഞ കുറെ നാളുകളായി, തിരുവനന്തപുരത്ത് നിന്നും മാത്രമേ സര്‍വ്വീസ് നടത്തുന്നുള്ളൂ. അവര്‍, കൊച്ചി എയര്‍ പോര്‍ട്ടില്‍ നിന്നുമുള്ള സര്‍വീസുകള്‍ എല്ലാം നിറുത്തി വച്ചിരിക്കുകയാണ്.

കൊളൊംബൊ വിമാനത്താവളം

തിരുവനന്തപുരം വിമാനത്താവളം

അതിനാല്‍ കൊളൊമ്പോയ്ക്ക് പോകണമെങ്കില്‍,തിരുവനന്തപുരത്ത് പോകാതെ മാര്‍ഗമില്ല.കൊച്ചിയില്‍ നിന്നും, തിരുവനന്തപുരത്ത് എത്തിചേരണമെങ്കില്‍ 5 മണിക്കൂര്‍ റോഡ്‌ യാത്ര. എന്നാല്‍ തിരുവനന്തപുരം-കൊളൊമ്പോ വിമാന യാത്ര 50 മിനിറ്റ്!
തിരുവനന്തപുരം വിമാനത്താവളത്തില്‍ അതിരാവിലെ എത്തിച്ചേരുമ്പോള്‍,ഒപ്പം യാത്ര ചെയ്യുന്ന സുഹൃത്തുക്കള്‍ നേരത്തെയെത്തിഎന്നേയുംപ്രതീക്ഷിച്ച്നില്‍ക്കുകയായിരുന്ന..വിമാനത്താവളത്തിന് പറയത്തക്ക മാറ്റമൊന്നുമില്ല.പുതിയ ടെര്‍മിനലിന്റെ ജോലികള്‍ നടക്കുന്നു.ബസ്സില്‍ തൂങ്ങിതന്നെ വേണം ഇപ്പോഴും വിമാനത്തിലെത്താന്‍.
കൃത്യ സമയത്ത് തന്നെ വിമാനം പുറപ്പെട്ടു.യാത്രക്കാരില്‍ ഭൂരിഭാഗവും തമിള്‍ കച്ചവടക്കാരാണ് .സ്ഥിര യാത്രക്കാരാണ്,അവരിലധികവും.വിമാനം പുറപ്പെട്ട ഉടനെ,എന്റെ അടുത്തിരുന്നയാള്‍ തന്റെ പേഴ്സ് തുറന്നു .പല രാജ്യങ്ങളിലെ 5 -6 സിം കാര്‍ഡുകളില്‍ നിന്നും ഒന്നെടുത്ത്മൊബൈലില്‍ഫിറ്റ്ചെയ്ത്,അയാള്‍ തയ്യാറായി.തായ്ലണ്ടിലും,ചൈനയിലും,
മലേഷ്യയിലും ,ശ്രീലങ്കയിലും എല്ലാം ബിസ്സിനസ് നടത്തുന്നഒരുചെറുപ്പക്കാരന്‍.
സ്നാക്ക്സ് കഴിച്ചു കഴിഞ്ഞപ്പോഴേക്കും വിമാനംകൊളൊംബൊയിലെത്തി. ശ്രീലങ്കയിലേക്ക്,
ഇന്ത്യാക്കാര്‍ക്ക് വിസ ആവശ്യമില്ലാതതിനാല്‍, എമിഗ്രേഷന്‍ വഴി വേഗം പുറത്തിറങ്ങാനായി.അറൈവല്‍ ഹാളില്‍ വലിയ തിരക്കൊന്നുമില്ല.ഞങ്ങളെ കാത്തു നില്‍ക്കുന്ന നുവാന്‍ എന്ന യുവാവിനൊപ്പം പുറത്തിറങ്ങി,കാറില്‍കയറി.ക്യാമറ തുറന്നപ്പോഴേക്കും,
അയാള്‍ വിലക്കി.കൊളൊമ്പോ യില്‍ ,ഫോട്ടൊയെടുക്കുന്നത് വളരെ സൂക്ഷിച്ചു വേണമെന്ന നിര്‍ദ്ദേശവും ലഭിച്ചു.പോകുന്ന വഴിയെല്ലാം കാവല്‍ നില്‍ക്കുന്ന പോലീസുകാരും,പട്ടാളക്കാരും.മീശ മുളക്കാത്ത പയ്യന്മാരാണധികവും.

കൊളൊംബൊ വിമാനത്താവളത്തിനു പുറത്ത്

വിമാനത്താവളത്തില്‍ നിന്നുമുള്ള റോഡ്

കൊളോമ്പോയുടെ,ആദ്യ കാഴ്ചകള്‍ ഒരു തമിഴ്നാട് നഗരത്തിന്റെ പ്രതീതിയാണ്,നമുക്ക് സമ്മാനിക്കുന്നത്.സമയം ഉച്ചയാകുന്നതെയുള്ളൂ.നഗരത്തില്‍ നല്ല തിരക്കാണ്.ലെയ്ലാന്റ് ബസ്സുകളും,ബജാജ് ഓട്ടോ റിക്ഷകളും എല്ലായിടത്തും കാണാം.

കൊളൊംബൊ നഗര വീഥികള്‍

ഒരു റെസ്റ്റോറന്റിനു സമീപം നുവാന്‍ കാര്‍ നിര്‍ത്തി.ഭക്ഷണം കഴിഞ്ഞു,സമീപത്തുള്ള ഒരു സൂപ്പര്‍ മാര്‍ക്കറ്റില്‍ നിന്നും സിം കാര്‍ഡ്,മറ്റു അവശ്യ സാധനങ്ങള്‍ എന്നിവ വാങ്ങി,വീണ്ടും യാത്ര തുടങ്ങി.ഗോള്‍ റോഡിലുള്ള താജ് സമുദ്രയിലാണ് മുറി റിസര്‍വ്വ് ചെയ്തിരിക്കുന്നത്.ഹോട്ടലില്‍ എത്തുന്നതിനു മുന്‍പ്,3 സ്ഥലങ്ങളില്‍ പട്ടാളക്കാരുടെ പരിശോധന നടന്നു.ഇന്ത്യാക്കാരോട്,തികച്ചും മാന്യമായ സമീപനമാണു അവരുടേത്.

ഹോട്ടല്‍ താജ് സമുദ്ര

ഹോട്ടലില്‍ എത്തി.ഹോട്ടലിലും,കര്‍ശന സുരക്ഷാ പരിശോധനകളാണു നിലവിലുള്ളത്. ചെക്ക് ഇന്‍ ചെയ്തു മുറിയിലേക്ക് നടന്നു.മനോഹരമായ ഒരു ഹോട്ടല്‍ ആണിത്.നേരെ മുന്‍പില്‍ കടലും.ചെറിയ ഒരു വിശ്രമത്തിന് ശേഷം പട്ടണം കാണാന്‍ ഇറങ്ങി.
.

ഹോട്ടല്‍ മുറിയില്‍ നിന്നുമുള്ള കൊളൊംബൊ നഗരക്കാഴ്ചകള്‍

നാഷനല്‍ മ്യൂസിയം

കൊളൊമ്പോ മ്യൂസിയം കാണുന്നതിനാണ് ആദ്യം പുറപ്പെട്ടത്‌.1877 -ല്‍ നിര്‍മ്മിക്കപ്പെട്ട ഈ മനോഹര കെട്ടിടത്തില്‍ വിവിധ ബുദ്ധ പ്രതിമകള്‍,സംഗീത ഉപകരണങ്ങള്‍,വിവിധ ഫര്‍ണ്ണിച്ചറുകള്‍ എന്നിവ പ്രദര്‍ശിപ്പിച്ചിരിക്കുന്നു.ഒരു വലിയ തിമിംഗലത്തിന്റെ അസ്ഥികൂടവും ഇതിനകത്തുണ്ട്.

ഫോര്‍ട്ട് റയില്‍വേ സ്റ്റേഷന്‍

നഗരത്തിലെ തെരുവുകള്‍

തുടര്‍ന്നു,ഫോര്‍ട്ട്‌ റയില്‍വേ സ്റേഷന്‍ ഭാഗത്തെക്കാണു പോയത്.കൊളോണിയല്‍ ശൈലിയില്‍ പണിതിരിക്കുന്ന ഈ സ്റ്റേഷനാണു, ഫോര്‍ട്ട്‌-പേട്ടാ ജില്ലകളെ വേര്‍തിരിക്കുന്നത് .നല്ല തിരക്ക് കാരണം അകത്തു കയറിയില്ല. മിക്കവാറും എല്ലാ സ്ഥലങ്ങളിലും ഫോട്ടോഗ്രാഫി നിരോധിച്ചിരിക്കുന്നത് മൂലം, ഇച്ഛാനുസരണം ചിത്രങ്ങളെടുക്കാന്‍ സാധിച്ചില്ല. ക്യാമറ പുറത്തെടുക്കുമ്പോഴെക്കും,തോക്കുമായി പട്ടാളക്കാരന്‍ എത്തും.

നേരം ഇരുട്ടി തുടങ്ങിയിരിക്കുന്നു.ഒരു അസ്തമയവും കണ്ടു,ബീച്ചില്‍ കുറെ സമയം ചിലവഴിച്ചു ,രാത്രി ഭക്ഷണത്തിന് ശേഷം തിരികെ മുറിയിലെത്തി.

തുടരും....

2010-02-09T13:40:00.003+05:30

ആലപ്പുഴ പള്ളിക്കായല്‍ വഴി യാത്ര ചെയ്യുമ്പോഴുള്ള ഒരു മനോഹര കാഴ്ച

മൂന്നാര്‍-കേരളം vs ജെന്റിങ് -മലേഷ്യ

2010-02-08T15:34:00.002+05:30

മൂന്നാര്‍ വിവാദം വീണ്ടും കത്തി നില്ക്കുന്ന ഈ അവസരത്തില്‍ ,പ്രസക്തിയുള്ള ഒരു വിഷയമാണിതെന്നു തോന്നുന്നു.
രാഷ്ട്രീയക്കാരും,ചാനലുകാരും,ഉദ്യോഗസ്ഥരും കൂടി മൂന്നാര്‍ ഇല്ലാതാക്കുന്നു.അതിനെ കുറിച്ചുള്ള ആശങ്കകളും,ദുഖവും ഇവിടെ രേഖപ്പെടുത്തുന്നു.മൂന്നാറിന് സമാനമായ കാലാവസ്ഥയും,ഭൂ പ്രകൃതിയുമുള്ള,ജെന്റിംഗ് എന്ന മലേഷ്യന്‍ പ്രദേശത്തിന്റെ അവസ്ഥ ഒന്ന് പരിശോധിക്കാം.

മലേഷ്യയിലുള്ള ഒരു വിനോദ സഞ്ചാര കേന്ദ്രമാണ് ജെന്റിംഗ് ഹൈലാന്റ്സ്.സമുദ്ര നിരപ്പില്‍ നിന്നും ഏകദേശം 6118 അടി ഉയരത്തില്‍ സ്ഥിതി ചെയ്യുന്ന ഈ പ്രദേശം കോലാലംപുര്‍ നഗരത്തില്‍ നിന്നും 51 കിമി ദൂരെയാണ്.നമ്മുടെ മൂന്നാറിന് സമാനമായ കാലാവസ്ഥയാണിവിടെ.പ്രകൃതിഭംഗിയുടെ കാര്യത്തില്‍ മൂന്നാറിന്റെ ഏഴയലത്ത് വരികയില്ലെങ്കിലും,അടിസ്ഥാന സൌകര്യങ്ങളുടെ കാര്യത്തില്‍ മൂന്നാറിന് ,ജെന്റിങ്ങുമായി ഒരു താരതമ്യത്തിനു പോലും അര്‍ഹതയില്ല എന്ന് ഖേദ പൂര്‍വ്വം പറയേണ്ടിയിരിക്കുന്നു.

ജെന്റിങ് ഹോട്ടല്‍

കണ്‍വെന്‍ഷന്‍ സെന്റര്‍

ഹോട്ടലില്‍ നിന്നുമുള്ള കാഴ്ചകള്‍

ഇച്ഛാശക്തിയുള്ള ഒരു ഭരണകൂടത്തിന്റെ വീക്ഷണം എങ്ങിനെയായിരിക്കണം എന്നുള്ളതിന്റെ ഉത്തമ ദൃഷ്ടാന്തമാണ് ജെന്റിംഗ്.കോലാലംപൂരില്‍ നിന്നും ഒന്നേകാല്‍ മണിക്കൂര്‍ യാത്ര ചെയ്‌താല്‍ ഇവിടെ എത്താം.6 വരി പാതയാണ് ഇവിടേയ്ക്ക്.വഴി നീളെ പാര്‍ക്കുകള്‍,ഭക്ഷണ ശാലകള്‍ ,ഗോള്‍ഫ് കോഴ്സുകള്‍,വഴിയോര വിശ്രമ കേന്ദ്രങ്ങള്‍ തുടങ്ങിയവ.സ്വകാര്യ മേഖലയിലും അല്ലാതെയും.ജെന്റിങ്ങില്‍ എത്തിച്ചേര്‍ന്നാല്‍ പിന്നെ കാഴ്ചകളുടെഒരുവര്‍ണ്ണനാതീതമായ ലോകമാണ്.വിവിധ നിലവാരത്തിലുള്ള ഹോട്ടലുകള്‍ ,അമ്യൂസ്മെന്റ് പാര്‍ക്കുകള്‍,
ഷോപ്പിംഗ്‌ മാളുകള്‍,സ്കൈഡൈവിംഗ്,സ്നോ വേള്‍ഡ്, കേബിള്‍ കാര്‍,സാഹസിക വിനോദങ്ങള്‍ അങ്ങിനെ നിരവധി വിനോദത്തിനുള്ള ഉപാധികള്‍.

മലേഷ്യയിലെ റോഡുകള്‍

ഹോട്ടല്‍

ഗോള്‍ഫ് ക്ലബ്

വഴിയോര കേന്ദ്രങ്ങള്‍

ഇനി മൂന്നാറിനെ പറ്റി
മേല്‍ പറഞ്ഞ ജെന്റിങ്ങിന്റെ പത്തിരട്ടി പ്രകൃതി സമ്പത്തും , വിഭവങ്ങളുമുള്ള മൂന്നാറിന്റെസ്ഥിതി നോക്കൂ.
ഏതൊരു പ്രദേശത്തിന്റെയും വികസനത്തിന്റെ അടിസ്ഥാനം, റോഡ്‌ സൌകര്യങ്ങള്‍ ആണെന്ന്

മനസ്സിലാക്കാത്ത ഭരണകൂടം ആണ് നമുക്കുള്ളത്. മൂന്നാറിലേക്കുള്ള റോഡുകള്‍ നോക്കൂ.നല്ലതെങ്കിലും വീതി കുറഞ്ഞ ഒരു "ഒന്നര "വരിപ്പാത. കൂടെ ഗതാഗത യോഗ്യമല്ലാത്ത റോഡുകള്‍ വേറെയും.

വിവാദങ്ങള്‍ക്കു പകരം,സര്‍ക്കാര്‍ അടിയന്തരമായി ചെയ്യേണ്ട കാര്യങ്ങള്‍ :

1 .ടാറ്റയുടെ കൈവശ ഭൂമിയെല്ലാം രാജ ഭരണം വഴിസര്‍ക്കാരില്‍ നിക്ഷിപ്തമായ പാട്ട ഭൂമിയാണ്‌. സര്‍ക്കാര്‍ മൂന്നാര്‍ടൗണിനു2 കിമിറേഡിയസില്‍ഉള്ള ടാറ്റയുടെ ഭൂമിഏറ്റെടുക്കണം.ഇത് ഏകദേശം 12 .56 ച.കിമി അഥവാ
31൦൦ ഏക്കര്‍ സ്ഥലം വരും.

2.ഒരു വന്‍ വികസന കാഴ്ചപ്പാടോടെ ,ശാസ്ത്രീയമായി, മേല്‍പറഞ്ഞസ്ഥലം വിഭജിച്ചു ബോട്ടാണിക്കല്‍ ഗാര്‍ഡനുകള്‍, പാര്‍ക്കുകള്‍,ഹോട്ടലുകള്‍,കേബിള്‍ കാര്‍,അമ്യൂസ്മെന്റ് പാര്‍ക്കുകള്‍,ഷോപ്പിംഗ്‌ മാളുകള്‍,അഡ്വഞ്ചര്‍ അക്കാദമി മറ്റു അനുബന്ധ സൌകര്യങ്ങള്‍ തുടങ്ങിയവയ്ക്ക് നല്‍കുക.

3.മേല്‍ പറഞ്ഞ കാര്യങ്ങള്‍ സ്വകാര്യ മേഖലയിലോ സംയുക്ത മേഖലയിലോ നടത്താവുന്നതാണ്.

4.വന നിയമത്തിന്റെ സാങ്കേതികത്വം ഉയര്‍ത്താതെ 6 വരി പാതയോ,ചുരുങ്ങിയത് 4 വരി പാതയോ അടിയന്തരമായി നിര്‍മമിക്കുക.

എന്തിനെയും ഏതിനേയും രാഷ്ട്രീയമായി നോക്കിക്കാണുന്ന ഭരണകൂടത്തിന്റെ,പാര്‍ട്ടികളുടെ,ഈ മനോഭാവം മാറിയെ തീരൂ . ഇപ്പോഴുള്ള അനാവശ്യ വിവാദങ്ങള്‍ അവസാനിപ്പിക്കുകയും ,സംസ്ഥാനത്തിന്റെ പൊതു നന്മക്കായി പ്രവര്‍ത്തിക്കുകയും വേണം എന്നതാണ് ഏറ്റവും ആവശ്യം .ദീര്‍ഘ ദൃഷ്ടിയുള്ള ഭരണ സംവിധാനവും,അര്‍പ്പണ ബോധമുള്ള കുറച്ചു ഉദ്യോഗസ്ഥരും മാത്രം മതി,രണ്ടോ,മൂന്നോ വര്‍ഷങ്ങള്‍ക്കുള്ളില്‍ ഈ പരിശ്രമം ഫലപ്രാപ്തിയിലെത്തിക്കാന്‍. വരുമാനത്തിലും,മൂന്നാറിന്റെ അന്താരാഷ്‌ട്ര പ്രശസ്തിയിലും ഉണ്ടാകുന്ന വന്‍ വര്‍ധനവ്‌ ആയിരിക്കും ഫലം.സമീപ ഭാവിയില്‍ ഇവ യാഥാര്‍ത്ഥ്യമാകും എന്ന് നമുക്ക് പ്രത്യാശിക്കാം,അതിനായി പ്രാര്‍ഥിക്കാം.

വാരണാസി യാത്ര

2010-02-04T15:06:00.005+05:30

ഒരു മാര്‍ച്ച്‌ മാസത്തിലെ ആദ്യ വാരത്തിലാണ് ,വാരണാസി യാത്രക്കുള്ള ക്ഷണം എനിക്ക് ലഭിക്കുന്നത്.

ഗംഗാ നദി

നമുക്കൊന്ന് വാരണാസിവരെപോയിവരാം എന്ന്, സ്പൈസസ്എക്സ്പോര്‍ട്ടര്‍ ആയ സുഹൃത്ത്‌

പറയുന്നത്,35കിമി മാത്രം അകലെയുള്ള എറണാകുളം വരെ പോയി വരാം, എന്ന് പറയുന്ന ലാഘവത്തോടെയായിരിന്നു.സുപ്രസിദ്ധമായ ഗംഗാ നദിയും കാശി ക്ഷേത്രവും സ്ഥിതി ചെയ്യുന്ന,ലോകത്തിലെഅതിപുരാതന നഗരങ്ങളില്‍ഒന്നായ , വാരണാസി സന്ദര്‍ശിക്കുവാനുള്ള
ക്ഷണം ലഭിച്ച മാത്രയില്‍ തന്നെ ഞാന്‍ സമ്മതം മൂളി. അടുത്തയാഴ്ച,പോകാന്‍ തയ്യാറാകണം എന്ന്നിര്‍ദ്ദേശംലഭിക്കുമ്പോഴുംഎങ്ങിനെപോകുന്നു എന്നതിനെക്കുറിച്ചു വലിയപിടികിട്ടിയിരുന്നില്ല. സംഗതി ,നടപ്പുള്ളതാണോഎന്നൊരുസംശയവുംബാക്കി .എന്തായാലും,യാത്രക്കുള്ള ഒരുക്കങ്ങള്‍
തുടങ്ങുമ്പോഴേക്കും,ടിക്കറ്റുകളും എത്തി.

പോകുന്ന ദിവസം ആഗതമായി.പെട്ടിയെല്ലാം തയ്യാറാക്കി,നേരെ എയര്‍ പോര്‍ട്ടിലെത്തി.സ്പയിസ് ജെറ്റിന്റെ, മുംബൈ വഴിയുള്ള ദില്ലി വിമാനത്തില്‍ ആണ് യാത്ര പ്ലാന്‍ചെയ്തിരിക്കുന്നത്.ഉച്ചയോടെ വിമാനം മുംബൈ എയര്‍പോര്‍ട്ടില്‍ ഇറങ്ങി.രണ്ടര മണിക്കൂര്‍ യാത്രക്കിടയില്‍ ഒരു ഗ്ലാസ്‌ പച്ച വെള്ളം മാത്രമാണ് ലഭിച്ചത്.മുംബൈ എയര്‍ പോര്‍ട്ടില്‍ നിന്നും വിമാനത്തിന്റെ ടെയിക് ഓഫിനു മുമ്പ് തന്നെ ,വിശപ്പ്‌ ടെയിക് ഓഫ്‌ചെയ്തിരുന്നു.

ലഘുഭക്ഷണത്തിന്റെ വണ്ടിയും തള്ളിക്കൊണ്ട്, എയര്‍ ഹോസ്ടസ്ഇപ്പോള്‍എത്തിയിട്ടുണ്ട്. എന്ത് ആഹാരം കഴിക്കണം എന്ന് ചിന്തിക്കും മുന്‍പേ ,സഹയാത്രികന്‍ വിശപ്പ്‌ സഹിക്ക വയ്യാതെ സാന്‍ഡ് വിച്ച്‌ ഓര്‍ഡര്‍ ചെയ്തുകഴിഞ്ഞു.ഡയബടിക് ആയതുകൊണ്ട് ,പാവം അവശതയിലാണ്.അതും മതിയാവാതെ , സാന്‍ഡ് വിച്ചിന്റെകൂടെ , നല്ല മധുരമുള്ള ഒരു ടിന്‍ ജ്യൂസും ആശാന്‍ തട്ടി വിടുന്നുണ്ട്.എല്ലാം കൂടി അകത്താക്കി ,രക്തത്തിലെ പഞ്ചസാരയുടെ അളവ് ഭേദപ്പെടുത്തി, സഹയാത്രികന്‍ ഉറങ്ങാന്‍ കിടന്നു.കിട്ടിയ ബില്ലിന്റെ ഘനത്തില്‍ ഞാനും ഉറങ്ങി.. പിന്നെ ഉണര്‍ന്നത് ,വിമാനം ദില്ലി എയര്‍പോര്‍ട്ടില്‍ ലാന്‍ഡ്‌ ചെയ്തപ്പോള്‍ ആണ്.

ദില്ലിവിമാനത്താവളത്തില്‍,വിമാനങ്ങള്‍തലങ്ങുംവിലങ്ങുംചിതറിക്കിടക്കുന്നു.സ്പൈസ് ജെടിന്റെയും,
ഗോ എയര്‍ കമ്പനിയുടെയും ,മറ്റു എയര്‍ ലൈനുകളുടെയും, വിമാനങ്ങള്‍ യഥേഷ്ഠം പാര്‍ക്ക് ചെയ്തിരിക്കുന്നു.സ്പൈസ് ജെറ്റ് കമ്പനിക്കു ഇത്രയും വിമാനങ്ങള്‍ സര്‍വീസിനു ഉണ്ട് എന്ന് മനസ്സിലായത്‌ ഇപ്പോഴാണ്.ബസ്സില്‍ തൂങ്ങിപ്പിടിച്ച്‌ ടെര്‍മിനലില്‍ എത്തി,ബാഗുകള്‍ എല്ലാം എടുത്തു പുറത്തു കടന്നു.വലിയ വികസനമാണ് ഇവിടെ എയര്‍പോര്‍ട്ടില്‍ നടന്നു കൊണ്ടിരിക്കുന്നത്.

പുറത്തു ഞങ്ങളെയും കാത്തു ,ദില്ലിയിലുള്ള സുഹൃത്ത് പ്രദീപ്‌ , കാത്തു നില്‍ക്കുന്നുണ്ടായിരുന്നു.വര്‍ഷങ്ങള്‍ക്കു മുമ്പ് ഇവിടെ എത്തി,പല കമ്പനികളില്‍ ജോലി ചെയ്തു,ഇപ്പോള്‍ സ്വന്തമായി നല്ല രീതിയിലുള്ള ബിസിനസ്‌ സ്ഥാപനങ്ങള്‍ നടത്തുന്ന ഒരു മാന്യ വ്യക്തിയാണ് അദ്ദേഹം.അദ്ദേഹത്തോടൊപ്പം, കരോള്‍ ബാഗിലുള്ള ഹോട്ടലിലെക്ക് യാത്രയായി.ഞാന്‍ പോകുന്ന സമയത്ത്,ദില്ലിയില്‍ ചൂട് കാലം തുടങ്ങിയിട്ടില്ല.ചെറിയ തണുപ്പുണ്ട് താനും.ആകെക്കൂടി സുഖകരമായ കാലാവസ്ഥ.കാഴ്ചകള്‍ കണ്ടു കണ്ടു ഹോട്ടലില്‍ എത്തിയതറിഞ്ഞില്ല. വിഭവ സമൃദ്ധമായ ഒരു ഭക്ഷണത്തിന് ശേഷം നല്ല ഒരു മയക്കം.സുഖകരമായി ഒന്ന് കുളിച്ചതിനു ശേഷം ,ദില്ലി പട്ടണത്തിന്റെ കാഴ്ച്ചകളിലെക്കിറങ്ങി.കരോള്‍ ബാഗിലെ ഷോപ്പിംഗ്‌ സെന്ററുകളില്‍ ഒന്ന് കയറി,അത്യാവശ്യം സാധനങ്ങള്‍ എല്ലാം വാങ്ങി.പിന്നെ മെട്രോയിലൂടെ രാജീവ്‌ ചൌക്ക് വഴി കറങ്ങി,നല്ല ഒരു പഞ്ചാബി റെസ്റ്റാറന്റീല്‍ നിന്നും ഭക്ഷണവും കഴിച്ചു ,തിരികെ ഹോട്ടലില്‍ എത്തുമ്പോഴേക്കും, സമയം രാത്രി പതിനൊന്നരയായി. വാങ്ങിയ സാധനങ്ങള്‍ എല്ലാം ബാഗിലടുക്കി,ഒരു കുളിയും കഴിഞ്ഞപ്പോള്‍ നല്ല ഉറക്കത്തിനുള്ള മൂഡായി.

മൊബൈലിന്റെ അലാറമാണ് ഉറക്കത്തില്‍ നിന്നു ഉണര്‍ത്തിയത്.സമയം ആറു മണിയാണു ഇപ്പോള്‍.തിടുക്കത്തില്‍,പ്രഭാത കര്‍മ്മങ്ങള്‍ എല്ലാം നിര്‍വ്വഹിച്ചു,ഇളം തണുപ്പില്‍ ഒരു പ്രഭാത സവാരിക്കിറങ്ങി.സൂര്യന്‍ ഉദിച്ചു വരുന്നതേയുള്ളൂ.രാവിലെയുള്ള സവാരിക്കാര്‍ വളരെക്കുറവ്.നമ്മുടെ നാട്ടില്‍ ഇപ്പോള്‍ ഏതു സ്ഥലത്ത് ചെന്നാലും രാവിലെ നടപ്പുകാരെ തട്ടാതെ റോഡിലൂടെ നടക്കുവാന്‍ സാധിക്കുകയില്ല എന്ന സ്ഥിതി ആയിട്ടുണ്ടല്ലോ!.ലഘുവായ ഭക്ഷണത്തിന് ശേഷം ,ഞങ്ങള്‍ രണ്ടാളും നേരെ ഒരു ടാക്സിയില്‍ എയര്‍ പോര്‍ട്ടിലേക്ക് ലേക്ക് വച്ച് പിടിച്ചു.അത്യാവശ്യ തിരക്കുകള്‍ ഉള്ളതിനാല്‍ ഇന്ന് വരാന്‍ സാധിക്കുകയില്ല എന്ന് പ്രദീപ്‌ നേരത്തെ തന്നെ അറിയിച്ചിരുന്നു.ഇത്രയും തിരക്കുകള്‍ക്കിടയിലും ഞങ്ങളെ സ്വീകരിക്കുവാനും ,സല്ക്കരിക്കുവാനും സമയം കണ്ടെത്തിയ അദ്ദേഹത്തോട്, നന്ദിയും പറഞ്ഞു ,ഞങ്ങള്‍ എയര്‍ പോര്‍ട്ടിലെത്തി.

ഇപ്രാവശ്യം യാത്ര കിംഗ്‌ ഫിഷറിലാണ്.കൃത്യസമയത്ത് തന്നെ വിമാനം പുറപ്പെട്ടു.നല്ല സുന്ദരന്‍ (സുന്ദരി?)എയര്‍ ബസ് 320 വിമാനം.സൌഹൃദപൂര്‍വം പെരുമാറുന്ന വിമാന ജോലിക്കാര്‍.അതിനും പുറമേ നല്ല രുചിയുള്ള ഉച്ച ഭക്ഷണവും.തന്റെ ഓരോ ക്രൂവിനെയും, താന്‍ നേരിട്ടാണ് തിരഞ്ഞെടുക്കുന്നതെന്ന വിജയ്‌ മല്യയുടെ അവകാശ വാദം പൊള്ളയല്ല എന്ന് ക്രൂവിന്റെ പെരുമാറ്റം തെളിയിക്കുന്നു.ഭക്ഷണം കഴിയാറായപ്പോഴേക്കും വാരണാസിയില്‍ , വിമാനം ലാന്‍ഡ്‌ ചെയ്യാന്‍ പോകുകയാണ് എന്ന ,പൈലറ്റിന്റെ ,അറിയിപ്പ് മുഴങ്ങി.

ഇപ്പോള്‍ വിമാനം നിലം തൊട്ടിരിക്കുന്നു.എയര്‍ പോര്‍ട്ടിന്റെ ടെര്‍മിനല്‍ ഒരുവശത്തായി കാണാം.ഒരു ചെറിയ വിമാനത്താവളത്തിന്റെ പ്രതീതിയാണ് അത് എന്നില്‍ ജനിപ്പിച്ചത്.വലിയ അക്ഷരങ്ങളില്‍ അന്താ രാഷ്ട്ര വിമാനത്താവളം എന്ന് എഴുതി വച്ചിട്ടുമുണ്ട്.ഇടുങ്ങിയ ലഗ്ഗേജ് ഏരിയയില്‍ നിന്നും ബാഗുകള്‍ എല്ലാം എടുത്തു ,പുറത്തേക്ക് നടന്നു.അതിനിടയില്‍ അറൈവല്‍ ഹാളിലെ ടൊയ്ലെട്ടിലുമൊന്നു കയറി. ദയനീയം!നമ്മുടെ പഴയ പൊതു മൂത്രപ്പുരകളുടെ നിലവാരം പോലുമില്ലാത്ത സ്ഥലം ആണ് ഈ "അന്താരാഷ്‌ട്ര"വിമാനത്താവളത്തിലെ ടോയ്ലെറ്റ്മൂക്കുംപൊത്തി കയറി ഇറങ്ങുന്ന വിദേശികള്‍. ആ ദുര്‍ഗന്ധ പൂരിതമായ അന്തരീക്ഷത്തില്‍ നിന്നും പുറത്തു കടന്നു.പുറത്തു സാമാന്യം നല്ല ചൂട്,അതിനു അകമ്പടിയായി പൊടിയും.ആകെക്കൂടെ പൊടി പൂരം!

വാരണാസി എയര്‍ പോര്‍ട്ട്‌ ,നഗരത്തില്‍ നിന്ന് ഏകദേശം 27 കി മി ദൂരെയായി,ബബത്പൂര്‍ എന്ന സ്ഥലത്താണ് സ്ഥിതി ചെയ്യുന്നത്.ഇവിടെ നിന്നും ഏകദേശം ,മുക്കാല്‍ മണിക്കൂര്‍ യാത്രയുണ്ട്, നഗര ഹൃദയത്തിലേക്ക്.വളരെ പരിമിതമായ സൌകര്യങ്ങളുള്ള ഒരു ചെറിയ വിമാനത്താവളം ആണ് ബബത് പൂരിലേത്.സദാ സമയവും ഉറക്കം തൂങ്ങി നില്‍ക്കുന്ന ഒരു വിമാനത്താവളം. ജീവിതത്തില്‍ ഇതുപോലൊന്ന് ഇതിനു മുന്‍പ് കണ്ടിട്ടില്ല.എന്നാല്‍ ഇവിടെ നിന്ന് വിദേശരാജ്യങ്ങളിലേക്ക്സ്ഥിരമായിസര്‍വീസുകള്‍ഉണ്ട്.ബാങ്ങ്കോക്,ഫുജൈറ ,കാത്ത്മണ്ടു

എന്നിവടങ്ങളിലെക്കെല്ലാം സര്‍വീസുകള്‍ ഉണ്ട്.പ്രധാനമായും വിദേശ സഞ്ചാരികളെ ഉദ്ദേശിച്ചുള്ളതാണ് സര്‍വീസുകള്‍ അത്രയും.

വാരണാസി വിമാനത്താവളം,ബാബ്ത്പുര്‍

പുറത്ത് , സുഹൃത്തിന്റെ പരിചയക്കാരന്‍ , രമേശ്‌ കാത്തു നില്‍പ്പുണ്ട്.പാലക്കാടുകാരന്‍ ആണ് രമേശ്‌.വാരാണസിയില്‍ വരുന്ന ബിസ്സിനെസ്സ്കാര്‍ക്ക് വേണ്ട സൌകര്യങ്ങള്‍ ചെയ്തു കൊടുക്കുന്നവരില്‍ പ്രധാനിയാണ്‌ അദ്ദേഹം.15 വര്‍ഷങ്ങളായി ഇവിടെ തന്നെയാണു താമസം . തന്റെ കാര്‍ സര്‍വീസിനു കൊടുത്തതിനാല്‍ ഒരു പ്രൈവറ്റ് ടാക്സിയിലാണ് അദ്ദേഹം വന്നിരിക്കുന്നത്.ഞങ്ങള്‍ അദ്ദേഹത്തോടൊപ്പം കാറില്‍ കയറി യാത്ര തുടങ്ങി.ഡ്രൈവര്‍ പാന്‍ പരാഗ് പോലുള്ള എന്തോ ഒരു സാധനം ചവക്കുന്നുണ്ട്.അതിന്റെ മണം കാറിനകത്ത്‌ മുഴുവന്‍ വ്യാപിച്ചിരിക്കുന്നു. സാമാന്യം നല്ല റോഡ്‌ ആണ് നഗരത്തിലെക്കുള്ളത് എന്ന് തോന്നി.എന്നാല്‍ ഒരു 10 കിമി കഴിഞ്ഞപ്പോള്‍ റോഡിന്‍റെ സ്വഭാവം മാറി.കുണ്ടും,കുഴിയും നിറഞ്ഞു ,തകര്‍ന്നു കിടക്കുന്ന റോഡ്‌.നമ്മുടെ നാട്ടിലെ റോഡുകളുമായി താരതമ്യം പോലും ചെയ്യാന്‍ പോലുമാകാത്ത വിധം ,പൊളിഞ്ഞ റോഡ്‌.നഗരത്തിലെക്കടുക്കുന്തോറും റോഡില്‍ അസാമാന്യമായ ജനത്തിരക്ക്.അതിനിടയിലൂടെ നടന്നും,ഓടിയും നീങ്ങുന്ന നാല്‍ക്കാലികളും .എല്ലാ വശങ്ങളിലൂടെയും കേറി വരുന്ന സൈക്കിള്‍ റിക്ഷകളും,ഓട്ടോ റിക്ഷകളും.സര്‍വ്വത്ര ട്രാഫിക് ബ്ലോക്ക്.ജങ്ങ്ഷനുകളില്‍ സിഗ്നലുകള്‍ ഉണ്ടെങ്കിലും,അത് നമ്മള്‍ക്കുള്ളതല്ല എന്ന മട്ടില്‍ സിഗ്നല്‍ അവഗണിച്ചു ,എല്ലാ ദിശകളില്‍ നിന്നും വരുന്ന വാഹനങ്ങള്‍. കെട്ടിടങ്ങളുടെ തണലില്‍ ,ഈ രംഗങ്ങളും വീക്ഷിച്ചു, മൊബൈല്‍ ഫോണില്‍ സംസാരിച്ചുകൊണ്ടേയിരിക്കുന്ന പോലീസുകാര്‍.

കുറച്ചു കഴിഞ്ഞപ്പോള്‍ വാഹനത്തിന്റെ എ സി തകരാറിലായി.അതോടെ സൈഡ് ഗ്ലാസുകള്‍ താഴ്ത്തപ്പെട്ടു.ഇപ്പോള്‍ സംഗതി കുശാല്‍.ഉച്ചഭാഷിണികളുടെ കാതടിപ്പിക്കുന്ന ശബ്ദം ,നിര്‍ത്താതെ മുഴങ്ങുന്ന ഹോണുകള്‍ .നിര്‍ലോഭമായി പൊടി അകത്തേക്ക് കയറുന്നു.പക്ഷെ ഈ പൊടിക്ക് ഒരു വ്യത്യാസമുണ്ട്.ഇത് ചാണകം കൂടി കലര്‍ന്നതാണു.അത് കൊണ്ട് ഒരു വെജിടെറിയന്‍ ഫീലിംഗ്! വാഹനം നഗര മധ്യത്തില്‍ എത്തിച്ചേര്‍ന്നു.ഗതാഗതം തടസ്സപ്പെടുത്തിക്കൊണ്ട് ,റോഡില്‍ ഒരു വലിയ പുരുഷാരം തടിച്ചു കൂടിയിരിക്കുന്നു.പതിനായിരക്കണക്കിനു ആളുകള്‍ ആണ് കൂടിയിരിക്കുന്നത്.ഒരു പ്രമുഖ രാഷ്ട്രീയ പാര്‍ട്ടിയുടെ സമ്മേളനം നടക്കുകയാണ്.അതുകൊണ്ട് ഇനി വാഹനം മുന്നോട്ടില്ല.ഗതാഗതം തിരിച്ചു വിടാന്‍, പോലിസുമില്ല.ഡ്രൈവര്‍ ഹിന്ദിയില്‍ എന്തൊക്കെയോ പുലമ്പിക്കൊണ്ട് വാഹനം ഒരു വിധത്തില്‍ ഒരു സൈഡ് റോഡിലേക്ക് കയറ്റി. 8 അടി വീതി വരുന്ന ആ ചെറിയ വഴിയിലൂടെ അസംഖ്യം സൈക്കിള്‍ റിക്ഷകളെയും,പുലഭ്യം പറഞ്ഞു ആക്രോശിക്കുന്ന ആളുകളെയും പിന്നിലാക്കി വാഹനം കുതിച്ചു. ശ്വാസം അടക്കിപ്പിടിച്ചു ഞാനതില്‍ ഇരിക്കുകയാണു.ഇതൊന്നും അറിയാതെ ,സുഹൃത്ത്‌ സുഖസുഷുപ്തിയിലാണ്.രമേശ്‌ നിര്‍വികാരനായി മുന്നിലും.ഒടുവില്‍ കാര്‍ വീണ്ടും പ്രധാന നിരത്തിലെത്തി.ഒരു വലിയ കോമ്പൌണ്ടിലേക്ക് കാര്‍ ചെന്നു നിന്നു.സമാധാനം!!ഞങ്ങള്‍ താമസിക്കുവാന്‍ മുറി റിസര്‍വ് ചെയ്തിരിക്കുന്ന ഹോട്ടല്‍ ഡയമണ്ട് എത്തിയിരിക്കുന്നു.

ചെക്ക് ഇന്‍ ചെയ്ത് ,മുറിക്കകത്ത് പ്രവേശിച്ചു.സാമാന്യം നല്ല മുറിയാണ്.വൃത്തിയുള്ള ടോയ്ലെട്ടും.2മണി ആണ് ഇപ്പോള്‍ സമയം .ചെറിയ ഒരു വിശ്രമത്തിന് ശേഷം ഞങ്ങള്‍ പുറത്തേക്കിറങ്ങി. രമേശനുമൊന്നിച്ചു ,ബിസ്സിനസ്സ് കാര്യങ്ങള്‍ക്കായി, സുഹൃത്ത്, ഗോള്‍ഫ് കോഴ്സിനു സമീപത്തു, മീറ്റിങ്ങിനു പോയി.ആ സമയം ഒരു വിശദമായ കറക്കമാകാം എന്ന് തീരുമാനിച്ചു ഞാന്‍ പ്രധാന നിരത്തിലേക്കിറങ്ങി.ഗംഗ കാണുക എന്നുള്ളത് എന്റെ വളരെ നാളുകളായുള്ള ആഗ്രഹമാണ്.വായിച്ചും,കേട്ടും മാത്രം അറിവുള്ള ഗംഗ ഇതാ കണ്ണെത്തും ദൂരത്ത്‌ .ഒരു ഓട്ടോ പിടിച്ചു , സ്നാന ഘട്ടിലേക്ക് എന്ന് അറിയാവുന്ന ഹിന്ദിയില്‍ ഞാന്‍

പറഞ്ഞൊപ്പിച്ചു.. ഓട്ടോ, ഏതോ ഗലികളില്‍ കൂടിയെല്ലാം കയറിയിറങ്ങി.ഒരു ഓട്ടോ പോകാന്‍ മാത്രം തക്കതായ വീതിയുള്ള ചെറിയ ഇടവഴികള്‍ ആണ് എവിടെയും.അതില്‍ മനുഷ്യരും,മൃഗങ്ങളും എല്ലാം ഒരുമിച്ചാണ്.

നഗരത്തിലെ ഗള്ളികള്‍

അവസാനം,ഓട്ടോ റിക്ഷ നിന്നു.ഡ്രൈവര്‍ പുറത്തിറങ്ങി കൈ ചൂണ്ടി എന്തോ പറയുന്നു.കാശും കൊടുത്തു അവിടേക്ക് വച്ചടിച്ചു.ഒരു കാര്യം പറയട്ടെ,മുന്‍‌കൂര്‍ നിരക്ക് പറഞ്ഞുറപ്പിച്ചാല്‍,വളരെ നന്നായി പെരുമാറുന്ന ഓട്ടോക്കാരെയാണ് എനിക്കിവിടെ കാണാന്‍ കഴിഞ്ഞത്.നാളെ ഉച്ചക്കുള്ള വിമാനത്തില്‍ ദില്ലിക്ക് മടങ്ങണം.സമയം ഒന്നിനും തികയുന്നില്ല.അതിനാല്‍ ധൃതി പിടിച്ചു വലിഞ്ഞു നടന്നു.

ഓട്ടോ ഡ്രൈവര്‍ കാണിച്ചു തന്നത് ഒരു ഘട്ടിലെക്കുള്ള വഴി ആയിരുന്നു.50 അടി നടന്നപ്പോള്‍ കെട്ടിടങ്ങളുടെ ഇടയിലൂടെ ഗംഗ കാണാറായി.മനസ്സ് സന്തോഷം കൊണ്ട് തുളുമ്പുന്നു.ദ്രുതഗതിയില്‍ പടികളിറങ്ങി ഞാന്‍ താഴെയെത്തി.നിറഞ്ഞ മനസ്സോടെ ,ഗംഗാ നദി കണ്‍കുളിര്‍ക്കെകണ്ടു. മഴക്കാലം അല്ലാത്തതുകൊണ്ട് ഗംഗയില്‍ നിറയെ വെള്ളമില്ല.പാതിക്കപ്പുറം മണല്പ്പുറമാണ്.നദിയിലൂടെ വള്ളങ്ങള്‍ ഒഴുകി നീങ്ങുന്നു.

ഗംഗാ നദി

അങ്ങകലെ ,ഒരു വലിയ പാലത്തിന്റെ ,വളരെ അവ്യക്തമായ ,നേര്‍ത്ത ചിത്രം.ഗംഗയില്‍ ഇറങ്ങി ,കയ്യും മുഖവും കഴുകി.നോക്കെത്താ ദൂരത്തോളം നീണ്ടു ഒഴുകുന്ന ഗംഗ.ഇടതുവശതെല്ലാം അനേകം സ്നാന ഘട്ടുകള്‍.100 ഓളം ഘട്ടുകള്‍ ഉണ്ടെന്നു അവിടെ കണ്ട ഒരു പുരോഹിതന്‍ പറഞ്ഞു.

ഗംഗയിലെ ഘട്ടുകള്‍

ഏറ്റവും പ്രധാനമായത് ദശാശ്വമേധാ ഘട്ടാണ്.ഈ ഘട്ടിലെക്കുള്ള ചെറിയ വഴിയില്‍ ആണ് വിശ്വപ്രസിദ്ധമായ കാശി വിശ്വനാഥ ക്ഷേത്രം. ഒന്ന്ചുറ്റിക്കറങ്ങി,ഏറ്റവുംകൂടുതല്‍ശവസംസ്കാരം

നടക്കുന്നമണികര്‍ണ ഘട്ടും സന്ദര്‍ശിച്ചപ്പോഴേക്കും വൈകുന്നേരമായി..

ഒരു സാ‍രീ വില്‍പ്പന കേന്ദ്രം

ഇനി പട്ടണം ഒന്ന് കറങ്ങി കാണണം.ബനാറസ് സാരീ വില്‍ക്കുന്ന കടകളിലും ഒരു ചെറിയ ഷോപ്പിംഗ്‌ നടത്തണമെന്നുണ്ട്.സുഹൃത്ത്‌ ബിസ്സിനസ്സ് മീറ്റിംഗ് കഴിഞ്ഞു തിരികെയെത്തി കൂടെ ചേര്‍ന്നു.യാത്രയുടെ ലക്‌ഷ്യം വിജയിച്ചതിന്റെ സന്തോഷത്തിലാണ് ആള്‍.പരിമിതമായ സമയം മൂലം കാശി ക്ഷേത്രവും, വിശ്വ പ്രസിദ്ധമായ ബനാറസ്‌ ഹിന്ദു സര്‍വകലാശാലയും നാളെ ഉച്ചക്ക് മുന്‍പ് സന്ദര്‍ശിക്കാമെന്ന് തീരുമാനിച്ചു.അപ്പോഴെക്കും,ഘട്ടുകളില്‍ ,നിത്യവും നടക്കുന്ന ചടങ്ങുകളുടെ ഭാഗമായ ആരതി തുടങ്ങിയിരുന്നു.ദീപങ്ങളുമായി,നര്‍ത്തകര്‍ താളത്തിനൊപ്പം,ചുവടു വയ്ക്കുന്നു.മനോഹരമായ ഈ കാഴ്ച കാണുവാനായി,വിദേശികളടക്കം ,ഒരു വലിയ ജനക്കൂട്ടം തന്നെയുണ്ട്‌.

സിറ്റിയിലെക്കിറങ്ങി. എങ്ങോടെന്നില്ലാതെ ഒഴുകുന്ന ജനക്കൂട്ടം.വീതി കുറഞ്ഞ തെരുവുകള്‍.ശരീരത്തോട് മുട്ടിയുരുമ്മി പോകുന്ന സൈക്കിള്‍ റിക്ഷകളും ഓട്ടോകളും.അതിനിടയിലൂടെ നാല്‍ക്കാലികളും.കുറെ സാരീ ഷോപ്പുകളില്‍ കയറിയിറങ്ങി,അത്യാവശ്യം സാധനങ്ങള്‍ വാങ്ങി.അപ്പോഴാണ്‌ സുഹൃത്തിനു ഒരു സൈക്കിള്‍ റിക്ഷ സവാരി നടത്താന്‍ മോഹം.

നഗരത്തിലെ തെരുവ്

മുന്‍‌കൂര്‍ തുക പറഞ്ഞുറപ്പിച്ചു,ഒന്നിലേക്ക് കയറി.ഇതിനു ബ്രെയിക്ക് ആവശ്യമില്ല എന്ന് പെട്ടെന്നാണ് മനസ്സിലായത്‌.മുന്‍പില്‍ പോകുന്ന റിക്ഷയുടെ പുറകില്‍ ചെന്നിടിച്ചാണ് ഇത് നിര്‍ത്തുന്നത്.പുറകെ വരുന്നവരും അതുപോലെ തന്നെ.2 കി മി യാത്ര കഴിഞ്ഞപ്പോള്‍ നടുവ് ഒരു പരുവമായി.160 കിലോ ഭാരവും വഹിച്ചു ,ഇടിച്ചും ഇടിക്കപ്പെട്ടും ,ഞങ്ങളുടെ ,മെലിഞ്ഞു ഉയരം കൂടിയ പാവംറിക്ഷക്കാരന്‍, ഒരു വിധത്തില്‍ ഞങ്ങളെ ഹോട്ടലില്‍ എത്തിച്ചു.വണ്ടിക്കൂലിയുടെ കൂടെ കുറച്ചു തുക അധികം ചേര്‍ത്ത് കൊടുത്തു ,അയാളെ സന്തോഷ സമേതം യാത്രയാക്കി.ലളിതമായ രാത്രി ഭക്ഷണത്തിന് ശേഷം ,ഉറങ്ങുവാന്‍ കിടന്നു.പകല്‍ നേരത്തെ അധ്വാനത്തിന്റെ ക്ഷീണം കാരണം കിടന്ന പാടെ ഉറങ്ങി.

പിറ്റേന്ന് അതിരാവിലെ ഉണര്‍ന്നു,നേരെ ഗംഗയിലെക്കുള്ള ഗള്ളിയിലൂടെ നടന്നു.ഒപ്പം സുഹൃത്തും.നേരം പുലര്‍ന്നു വരുന്നതേയുള്ളൂ.രാവിലെ തന്നെ തിരക്ക് തുടങ്ങിയിരിക്കുന്നു.വീതി കുറഞ്ഞ വഴിയിലൂടെ തിങ്ങി നിറഞ്ഞു നീങ്ങുന്ന ജനക്കൂട്ടം.അതിനിടയിലൂടെ ഞങ്ങള്‍ കുളിക്കടവിലെത്തി,ഗംഗയില്‍ നന്നായൊന്നു മുങ്ങി,തിരികെക്കയറി.അവാച്യമായ ഒരു അനുഭൂതി തന്നെ,അത്.പറഞ്ഞറിയിക്കാനവാത്ത ഒരു ഉന്മേഷം,മനസ്സിനും ശരീരത്തിനും.

ഇപ്പോള്‍ ഞങ്ങള്‍ കാശി വിശ്വനാഥ ക്ഷേത്രത്തിലേക്കുള്ള ,ഇടുങ്ങിയ വഴിയിലാണ്.ശ്വാസം മുട്ടിക്കുന്ന ജനത്തിരക്ക്.ഒരു മുഴത്തിനു പത്തു പോലീസ്കാര്‍ വീതമുണ്ട്. മൊബൈലും ക്യാമറയും അനുവദനീയമല്ല എന്ന് രമേശ്‌ നേരത്തെ അറിയിച്ചിരുന്നതുകൊണ്ടു,അവ സമീപത്തുള്ള കേരള കഫെയില്‍ ഏല്‍പ്പിച്ചിരുന്നു.

വഴിയുടെ ഇരു വശത്തും കടകള്‍ ആണ്.ഗംഗ ജലവും,കുങ്കുമവും,വിഗ്രഹങ്ങളും,ചെറിയ ചെപ്പുകളും തുടങ്ങി ഒട്ടനനവധി സാധനങ്ങള്‍ വില്‍ക്കുന്ന കടകള്‍.അവിടെ കൂടി നിന്നു മാര്‍ഗ തടസ്സമുണ്ടാക്കുന്ന ആളുകളും,കടക്കാരും.ഇപ്പോള്‍ ഒരു ക്യൂ രൂപാന്തരപ്പെട്ടിട്ടുണ്ട്.ഞങ്ങളും ആ ക്യൂവില്‍ നിന്നു.,എല്ലാവരെയും വിശദമായി പരിശോധിക്കുന്ന പോലീസുകാര്‍.കൂടെ വനിതാ പോലീസും.ശിവ ലിംഗത്തില്‍ അഭിഷേകം ചെയ്യുന്നതിനുള്ള പാല് വില്ക്കുന്ന കടക്കാര്‍ കൈ കാണിച്ചു വിളിക്കുന്നു.ഞങ്ങള്‍ ഓരോ ചെറിയ പാത്രം പാല് വാങ്ങി.ക്യൂ ക്ഷേത്രത്തിനു സമീപത്തെത്തിയിട്ടുണ്ട്.ക്ഷേത്രത്തിനകത്ത് പ്രവേശിച്ചു.അതാ വലതു ഭാഗത്തായി,ശിവലിംഗം.സാക്ഷാല്‍ കാശി വിശ്വനാഥ ശിവ ലിംഗം.സമീപത്തു പൂജാരി ഉണ്ടെങ്കിലും ,നമ്മള്‍ക്ക് തന്നെ അഭിഷേകം നടത്താം. തൊട്ടു തൊഴുകുകയുമാവാം.പാല്‍ അഭിഷേകം നടത്തി ,തൊട്ടു തൊഴുതു, പൂജാരിയില്‍ നിന്നും പ്രസാദം വാങ്ങി ഞങ്ങള്‍ പുറത്ത് കടന്നു.കനത്ത സെക്യൂരിട്ടിയാണെങ്ങും.പലരുടെയും മൊബൈലും ക്യാമറയും ,പോലീസുകാര്‍ ദേഹപരിശോധന നടത്തി പിടി കൂടുന്നത് കണ്ടു.ദര്‍ശനം കഴിഞ്ഞു മടങ്ങുന്നവര്‍ക്ക് അവ തിരികെ നല്‍കുന്നുമുണ്ട്തിരികെ വരുന്നവരെ പിടികൂടാനായി, കടക്കാരും, ധാരാളമായുണ്ട്.ഞങ്ങള്‍ ഒരുവിധത്തില്‍ ആ പാതയിലൂടെ പുറത്തിറങ്ങി.കേരള കഫെയില്‍ നിന്നും നല്ല ഇഡലിയും കഴിച്ചു,ക്യാമറയുമെടുത്ത് ഒന്ന് കൂടി ക്ഷേത്രത്തിലേക്കുള്ള വഴിയിലേക്ക് നടന്നു.

വിശ്വനാഥ ക്ഷേത്രത്തിലെക്കുള്ള റോഡ്

അകത്തുള്ള പോലീസ് ചെക്ക്‌ പോസ്റ്റ്‌ വരെ ക്യാമറ ഉപയോഗിക്കുവാന്‍ കുഴപ്പമില്ല.അതിനാല്‍ അതുവരെ കുറച്ചു ചിത്രങ്ങള്‍ എടുക്കുവാന്‍ സാധിച്ചു.അവസാനം പ്രവേശന കവാടത്തിന്റെ ചിത്രം കൂടി എടുത്തുകളയാം എന്ന് കരുതി ,ക്യാമറ എടുത്തപ്പോഴേക്കും കാവല്‍ക്കാരന്‍ ഓടിയെത്തി തടഞ്ഞു.

ക്ഷേത്രത്തിന്റെ പ്രവേശന ഗോപുരം

സമയം എട്ടരയായി,ഇനി ക്ഷണത്തില്‍ ബനാറസ് സര്‍വകലാശാല കൂടി ഒന്ന് ചുറ്റിക്കറങ്ങണം.ഒരു ഓട്ടോക്കാരന്‍ അടുത്തു കൂടിയിട്ടുണ്ട്.സര്‍വ കലാശാല ഒന്ന് ചുറ്റിക്കാണിക്കുവാന്‍ മുന്‍‌കൂര്‍ തുക പറഞ്ഞുറപ്പിച്ചു,ഓട്ടോയില്‍ കയറി.അര മണിക്കൂര്‍ നേരത്തെ യാത്രയാണ്,അവിടം വരെ. ബസ്‌ സ്റ്റാന്റ് പരിസരമെത്തിയപ്പോള്‍ നല്ല ട്രാഫിക് ബ്ലോക്ക്‌.അതില്‍ നിന്നും ഒരു പ്രകാരം രക്ഷപെട്ടു,വീണ്ടും മുന്നോട്ടു. തലയുയര്‍ത്തിപ്പിടിച്ചു ,നില്‍ക്കുന്ന കമനീയമായ പ്രവേശന കവാടം കണ്മുന്നില്‍. പണ്ഡിറ്റ് മദന്‍ മോഹന്‍ മാളവ്യ 1916-ല്‍ സ്ഥാപിച്ച,ഈ സര്‍വ്വകലാശാല,ഇന്നു ലോകത്തിലെ തന്നെ മുന്‍ നിര സര്‍വ്വകലാശാലകളിലൊന്നാണു.

ബനാറസ് സര്‍വ്വകലാശാലയുടെ കവാടം

കവാടത്തിലൂടെ അകത്തു കടന്നു.വിദ്യാര്‍ഥികളും ,അല്ലാത്തവരുമായ നൂറു കണക്കിനാളുകള്‍ ,വിശാലമായ റോഡിലൂടെ അകത്തേക്ക് പോകുന്നത് കാണാം.കൂടുതല്‍ പേരും സര്‍വ കലാശാലയുടെ ഭാഗമായിട്ടുള്ള,മെഡിക്കല്‍ കോളേജിലേക്കുള്ള രോഗികളും മറ്റു സന്ദര്‍ശകരുമാണ്.

അവിടം പിന്നിട്ടു,ഓട്ടോ പിന്നെയും മുന്നോട്ടു നീങ്ങി.വിസ്തൃതമായ റോഡിനിരുവശവും,പൌരാണിക പ്രൌഢിയുള്ള കെട്ടിടങ്ങള്‍ തലയുയര്‍ത്തി നില്‍ക്കുന്നു.സര്‍വ കലാശാലയിലെ വിവിധ ഡിപ്പാട്ട്മെന്റുകളാണവ.അവക്കു അലങ്കാരമായി,വന്‍ വൃക്ഷങ്ങളും,മറ്റു സസ്യ ജാലങ്ങളും.

ഈ സര്‍വകലാശാലയ്ക്ക് രണ്ടു ക്യംപസ്സുകളാണുള്ളത്. പ്രധാന ക്യാമ്പസും,പിന്നെ 2006-ല്‍ സ്ഥാപിക്കപ്പെട്ട രാജീവ്‌ ഗാന്ധി ക്യാമ്പസും.2760 ഏക്കര്‍ വിസ്തൃതിയിലാണ്,ഈ പുതിയ ക്യാമ്പസ്‌.എഞ്ചിനീയറിംഗ്,മെഡിക്കല്‍,അഗ്രിക്കള്‍ച്ചര്‍ എന്നീ ഇന്‍സ്ട്ടിട്യൂട്ടുകള്‍ കൂടാതെ ,140 ഡിപ്പാട്ട്മെന്റുകളും പ്രധാന ക്യാമ്പസില്‍ പ്രവര്‍ത്തിക്കുന്നു.

സിവില്‍ എഞ്ചിനീയറിംഗ് വിഭാഗം

34 വിദേശ രാജ്യങ്ങളില്‍ നിന്നുള്ള വിദ്യാര്‍ഥികള്‍ ഉള്‍പ്പടെ,ഏകദേശം 20000ത്തോളം പേര്‍ ഇവിടെ പഠിക്കുന്നുണ്ടെന്നാണ്,കണക്ക്.60 ഹോസ്റ്റലുകളും ഇതിനകത്തുണ്ട്.കൂടാതെ ഹെലിപാഡ്,എയര്‍ സ്ട്രിപ്,ബാങ്കുകള്‍ ,കാന്റീന്‍ ,തുടങ്ങി എല്ലാ വിധ സൌകര്യങ്ങളും ഇതിനകത്ത് ലഭ്യമാണ്.പ്രധാന മന്ദിരങ്ങള്‍ എല്ലാം കണ്ടു,ഞങ്ങള്‍ പുറത്തിറങ്ങി.സമയം12മണിയോടടുക്കുന്നു.ഞങ്ങള്‍ക്ക് ,പുറപ്പെടാനുള്ള സമയമായിതുടങ്ങി..ഹോട്ടലില്‍ മടങ്ങിയെത്തി,സാധനസാമഗ്രികളെല്ലാമെടുത്ത്,രമേശനോടൊപ്പം,എയര്‍ പോര്‍ട്ടിലേക്ക് പുറപ്പെട്ടു.
ഇത്തവണ,കാര്യമായ തടസ്സങ്ങളില്ലാതെ,ബബത് പൂരിലെത്തി.രമേശനോടു,യാത്രയും,നന്ദിയും പറഞ്ഞു അകത്തു പ്രവേശിച്ചു.വിമാനത്താവളത്തില്‍,നിറയെ വിദേശ സഞ്ചാരികള്‍ ആണ്..ദില്ലി വഴി,വൈകുന്നേരമുള്ള വിമാനത്തില്‍,കൊച്ചിക്ക്‌ മടങ്ങാനാണ് പരിപാടി.കൂട്ടുകാരന്‍,ചെറു മയക്കത്തിനുള്ള തയ്യാറെടുപ്പുകള്‍ നടത്തുന്നു.ഇനി പുതിയൊരു യാത്രക്കുള്ള സ്വപ്നങ്ങളുമായി,ദില്ലിയിലേക്കുള്ള ,കിംഗ്‌ ഫിഷര്‍ വിമാനവും കാത്തു ഞാനിരുന്നു.

(ഇതിലുള്ള ചില ചിത്രങ്ങള്‍ക്കു ഗൂഗിളിനോടു കടപ്പാട് )

അപ്പര്‍ കുട്ടനാട്-ചില ചെറു കാഴ്ചകള്‍ (തീരെ ചെറുത് )

2010-01-10T13:25:00.000+05:30

കുട്ടനാടിന്റെ ഫോട്ടോകള്‍ പലരും പോസ്റ്റ്‌ ചെയ്തിട്ടുണ്ട് എന്നറിയാം...ഗ്രാമീണ ഭംഗിയുടെയും.റാണിയുടെ വര്‍ണ്ണക്കാഴ്ചകളില്‍ , (ranidv.blogspot.കോം) ,കുറച്ചു മണിക്കൂറുകള്‍ക്കുമുന്‍പ് പോലും ഗ്രാമീണ ഭംഗി തുളുമ്പുന്ന ഫോട്ടോ കണ്ടിരുന്നു.എങ്കിലും,അടുത്തിടെ അപ്പര്‍ കുട്ടനാട് എന്ന് വിളിക്കപ്പെടുന്ന ഭാഗങ്ങളിലൂടെ യാത്ര ചെയ്തപ്പോള്‍ കണ്ട ചില ചെറു കാഴ്ചകള്‍ ഒരു സന്തോഷത്തിനായി ,പോസ്റ്റ്‌ ചെയ്യുന്നു.

ഞങ്ങള്‍ ലോവര്‍ മലനാട്ടുകാര്‍ക്ക് ഇപ്പോള്‍ അന്യമായിക്കഴിഞ്ഞിരിക്കുന്ന നെല്ല് കൃഷി ,അതും ഇത്രയും വിശാലമായ വിസ്തൃതിയില്‍ കണ്ടപ്പോള്‍ ,വളരെ സന്തോഷം തോന്നി.
കുട്ടനാടും പരിസരത്തുമുള്ളവര്‍ക്ക്ഇതൊരുപുതുമയുള്ള കാഴ്ചയല്ല.എന്നാല്‍, നോക്കെത്താ ദൂരത്തോളം നീണ്ടു കിടക്കുന്ന നെല്‍പ്പാടങ്ങള്‍ ,എന്നെപ്പോലുള്ള പുറം(റബ്ബര്‍) നാട്ടുകാരില്‍ അതിശയം ജനിപ്പിക്കുന്നു.

ഏതാനും വര്‍ഷങ്ങള്‍ മുന്‍പ് വരെ യാത്രാ സൌകര്യങ്ങള്‍ തുലോം കുറവായിരുന്ന ഒരു പ്രദേശമായിരുന്നു ഇവിടം.എന്നാല്‍,ഇപ്പോള്‍ ഈ ഭാഗത്തെല്ലാം ധാരാളം റോഡുകളായി.വീതി അല്പം കുറവാണു ,ബസ് സര്‍വ്വീസും ഈ വഴിയുണ്ട്.

ഇത് കോട്ടയം- ചങ്ങനാശ്ശേരി എം സീ റോഡില്‍ ,തുരുത്തി ജങ്ങ്ഷനില്‍ നിന്നും പടിഞ്ഞാറ് ഭാഗത്തേക്കുള്ള റോഡിലൂടെ ,മുളയ്ക്കാംതുരുത്തി,കിടങ്ങറ ,കാവാലം വഴി ആലപ്പുഴക്ക് പോയപ്പോള്‍ കണ്ട കാഴ്ചയാണ്.എം സീ റോഡില്‍ നിന്നും വെറും 2 കി മി അഥവാ വെറും 4 മിനിറ്റ് യാത്ര ചെയ്‌താല്‍ ഈ മനോഹര കാഴ്ച ലഭിക്കും.ആലപ്പുഴചങ്ങനാശ്ശേരിറോഡിലും ഈ കാഴ്ച ലഭിക്കും.പക്ഷെ വാഹനത്തിരക്ക് കൂടുതലാണ് എന്ന് മാത്രം.. ഇത്രയും വിശാലമായി നെല്ല് കൃഷി ചെയ്യുന്ന ഭാഗങ്ങള്‍ കേരളത്തില്‍ ഇനിയും അവശേഷിക്കുന്നു എന്നുള്ളത് വളരെ ആശ്വാസകരമായ കാര്യമാണ്.നെല്ല് കൃഷി വിശാലമായി ഉണ്ടെന്നുള്ളതും,നെല്ലിനു ന്യായമായ വില ലഭിക്കുന്നു എന്നുള്ളതും ആശ്വാസകരമായ കാര്യങ്ങളാണെങ്ങിലും,ജോലിക്കാരുടെ ദൌര്‍ ലഭ്യമാണ്, ഇവിടത്തെ പ്രധാന പ്രശ്നമെന്ന് എന്നോടപ്പമുണ്ടായിരുന്ന ബന്ധു സൂചിപ്പിച്ചു.ഇപ്പോള്‍
ആധുനിക യന്ത്രങ്ങളുടെ വരവോടെ പ്രശ്നങ്ങള്‍ക്ക് ഒരു പരിധി വരെ പരിഹാരമായിട്ടുന്ടെന്നു തോന്നുന്നു.

വേറെ ഒരു കാര്യം ഈ വഴിയില്‍ ലഭിക്കുന്ന ഭക്ഷണത്തെക്കുറിച്ചാണ്.നല്ല കായല്‍ വിഭവങ്ങള്‍ അടങ്ങിയ ഭക്ഷണം ലഭിക്കുന്ന കള്ള് ഷാപ്പുകള്‍ ഈ വഴിയില്‍ ഉണ്ട്.കള്ള് ഷാപ്പ്‌ എന്ന് കേട്ട് നെറ്റി ചുളിക്കെണ്ടതില്ല.സകുടുംബം, വളരെന്യായമായനിരക്കില്‍കരിമീന്‍,കൊഞ്ച്,ചെമ്മീന്‍ തുടങ്ങിയ മത്സ്യ വിഭവങ്ങള്‍ ആസ്വദിക്കാവുന്ന ഒന്നാതരം ഭക്ഷണ ശാലകളാണവ(എല്ലാം അങ്ങനെയല്ലെങ്ങിലും.)

ഇങ്ങനെയോക്കെയാണെങ്ങിലും ,പ്രധാന കായലുകളോടൊപ്പം,ഇടയിലുള്ള കൈത്തോടുകളും,മാലിന്യത്തില്‍
നിന്നുംമുക്തമല്ല.
വെയില്‍ചാഞ്ഞുവരുന്നസയാഹ്നങ്ങളാണുഇവിടെസന്ദര്‍ശനത്തിനുത്തമം.ഇളംകാറ്റ് കൊണ്ടുള്ള ഇരിപ്പിന്റെ സുഖം
പറഞ്ഞറിയിക്കാവുന്നതല്ല. ഞങ്ങളുടെ ഇത് വഴിയുള്ള യാത്ര നട്ടുച്ചക്കായിപ്പോയി. വെയിലിനു ശക്തി കൂടിക്കൂടി വരുന്നു.ഒരു ബലപരീക്ഷണത്തിന് മുതിരാതെ തിരികെ വാഹനത്തിലേക്ക്..........

ഇടുക്കി ജില്ലയിലെ ചില കാഴ്ചകള്‍

2010-01-05T09:38:00.005+05:30

ഇടുക്കി ജില്ലയിലെ ചില കാഴ്ചകള്‍ കൂടി

ഇ ഇത്തവണ ചില ചിത്രങ്ങള്‍.കുറച്ചു വ്യക്തതക്കുറവുണ്ട്.

. .

വാളറക്കുത്ത് വെള്ളച്ചാട്ടം

നേര്യമംഗലം കഴിഞ്ഞു,മൂന്നാര്‍ റോഡില്‍ 1൦ കി മി കഴിയുമ്പോഴാണ് മനോഹരമായ വാളറക്കുത്ത് വെള്ളച്ചാട്ടം

ദേവികുളത്തെ കാഴ്ചകള്‍

ദേവി കുളത്ത് നിന്നും സൂര്യനെല്ലി /പൂപ്പാറ റോഡില്‍ മേഘങ്ങള്‍ താഴേക്കിറങ്ങുന്ന കാഴ്ച

ദേവികുളത്തെ കാഴ്ചകള്‍

ചിന്നക്കനാലിലെ വെള്ളച്ചാട്ടം

ചിന്നക്കനാല്‍ എത്തുന്നതിനു തൊട്ടു മുന്‍പുള്ള വെള്ളച്ചാട്ടം

ചിന്നക്കനാല്‍ വെള്ളച്ചാട്ടം:ഒരു വിദൂര ദൃശ്യം

പൊന്മുടി ഡാം

പൊന്മുടി ഡാം ,അടിമാലിയില്‍ നിന്നും രാജാക്കാടിനു പോകുന്ന വഴിയില്‍ ആണ്.അധികം സന്ദര്‍ശകരില്ലാത്ത ഒരു പ്രദേശമാണിത്.അടിമാലിയില്‍ നിന്നും ഏകദേശം 45 മിനിറ്റ് യാത്ര..ഇവിടെ നിന്നും രാജാക്കാട്,രാജകുമാരി വഴി പൂപ്പാറയിലെത്തി ചിന്നക്കനാല്‍ വഴി 75 മിനിറ്റ് കൊണ്ട് മൂന്നാറിലെത്താം

പൊന്മുടി ഡാം

കോവില്‍ക്കടവ് ഗ്രാമം

ഇത്കോവില്‍ക്കടവ്.മറയൂരില്‍നിന്നും കാന്തല്ലുരിനു പോകുന്ന വഴിയിലുള്ള ചെറിയ ഗ്രാമം.വിശാലമായ ഒരു ഭൂവിഭാഗത്തിനു നടുവിലായാണ് ഈ ഗ്രാമം സ്ഥിതി ചെയ്യുന്നത്.

ഇടുക്കി ജില്ല-വണ്ടിപ്പെരിയര്‍-ഗവി

2010-01-02T21:34:00.001+05:30

അവസാനിക്കാത്ത കാഴ്ചകള്‍ ഒളിഞ്ഞിരിക്കുന്ന ഇടുക്കി ജില്ലയിലെ വണ്ടിപ്പെരിയാര്‍ -ഗവി മേഖലയിലേക്ക് ആയിരുന്നു ഇത്തവണത്തെ യാത്ര.സഞ്ചാര തത്പരരായ രണ്ടു സ്നേഹിതരും കൂടെയുണ്ടായിരുന്നു ഈ യാത്രയില്‍.

കഴിഞ്ഞ കുറെ നാളുകളായി ഗവി ട്രിപ്പ്‌ പ്ലാന്‍ ചെയ്തിട്ട്.യാത്ര എന്ന് കേള്‍ക്കുന്ന മാത്രയില്‍, ബാഗുമായി വരുന്ന രണ്ടു സ്നേഹിതരോടോപ്പമാണ് സഞ്ചാരം. അവസാനം, ഒരുതിങ്കളാഴ്ച വെളുപ്പിന് പോകാം എന്ന് തീരുമാനിച്ചു. എന്നാല്‍, പരിപാടി ,നേരത്തെയാക്കി എന്ന് മനസ്സിലായത്‌ ,ഞായറാഴ്ച ഉച്ചക്ക് ശേഷം സ്നേഹിതന്റെ   വാഹനം എന്റെ വീട്ടുമുറ്റത്ത്‌ എത്തിയപ്പോള്‍ മാത്രമാണ്.വേഗം തന്നെ പാക്കിംഗ് എല്ലാം പൂര്‍ത്തിയാക്കി, ബാഗുമെടുത്ത്‌ വാഹനത്തില്‍ കയറിയപ്പോഴും,, ഏതു വഴി പോകണമെന്ന് തീരുമാനിച്ചിട്ടില്ലായിരുന്നു
.
തൊടുപുഴ ,മൂലമറ്റം വഴി, ഹെയര്‍ പിന്‍ വളവുകള്‍ കയറി വാഹനം ഇടുക്കി റോഡിലൂടെ ഓടിക്കൊണ്ടിരുന്നു.തൊടുപുഴ- പുളിയന്മല സ്റ്റേറ്റ് ഹൈവേ ആണ് ഇത്.പോകുന്ന വഴിയില്‍ റോഡിനു നടുവില്‍ ,മല മുകളില്‍ ഉള്ള ഒരു കിണര്‍ ,കൌതുകകരമായ കാഴ്ചയാണ്. 12 ഹെയര്‍ പിന്‍ വളവുകള്‍ താണ്ടി വേണം മുകളില്‍ എത്തുവാന്‍.അങ്ങിനെ, ഒരു വാച്ച് ടവര്‍ ഉള്ള   നാടുകാണി എന്ന സ്ഥലത്തെത്തി.നാടുകാണി സമുദ്രനിരപ്പില്‍ നിന്നും ഏകദേശം 3000 അടി ഉയരത്തില്‍ സ്ഥിതി ചെയ്യുന്നു.സുഖ ശീതളമായ കാലാവസ്ഥയാണ് അവിടെ.നല്ലരീതിയില്‍ പ്രവര്‍ത്തിക്കുന്ന ഗ്രീന്‍ ബെര്‍ഗ് എന്ന റിസോര്‍ട്ടും ഉണ്ട് ഇവിടെ.തെളിഞ്ഞ കാലാവസ്ഥയില്‍ നാടുകാണി വ്യൂ ടവറില്‍  നിന്ന് നോക്കിയാല്‍ മുവാറ്റുപുഴ,എറണാകുളം ഭാഗങ്ങളൊക്കെ കാണാമത്രെ.നാടുകാണി ആയാല്‍ പിന്നെ ഏറെക്കുറെ നിരപ്പായ റോഡുകള്‍ ആണ്.

വീണ്ടും യാത്ര.ഒരുമയക്കത്തില്‍ നിന്നും ഉണര്‍ന്നത് വാഹനം നിന്നപ്പോള്‍  ആണ്.തൊട്ടു വലതു ഭാഗത്തായി ഹോട്ടല്‍ എവെറെസ്റ്റ്.നാടന്‍ ഭക്ഷണങ്ങള്‍ക്ക്‌ പേരുകേട്ട, ചെറുതോണിക്കടുത്തുള്ള ,  ചപ്പാത്തില്‍ ഉള്ള, ഒരു ഹോട്ടല്‍ ആണ് എവെറെസ്റ്റ്.കുമളിയില്‍ എത്തുവാന്‍,വിശാലമായ കെ കെ റോഡ്‌ ഉള്ളപ്പോള്‍ നിബിഡ  വനമായ കുളമാവ്,കുടയുരുട്ടി ,ചെറുതോണി    വഴി വന്നതിന്റെ ഉദ്ദേശം  ഇപ്പോള്‍  ആണ്    മനസ്സിലായതു.ജോസ് ചേട്ടന്റെ സ്പെഷ്യല്‍ ഐറ്റംസ് ആയ അപ്പവും, മുയല്‍ റോസ്റ്റും എത്തി.കൂടെ വറുത്തരച്ച നാടന്‍ കോഴിക്കറിയും ഇടിയിറച്ചിയും.ആനന്ദലബ്ധിക്കു ഇനി എന്ത് വേണം? .

ഇടുക്കി ആര്‍ച് ഡാം

ഭക്ഷണം കഴിഞ്ഞു വീണ്ടും കാറിലേക്ക് .മയക്കത്തില്‍ ആയിപ്പോയത് കൊണ്ട് കുളമാവ് ഡാമിന്റെയും,വഴിയില്‍ മീന്മുട്ടിയില്‍ കണ്ട കാട്ടാനകളുടെയും ഫോട്ടോസ് എടുക്കാന്‍ പറ്റിയില്ല.അല്ലെങ്കിലും ഡാമിന്റെ ഫോട്ടോയൊക്കെ എടുക്കുന്നത് പുലിവാല്‍ആകും. ഹോട്ടലിന്റെ പിന്‍ഭാഗത്താണ് ഇടുക്കി ആര്‍ച് ഡാം .അതിന്റെ വിശാലമായ കാഴ്ച ഇവിടെ നിന്നും ലഭിക്കും.
ആര്‍ച് ഡാമിന്റെ നടു ഭാഗത്ത്‌ മാത്രം പായല്‍ ഇല്ല.രണ്ടു വശങ്ങളിലും പായല്‍ കാണാം.എന്താണ് കാര്യം എന്നു മനസ്സിലായോ?ആലോചിച്ചു നോക്കു.
യാത്ര ,കട്ടപ്പന,പുളിയന്മല,വിമാനത്താവളം വരാന്‍ പോകുന്ന അണക്കര എന്നീ സ്ഥലങ്ങള്‍ പിന്നിട്ടു കുമളിയില്‍ എത്തി.കുമളിയില്‍, സ്ഥിരതാവളം ഹോട്ടല്‍ കുമളി ഗേറ്റ് ആണ്.നല്ല താമസ, ഭക്ഷണ സൌകര്യങ്ങള്‍ ഉള്ള, ഒന്നാന്തരമൊരു 2 സ്റ്റാര്‍ ഹോട്ടല്‍ ആണ് ഹോട്ടല്‍ കുമളി ഗേറ്റ്. കുമളിതണുപ്പില്‍ പുതച്ചു നില്‍ക്കുകയാണ്.മാനേജര്‍ സാബു, സ്ഥിരം മുറി തുറന്നു തന്നു.ഈ തണുപ്പിലേക്ക് ഇനി ഞങ്ങളും.!!

കുമളി ഗേറ്റ് ഹോട്ടല്‍

   പിറ്റേന്ന് അതി രാവിലെ പ്രഭാത സവാരിക്കായി ഇറങ്ങി.തേക്കടി തടാകത്തിലെക്കുള്ള ചെക്ക്‌ പോസ്റ്റ്‌ വരെ നടന്നു.നല്ല  കാലാവസ്ഥയില്‍ ,റോഡില്‍ നിറയെ പ്രഭാത സവാരിക്കാര്‍.തിരികെ ഹോട്ടലില്‍ എത്തി,ഗവി യാത്രയെക്കുറിച്ചുള്ള പദ്ധതി തയ്യാര്‍  ആണ് .മാനേജര്‍ സാബു പ്രോഗ്രാം തയ്യാറാക്കി കഴിഞ്ഞിരിക്കുന്നു.

ഹോട്ടലില്‍ നിന്നും,പ്രഭാത ഭക്ഷണത്തിന് ശേഷം പുറപ്പെട്ടു.കുമളി പട്ടണത്തില്‍ ‍നല്ല തിരക്ക്. തേക്കടി ദുരന്തത്തിന് ശേഷവും സഞ്ചാരികളുടെ വരവിനു കുറവൊന്നുമില്ല.സുഗന്ധ വ്യഞ്ജനങ്ങള്‍ വില്‍ക്കുന്ന കടകളിലെല്ലാം രാവിലെ മുതല്‍ തന്നെ തിരക്ക് തുടങ്ങിയിരിക്കുന്നു.മുന്നാര്‍ റോഡില്‍ ഉള്ള ,ആന സഫാരി ഇപ്പോള്‍ ഏറെപ്പേരെ ആകര്‍ഷിക്കുന്നു
കുമളിയില്‍ നിന്നും വണ്ടിപ്പെരിയാര്‍ റോഡിലൂടെ(കെ കെ റോഡ്‌) ഏകദേശം 12 കി മി പോയാല്‍ കക്കികവല എന്ന സ്ഥലമായി.അവിടെ വനം വകുപ്പിന്റെ എക്കോ  ടൂറിസം പദ്ധതിയെ പറ്റിയുള്ള ഒരു ബോര്‍ഡ്‌ ഉണ്ട്.അവിടെ നിന്നും ഇടതു ഭാഗത്തേക്ക് തിരിഞ്ഞാല്‍ വള്ളക്കടവ് റോഡ്‌ ആയി.ആ റോഡിലൂടെ 27 കി മി ദൂരം ആണ് ഗവിക്കുള്ളത്.കുമളിയില്‍ നിന്നും ഏകദേശം 40 കിലോ മീറ്റര്‍ ദൂരം.സ്വകാര്യ വാഹനങ്ങള്‍ക്ക് വനം വകുപ്പിന്റെ അനുമതി ഉണ്ടെങ്കില്‍ മാത്രമേ വള്ളക്കടവില്‍ നിന്നും ഗവിയിലേക്ക് പോകാന്‍ സാധിക്കുകയുള്ളൂ.സാബു വനം വകുപ്പ് ഉദ്യോഗസ്ഥരുമായി ബന്ധപ്പെട്ടു അനുമതി വാങ്ങിയിരുന്നു..

.  ഗവി റോഡിന്‍റെ ആരംഭ ഭാഗത്ത്‌ നിറയെ തേയില തോട്ടങ്ങള്‍ ആണ്.ഗത കാല സ്മരണകളും പേറി നില്ക്കുന്ന വയസ്സന്‍ തോട്ടങ്ങള്‍.ഇന്നു അവയുടെ പ്രവര്‍ത്തനം എല്ലാം അവതാളത്തില്‍ ആണ്. ഒരു കി മി പോയാല്‍ ,പഴയ ബ്രിട്ടീഷ്‌ ഭരണ കാലത്തെ, വണ്ടിപ്പെരിയാര്‍ ക്ലബ്‌ കാണാം.പ്രതാപത്തിന്റെയും,പ്രതാപികളുടെയും ഈറ്റില്ലമായിരുന്ന ഇവിടം ഇന്ന് ഏറെക്കുറെ നിര്‍ജ്ജീവമാണ്.ക്ലബ്‌ ഇപ്പോഴും പ്രവര്‍ത്തിക്കുന്നുണ്ട്.

വണ്ടിപ്പെരിയാര്‍ ക്ലബ്‌

ക്ലബ്ബിന്റെ അകത്തു കയറുവാന്‍ സാധിക്കാത്തതുകൊണ്ട് ഫെന്‍സിംഗ് പോസ്റ്റുകളും ഫോട്ടോക്കുള്ളിലായിപ്പോയി.ആ പഴയ നിര്‍മ്മിതി ,അതിന്റെ ഗാംഭീര്യം ,വിളിച്ചോതിക്കൊണ്ടു നില നില്‍ക്കുന്നു.

വളഞ്ഞു പുളഞ്ഞു പോകുന്ന റോഡുകളില്‍ കൂടിയാണ് ഇപ്പോള്‍ സഞ്ചാരം.വീതി തീരെ കുറഞ്ഞ വഴി ആണ്.കുറെ ദൂരം ചെന്നപ്പോള്‍ പെരിയാര്‍ കണ്ടു തുടങ്ങി..മുല്ലപ്പെരിയാറില്‍ നിന്നും തുടങ്ങി വള്ളക്കടവ്,വണ്ടിപ്പെരിയാര്‍ വഴി അന്ച്ചുരുളിയിലെത്തി ഇടുക്കി ജലസംഭരണിയില്‍ എത്തുന്ന സാക്ഷാല്‍ പെരിയാര്‍.തീരെ ചെറിയനദിയാണ്,പെരിയാറിവിടെഏതാനും ദൂരം ചെന്നപ്പോള്‍ റോഡരുകില്‍ ചെറിയ വീടുകള്‍ കണ്ടു തുടങ്ങി.വള്ളക്കടവ് ആയിരിക്കുന്നു.
ശബരിമലയുടെ വലിയ സ്വാഗത കമാനം.വനം വകുപ്പിന്റെ ചെക്ക്‌ പോസ്റ്റ്‌ ഉണ്ടിവിടെ.അനുമതി വാങ്ങി വീണ്ടും പ്രയാണം തുടങ്ങി.സമയം ഏകദേശം 9 മണി ആയിരിക്കുന്നു.ചെക്ക്‌ പോസ്റ്റിലെ വനപാലകര്‍ വന്യ മൃഗങ്ങളെ കരുതി വേണം പോകാന്‍ എന്ന് പറഞ്ഞിരുന്നു.നിര്‍ബന്ധമായും ഇരുട്ടുന്നതിനു മുന്‍പ് തിരിച്ചു വരണമെന്നും. താമസിയാതെ കാടിന്റെ സ്വഭാവം മാറി.ഇനിയും വെളിച്ചം വീഴാത്ത ഭാഗങ്ങള്‍.ദൂരെ ഒരു വളവില്‍ നാലഞ്ചു ആനകള്‍ ഉള്ള ഒരു കൂട്ടം താഴേക്കിറങ്ങുന്നു.വാഹനം അടുത്തെത്തി,ക്യാമറ എടുത്തപ്പോഴേക്കും അവ വനത്തിനുള്ളില്‍ മറഞ്ഞു കഴിഞ്ഞു.എല്ലാവരിലും ഒരു ഇച്ഹാ ഭംഗം.സാരമില്ല ഇനിയും കാണാമല്ലോ എന്ന വിചാരത്തില്‍ വാഹനം വീണ്ടും മുന്നോട്ടു.കുറെ ദൂരെയായി ഒരു മലയില്‍ കാട്ടുപോത്തുകള്‍ മേയുന്നു.ഇവിടെ കാടിന് വന്യതയാണ്‌ സ്ഥായിയായ ഭാവം.

വന്‍ വൃക്ഷങ്ങള്‍ തിങ്ങിനിറഞ്ഞ സ്വാഭാവിക വനം

കുറച്ചുകൂടി മുന്നോട്ടു ചെന്നപ്പോള്‍ വനം വകുപ്പിന്റെ സെക്ഷന്‍ ഓഫീസ്.പെരിയാര്‍ ടൈഗര് റിസര്‍വിന് ‍കീഴില്ള്ളതാണ് ഇത്.ആനയും കാട്ടുപോത്തും ഉള്ളില്‍ കടക്കാതെ കെട്ടിടത്തിനു ചുറ്റും കിടങ്ങുകള്‍ കുഴിച്ചിരിക്കുന്നു.ഒരു ചെറിയ സ്ലാബിലൂടെ യാണ് കയറ്റവും ഇറക്കവും എല്ലാം.വൈദ്യുതിയോ നല്ല വെള്ളമോ ഇല്ലാതെ കൊടും കാട്ടില്‍,വന്യ മൃഗങ്ങളുടെ നടുവില്‍ ജീവിക്കുന്ന,കാട് സംരക്ഷിക്കുന്ന ഉദ്യോഗസ്ഥര്‍.!!

കാനന മധ്യത്തില്‍ ഉള്ള വനം വകുപ്പിന്റെ ഓഫീസ്

സഞ്ചാരികളുമായി വരുന്നജീപ്പുകള്‍ എതിരെ വരുന്നു. മേല്‍ മൂടിയെല്ലാം അഴിച്ചു മാറ്റി ,വളവുകളില്‍ ഹോറന്‍ മുഴക്കാതെ , ഒരു നിയന്ത്രണവുമില്ലാതെ, പാഞ്ഞു വരുന്ന ഇവ വന്യ മൃഗങ്ങളെക്കാള്‍ അപകടകാരികള്‍ തന്നെ.!!സഞ്ചാരികള്‍ക്ക് നിന്ന് കാഴ്ചകള്‍ കാണുന്നതിനായി പ്രത്യേക സജ്ജീകരണങ്ങളും ഇവയില്‍ ഖടിപ്പിച്ച്ചിരിക്കുന്നു.
വലതു വശത്തായിഇടിഞ്ഞു പൊളിഞ്ഞ ഒരു ക്ഷേത്രത്തിന്റെ അവശിഷ്ട്ടങ്ങള്‍.നൂറ്റാണ്ടുകളുടെ പഴക്കമുള്ളവയാവാം.അവിടെയും ആനകളുടെ സാന്നിധ്യമുണ്ട് എന്ന് ഫോട്ടോയില്‍ കാണാം.

തകര്‍ന്ന ക്ഷേത്രഅവശിഷ്ട്ടങ്ങള്‍

. . . . ഇപ്പോള്‍ കാടിന്റെ ഭാവം പെട്ടെന്ന് മാറിയിരിക്കുന്നു.തുറസ്സായ പുല്‍മേടുകള്‍ കണ്ടു തുടങ്ങി.അങ്ങ് ദൂരെ വരെ കാണാവുന്നത്ര നേര്‍ രേഖയിലുള്ള ഒരു ഭാഗത്തുകൂടിയാണ് ഇപ്പോള്‍ പോയിക്കൊണ്ടിരിക്കുന്നത്. വലതു ഭാഗത്തെല്ലാം വലിയ പുല്‍മേടുകള്‍.

ഒരു ഇറക്കം ഇറങ്ങിയതോടെ ഡാം കാണാറായി.അതിന്റെ ജല സംഭരണിയും ദൃശ്യമായി.മനോഹരമായ നീല തടാകം,കാടിന്റെ പശ്ചാത്തലത്തില്‍.ഡാമിന് മുകളിലൂടെ അങ്ങേക്കരയിലെത്തി.സഞ്ചാരികളുമായി വന്ന വാഹനങ്ങള്‍ അവിടെ തിങ്ങി പാര്‍ക്ക് ചെയ്തിരിക്കുന്നു.അതില്‍ വിശ്രമിക്കുന്ന പൈലറ്റ്‌ /ഡ്രൈവര്‍ മാരും!!!കാട്ടിലൂടെ വാഹനം അക്ഷരാര്‍ഥത്തില്‍ ,അവര്‍, പറപ്പിക്കുക തന്നെയാണ്.

ഗവി ഡാം

സഫാരി ജീപ്പുകള്‍ (ഫ്ലയിംഗ് മെഷീന്‍സ് !!!)

പാതയുടെ ഇടതു ഭാഗത്തായി വനം വകുപ്പിന്റെ ഓഫീസ് ഉണ്ട്.ഒരു പാര്‍ക്ക് ഇവിടെ നന്നായി പരിപാലിക്കപ്പെടുന്നു.അപൂര്‍വങ്ങളായ ചില വള്ളിപ്പടര്‍പ്പുകള്‍ പടര്‍ന്നു കയറിയ ചെടികള്‍.വലിയ പൂക്കള്‍ വിരിഞ്ഞു നില്‍ക്കുന്ന ഭംഗിയുള്ള പൂന്തോട്ടം.മനോഹരമായ പുല്‍ത്തകിടികള്‍.ഇവയെല്ലാം കണ്ണിനു വിരുന്നു സമ്മാനിക്കുന്നു.തടാകത്തില്‍ ബോട്ടിംഗ് ഉണ്ട്.തേക്കടി ദുരന്തത്തിന്റെ പശ്ചാത്തലത്തില്‍ നിയന്ത്രണങ്ങളും ,സുരക്ഷ ക്രമീകരണങ്ങളും എല്ലാം കര്‍ശനമാക്കിയിട്ടുന്ടെങ്ങിലും സഞ്ചാരികള്‍ അതൊന്നും കൂസാതെ തിരക്ക് കൂട്ടി ഓടി നടന്നു ബോട്ടില്‍ കയറുന്നു.പാര്‍ക്കില്‍ പ്രവേശനത്തിന് ടിക്കറ്റ്‌ എടുക്കണം.

വലതു ഭാഗത്തായി ഗ്രീന്‍ മാന്‍ഷന്‍ ഫോറെസ്റ്റ് ലോഡ്ജു.മുന്‍‌കൂര്‍ റിസര്‍വേഷന്‍ ഉണ്ടെങ്കില്‍ ഇവിടെ താമസിച്ചു കാഴ്ചകള്‍ കാണാം.ആള്‍ ഒന്നിന് ഭക്ഷണമടക്കം ഒരു ദിവസത്തേക്ക് 1750 രൂപയാണ് നിരക്ക്.ആന,കാട്ടുപോത്ത് തുടങ്ങിയ വന്യ മൃഗങ്ങളെ അവയുടെ സ്വാഭാവിക പരിസ്ഥിതിയില്‍ കാണുവാനുതകുന്ന ഏറ്റവും നല്ല സ്ഥലങ്ങളിലോന്നാണിത്.അതി രാവിലെ, തടാകകരയില്‍ കടുവകളെയും,അപൂര്‍വ്വമായി, കാണാന്‍ സാധിക്കുമെന്ന് വനം വകുപ്പ് ഉദ്യോഗസ്ഥര്‍ പറഞ്ഞു.ഒരു ഫോറെസ്റ്റ് മ്യൂസിയവും ഇവിടെ ഉണ്ട്.

ഗ്രീന്‍ മാന്‍ഷന്‍

തടാകം

ബോട്ടിംഗ് നടത്തുന്ന തടാകം

ഇതിനു പുറകില്‍ ആയി ഒരു പുല്മെടുണ്ട്.സാമാന്യം നല്ല കയറ്റം കയറിയാല്‍, അതിന്റെ മുകളില്‍ എത്താം.അവിടെ നിന്നും ശബരിമലയുടെ വിഹഗ വീക്ഷണം ലഭിക്കും.ഒരു നല്ല കായിക അധ്വാനത്തിന് ശേഷം അവിടെ എത്തിയെങ്ങിലും ,തിങ്ങി നിറഞ്ഞ മഞ്ഞു കാരണം കാഴ്ച വ്യക്തമായില്ല.ഒരാള്‍ പൊക്കത്തില്‍ ഇവിടെ പുല്ലു വളര്‍ന്നു നില്‍ക്കുന്നു.പുലികളെ സാധാരണയായി ഇവിടെ കാണാമെന്നു,മറ്റൊരുഗ്രൂപ്പിന്റെ കൂടെ വന്ന, വനം വാച്ചര്‍ പറഞ്ഞു.വനം വകുപ്പിന്റെ ഗൈഡ് കൂടെ വന്നുള്ള കാഴ്ച മാത്രമേ ഇവിടെ അനുവദിക്കുകയുള്ളൂ.സമീപ കാലത്ത് ഈ ഭാഗത്ത്‌ വച്ച് ഒരു വിദേശ ദമ്പതികളെ ആന ആക്രമിച്ച കാര്യം പലരും ഓര്‍ക്കുന്നുണ്ടാവും

തിരികെ താഴെ എത്തിയപ്പോഴേക്കും എല്ലാവരും നന്നേ ക്ഷീണിച്ചിരുന്നു.വാഹനം മുന്നോട്ടു നീങ്ങി ,കുറച്ചു മാറി ,ഒരു വശത്ത് വാഹനം ഒതുക്കി നിര്‍ത്തി.വിശപ്പ്‌ ആക്രമണം തുടങ്ങിയോ എന്നൊരു സംശയം.സാബു തന്നയച്ച ഭക്ഷണ, പാനീയ പൊതികളിലേക്ക് എല്ലാവരുടെയും കൈകള്‍ നീണ്ടു.കുശാലായ ഭക്ഷണത്തിന് ശേഷം ,വാഹനം മുന്നോട്ടു എടുക്കുമ്പോള്‍ അത് വഴി വന്ന വാച്ചര്‍ ആണ്,കുറച്ചു താഴെയുള്ള ശ്രീ ലങ്കന്‍ തമിള്‍ വംശജരുടെ കൊളനിയെപ്പറ്റി പറഞ്ഞത്.വര്‍ഷങ്ങള്‍ക്കു മുമ്പ് താമസിപ്പിച്ച തമിള്‍ അഭയാര്‍ഥികള്‍ ആണവര്‍.സമയക്കുറവു മൂലം അതിനകത്തേക്ക് കയറിയില്ല.

മുകളില്‍ കാണുന്ന റോഡ്‌പിന്നെയുംനീളുന്നു.കൊച്ചു പമ്പ ,ആനത്തോട്,കക്കി വഴി മൂഴിയാറില്‍ എത്തുന്ന റോഡ്‌ ആണ് അത്.മൂഴിയാറില്‍ നിന്നും സീത തോട് വഴി പത്തനംതിട്ടയില്‍ എത്താം.ഇടയ്ക്കു,കൊച്ചു പംബക്കടുത്തു വച്ച് വലത്തോട്ടു തിരിഞ്ഞു പോയാല്‍ പ്രസിദ്ധമായ പൊന്നമ്പല മേട്ടില്‍ എത്താം.അവിടെ പ്രവേശനം നിരോധിച്ചിരിക്കുകയാണ്.സമയവും അതിക്രമിച്ചിരിക്കുന്നു.തിരികെ പോകുന്നതിനുള്ള സമയമായിരിക്കുന്നു.സൂര്യന്‍ മറഞ്ഞു തുടങ്ങി.സന്ധ്യക്ക്‌ മുന്‍പേ, തിരികെ പോകണമെന്നുള്ള വനം ഉദ്യോഗസ്ഥരുടെ നിഷ്ക്കര്‍ഷയും.പിന്‍ സീറ്റിലോട്ടു ചാഞ്ഞു.ചെറിയ ഒരു മയക്കം.അത് കഴിഞ്ഞു എഴുന്നേറ്റപ്പോള്‍ ,വാഹനം വള്ളക്കടവും ,കഴിഞ്ഞു വണ്ടിപ്പെരിയാര്‍ ലക്ഷ്യമാക്കി കുതിക്കുന്നു.അവിടെ പെരിയാര്‍ ഹോട്ടലില്‍ നിന്നും ഭക്ഷണവും കഴിഞ്ഞു,കെ കെ റോഡിലൂടെ കുട്ടിക്കാനം,കാഞ്ഞിരപ്പിള്ളി ,തൊടുപുഴ വഴി മടക്കം.അടുത്ത യാത്രക്കുള്ള സ്വപ്നങ്ങളുമായി.............

പാലക്കാട് ജില്ല:വരിക്കാശ്ശേരി മന

2009-12-20T15:00:00.001+05:30

ആദ്യമായി ഒരു ബ്ലോഗ്‌ പോസ്റ്റ്‌ ചെയ്തതിന്റെ സന്തോഷത്തില്‍ ആണ് ഈ പുതിയ പോസ്റ്റ്‌.

വരിക്കാശ്ശേരി മനയുടെ ചരിത്രവും മറ്റും വിവരിക്കാനുള്ള ഉദ്ദേശം ഇല്ല എന്ന് സവിനയം അറിയിച്ചു കൊള്ളട്ടെ.അതിനുള്ള അറിവ് ഇല്ലാത്തത് കൊണ്ട് മാത്രം !

ഏറെ നാള്‍ മുമ്പ് ഒരു സെപ്റ്റംബര്‍ മാസത്തില്‍ മന സന്ദര്‍ശിച്ചപ്പോള്‍ എടുത്ത കുറെ ചിത്രങ്ങള്‍ ആണ് ഇതോടൊപ്പം ചേര്‍ത്തിട്ടുള്ളത്.
ഒറ്റപ്പാലത്തെ സുഹൃത്തിന്റെ ഹോട്ടലില്‍ നിന്നും, ഭാരതപുഴയിലെത്തി മനം നിറഞ്ഞുള്ള ഒരു കുളിയും കഴിഞ്ഞു,തുളുമ്പുന്ന മനസ്സുമായി ആണ് ഗ്രാമീണ സൌന്ദര്യം വഴിഞ്ഞൊഴുകുന്ന മനിശ്ശേരിയിലെതിയത് .പഴയ ലക്ഷ്മി തീയെറ്റെര്‍ കഴിഞ്ഞു കണ്ണിയംബുരവും കയറ്റം കഴിഞ്ഞപ്പോള്‍ മനിശ്ശേരി. ഡ്രൈവര്‍ സുരേഷ്, പരിചിതമായ വഴിയിലുടെ വാഹനം തിരിച്ചു . ഗയിറ്റിനു സമീപമെത്തിയപ്പോള്‍ സൂക്ഷിപ്പുകാരന്‍ വാതില്‍ തുറന്നു തന്നു. കാഴ്ചകളുടെ ഒരു വിസ്മയ ലോകം അതാ കണ്മുന്‍പില്‍ തുറക്കപ്പെട്ടു.

വരിക്കാശ്ശേരി മന പാലക്കാട് ജില്ലയില്‍ ഒറ്റ‍പാലത്തിനു സമീപം മനിശ്ശേരി എന്ന ഗ്രാമത്തില്‍ സ്ഥിതി ചെയ്യുന്നു.ഒറ്റപാലത്ത് നിന്നും ഷൊര്‍ണൂര്‍ക്ക് പോകുന്ന സ്റ്റേറ്റ് ഹൈവേയോട് ചേര്‍ന്നുള്ള ഒരു ചെറു വള്ളുവനാടന്‍ ഗ്രാമം ആണ് മനിശ്ശേരി.അവിടെ നിന്നും തെക്കുഭാഗത്തേക്ക്‌ ഭാരതപ്പുഴയിലെക്കുള്ള ഗ്രാമീണ റോഡിനോട് ചേര്‍ന്നാണ് വിഖ്യാതമായ വരിക്കാശ്ശേരി മന.

മനയുടെ പ്രധാന നിര്‍മ്മിതി

വള്ളുവനാടന്‍ ഗ്രാമങ്ങള്‍ പശ്ചാത്തലം ആയി സിനിമകള്‍ വന്നു തുടങ്ങിയതോടെയാണ് വരിക്കാശ്ശേരി മന പ്രശസ്തിയിലെക്കുയരുന്നത്.സുപ്രസിദ്ധ സിനിമ ആയി മാറിയ ദേവാസുരത്തോടെ വരിക്കാശ്ശേരി മനയും ജന മനസ്സുകളില്‍ സ്ഥാനം പിടിച്ചു തുടങ്ങി.ഇന്ന് വള്ളുവനാട് പ്രദേശങ്ങളില്‍ നിര്‍മിക്കുന്ന സിനിമകളുടെയും സീരിയലുകളുടെയും കേന്ദ്ര ബിന്ദുവായി വരിക്കാശ്ശേരി മന മാറിക്കഴിഞ്ഞു.

മുകളിലത്തെ ഫോട്ടോയിലുള്ള പ്രധാന കെട്ട് കൂടാതെ പടിപ്പുര മാളികയും ,പടിഞ്ഞാറ് ഭാഗത്തുള്ള മാളികയും (പ്രധാനമായും ജോലിക്കാര്‍ക്കും മറ്റുമുള്ളത്‌) ഈ വിസ്തൃതമായ വളപ്പില്‍ സ്ഥിതി ചെയ്യുന്നു

പടിപ്പുര മാളിക

ഇപ്പോള്‍ മനയുടെ കാവല്‍ക്കാരും മറ്റും വസിക്കുന്നത് താഴെ ഒരു വശത്തായി കാണുന്ന പടിഞ്ഞാറു മാളികയില്‍ ആണ്.ഇത് കൂടാതെ ഒരു ക്ഷേത്രവും, വിശാലമായ ഒരു കുളവും ഇതിനുള്ളില്‍ ഉണ്ട്.നന്നായി പരിപാലിക്കപ്പെട്ടു പോരുന്ന ഒരു ക്ഷേത്രമാണിത്.നിത്യവും പൂജ നടക്കുന്ന ഇവിടെ പുറമേ നിന്നുള്ളവരും അയല്‍വാസികളും ധാരാളമായി ദര്‍ശനത്തിനു വരുന്നുണ്ട്

. . .

കുളത്തില്‍ നിറയെ മത്സ്യങ്ങള്‍ ആണ്.നമ്മള്‍ ഒരു പിടി അരി കൈവെള്ളയില്‍ പിടിച്ചു വെള്ളത്തില്‍ വച്ചാല്‍

അസംഖ്യം മീനുകള്‍ കൈവെള്ളയില്‍ കയറിയിറങ്ങും.നന്നായി നീന്താവുന്ന വിസ്തൃതിയും ഈ കുളത്തിനുണ്ട്.വളരെ ആഴംമുള്ളതാണ് ഈ കുളം.നേരത്തെ ഒരു നല്ല കുളി കഴിഞ്ഞിരുന്നതുകൊണ്ടും കുളത്തിന്റെ ആഴം അളക്കുവാന്‍ ഉദ്ദേശം ഇല്ലാതിരുന്നതുകൊണ്ടും സാഹസത്തിനു മുതിര്‍ന്നില്ല.

പ്രധാന കെട്ടില്‍ വിശാലമായ വരാന്തയും ചിത്ര നിര്‍മ്മിതികള്‍ ഉള്ള മരത്തിന്റെ തൂണുകളും ആണ്.വിശാലമായ നടുമുറ്റം, ഭക്ഷണപ്പുര ,അടുക്കള എന്നിവയും ഇതിനോടനുബന്ധിച്ചുണ്ട്.മുകളിലത്തെ രണ്ടു നിലകളിലും വിശാലമായ കിടപ്പറകള്‍ ആണ് ഉള്ളത്.വലിയ ഹാളുകള്‍ തുടങ്ങിയവയും ഇവിടെ ഉണ്ട്.സിനിമ ഷൂട്ടിംഗ് അവശേഷിപ്പിച്ച അല്ലറ ചില്ലറ പരിക്കുകളും ധാരാളമായി കാണാം.

നടുമുറ്റം

പടിപ്പുര മാളികയുടെ പ്രത്യേകത അതിന്റെ നിലവരയിലുള്ള ഭീമാകാരമായ പത്തായം ആണ്.അനേകായിരം പറ നെല്ല് സംഭരിച്ചു കൊണ്ടിരുന്ന ഗത കാല സ്മരണകളും പേറിയാണ് ഇത് ഇപ്പോള്‍ നില്‍ക്കുന്നത് എന്ന് നമ്മള്‍ക്ക് തോന്നും.ഈ കെട്ടിന്റെ രണ്ടു മുകള്‍ നിലകളിലും വാസയോഗ്യമായ മുറികള്‍ ആണ് ഉള്ളത്.അവ നന്നായി സംരക്ഷിക്കപ്പെട്ടിട്ടുണ്ട്.മനോഹരമായ വരാന്തകളും ഈ കെട്ടിന്റെ പ്രത്യേകത ആണ്.

മന-പടിപ്പുരമാളികയില്‍ നിന്നുള്ള ദൃശ്യം

- വള്ളുവനാടിന്റെ ഗ്രാമീണ ഭംഗികളില്‍ കൂടിയുള്ള യാത്ര എനിക്കെന്നും ഒരു ഹരമായിരുന്നു.ബാല്യ കാലത്തെ ഒറ്റപ്പാലം ജീവിതം സമ്മാനിച്ച മധുരസ്മരണകള്‍ അയവിരക്കുന്നതിനുള്ള അവസരമായാണ്‌ ഓരോ യാത്രയും ഞാന്‍ കണ്ടത്.അതുകൊണ്ട് തന്നെ ഹോട്ടല്‍ വ്യവസായി ആയ അടുത്ത സുഹൃത്തിന്റെ ഒറ്റപ്പാലതെക്കുള്ള ബിസ്സിനസ്സ് യാത്രകളില്‍ തരം കിട്ടുമ്പോഴെല്ലാം ഞാന്‍ പങ്കു ചേരാറുണ്ട്.

മനയുടെയും, മനിശ്ശേരിയുടെയും, ഒറ്റപ്പാലത്തിന്റെയും, മനിശ്ശേരിയുടെ സ്നേഹ നായകന്റെയും, അവിടത്തെ ആത്മാര്‍ഥതയുടെ പ്രതീകങ്ങളായ സുഹൃത്തുക്കളുടെയും, വിശേഷങ്ങള്‍ ഇനിയും ബാക്കി. അത് മറ്റൊരു അവസരത്തിലെക്കാക്കുന്നു .

പോസ്റ്റ്‌ അല്പം നീളം കൂടിയോ ആവോ?

കുറച്ചു ചിത്രങ്ങള്‍ കൂടി

ഇടുക്കി ജില്ല..കോവിലൂ‍രും പാംബാടും ചോലയും

2009-12-19T23:54:00.000+05:30

ഇടുക്കി ജില്ല ,കാഴ്ചകളുടെ ,ഒരു അക്ഷയ ഖനിയാണ്.ഇവിടത്തെ കാഴ്ചകള്‍ ഒരിക്കലും അവസാനിക്കുന്നില്ല.

കോവിലൂര്‍ ഗ്രാമം

സാധാരണ യാത്രക്കാര്‍ ചെന്ന് ചേരാത്ത ഒരു സ്ഥലമാണ് കോവിലൂര്‍ ഗ്രാമം

അങ്ങ് അകലെ കാണുന്നതാണ് കൊളുക്കുമല തേയില തോട്ടം

ഇടുക്കി ജില്ലയിലെ കോവിലൂര്‍ ഗ്രാമം മൂന്നാറില്‍ നിന്ന് 41 കി.മീ ദൂരത്തില്‍ ആണു.ഇതു പാംബാടുംചോല നാഷനല്‍ പാര്‍ക്കിനോടു ചേര്‍ന്നു കിടക്കുന്നു..മൂന്നാ‍റില്‍ നിന്നും മാട്ടുപ്പെട്ടി, കുണ്ടള വഴി ടോപ്പ് സ്റ്റേഷന്‍ .അവിടെ നിന്നും 2 കി മീ കഴിഞാല്‍ ഫോറസ്റ്റ് ചെക്ക് പോസ്റ്റ് .അവിടെ നിന്നും വലത്തോട്ടുള്ള വഴി ആയിരുന്നു പഴയ കൊടൈക്കനാല്‍ റോഡ്‌.ഇപ്പോള്‍ ആ വഴി ഗതാഗതം അനുവദിക്കുന്നില്ല.പുതിയ കൊടൈ റോഡിനുള്ള സര്‍വ്വേ ജോലികള്‍ പുരോഗമിക്കുന്നു.ആ റോഡ്‌ പൂര്‍ത്തിയായാല്‍ കൊടൈക്കനാല്‍ ദൂരം ഗണ്യമായി കുറയുമെന്നാണ് കണക്കുകൂട്ടല്‍.വിദേശ സഞ്ചാരികള്‍ ഉള്‍പ്പെടെ ധാരാളം ടൂറിസ്റ്റുകള്‍ ഇപ്പോള്‍ ഇവിടെ എത്തുന്നുണ്ട്.കോവിലൂര്‍ വരെ നല്ല റോഡ്‌ ആയതുകൊണ്ട് 70 മിനിറ്റ് കൊണ്ട് മുന്നാറില്‍ നിന്നും എത്തി ചേരാം.ഒരു തമിള്‍ ഭൂരിപക്ഷ മേഖലയാണ് ഇവിടം.400വര്‍ഷത്തെ സംസ്ക്കാരം അവകാശപ്പെടുന്ന ഒരു ജനതയാണ് ഇവിടെ ഉള്ളത്.

മരങ്ങളുടെ ഇടയില്‍ കാണുന്നത് കാട്ടുപോത്തിന്റെ കൂട്ടമാണ്‌.ഫോട്ടോസ്

അത്ര വ്യക്തമല്ല.
. നേരത്തെ പറഞ്ഞ ചെക്ക്പോസ്റ്റില്‍ നിന്ന് ഇടത്തോട്ട് തിരിഞ്ഞാല്‍ പാംബാടും ചോല നാഷണല്‍ പാര്‍ക്കിന്റെ പ്രവേശന കവാടമായി. അവിടെ നിന്നും 3 KM പോയാല്‍ കോവിലൂര്‍ ആയി.പോകുന്ന വഴിയില്‍ ധാരാളം വന്യ മൃഗങ്ങളെ കാണുവാന്‍ സാധിക്കും.ആന, കാട്ടുപോത്ത്,മ്ലാവ്,ഇവ ഇവിടത്തെ പതിവ് കാഴ്ചകളില്‍ പെടുന്നു.

അങ്ങ് ദൂരെ മലമുകളില്‍ ക്ലാവര

കോവിലൂര്‍-ഒരു വിദൂര കാഴ്ച

ആ കാണുന്ന മല മുകളില്‍ ആണ് ക്ലാവര ഗ്രാമം.അത് തമിഴ്നാട് ആണ്.അവിടം വരെ തമിഴ്നാട്‌ ബസ്‌ സര്‍വീസ് ഉണ്ട്.താഴ്വാരത്ത് നിന്നും ക്ലാവര വരെ റോഡ്‌ പൂര്‍ത്തിയായാല്‍ കൊടൈ റോഡ്‌ എന്ന സ്വപ്നം സഫലമാകും. ഇത് കൂടാതെ പുതിയ നിരവധി പാതകള്‍ കോവിലൂരില്‍ നിന്നും പൂര്‍ത്തിയായിക്കൊണ്ടിരിക്കുന്നു.കാന്തല്ലൂര്‍ ,പഴതോട്ടം തുടങ്ങിയ സഞ്ചാരികളുടെ സ്വപ്ന ഭൂമികളിലെക്കുള്ള പാതയില്‍ കാഴ്ചകളുടെ വിരുന്നുകള്‍ കാത്തിരിക്കുന്നു.ഈ വഴിയില്‍ ഞാന്‍ കണ്ട സ്റെവേ നോര്‍മാന്‍ എന്ന സ്വീഡിഷ് സഞ്ചാരി ,സ്വിറ്റ്സര്‍ലന്‍ഡ് മല നിരകളുടെ ഭംഗിയുള്ള പ്രദേശമാണ് കോട മഞ്ഞു നിറഞ്ഞ പഴതോട്ടം മേഖല എന്ന് പറയുകയുണ്ടായി.

കോവിലൂര്‍-പഴതോട്ടം റോഡ്‌

പഴതോട്ടം

പഴതോട്ടം എന്നത് ഒരു സ്ഥലപ്പേര് ആണ്

റോഡുകള്‍ എല്ലാം ഏതാനും മാസങ്ങള്‍ക്കുള്ളില്‍ ശരിയാകുമെന്നാണ് അറിയാന്‍ കഴിഞ്ഞത്.ശ്രദ്ധിക്കേണ്ട ഒരു കാര്യം ഇരുട്ടുന്നതിനു മുന്‍പ് മുന്നാറില്‍ മടങ്ങി എത്തുക എന്നുള്ളതാണ്.ആന,കാട്ടുപോത്ത് തുടങ്ങിയവ രാത്രി റോഡില്‍ ഇറങ്ങും.മുന്നാറില്‍ നിന്നും രാവിലെ യാത്ര തുടങ്ങിയാല്‍ അഞ്ചു മണിയോടെ മടങ്ങിയെത്താം.കോവിലൂര്‍ ഭാഗത്ത്‌ ഹോട്ടലുകളുടെ കാര്യം തഥൈവ ആയതിനാല്‍ നിര്‍ബന്ധമായും ഭക്ഷണവും കുടിവെള്ളവും കൂടെ കരുതണം.കോവിലൂരില്‍ നിന്നും ചില ഭാഗങ്ങളിലേക്ക് 4 വീല്‍ ജീപ്പ് മാത്രമേ പോവുകയുള്ളു.